အီရန်–အမေရိကန် သဘောတူညီချက်မူကြမ်းအရ ဟော်မုဇ် ရေလက်ကြား ကုန်သွယ်သင်္ဘောလမ်း ပြန်ဖွင့်နိုင်၊ ရေတပ်ပိတ်ဆို့မှု အဆုံးသတ်နိုင်
အီရန်နိုင်ငံပိုင်ရုပ်သံက အမေရိကန်နှင့် ဖြစ်ပွားနေသည့် ပဋိပက္ခကို အဆုံးသတ်ရန် ရည်ရွယ်သည့် ပဏာမအဆင့်၊ တရားဝင်မဟုတ်သေးသော နားလည်မှုစာချွန်လွှာမူကြမ်းတစ်စောင်ကို တီဟီရန်က ရရှိထားကြောင်း ဖော်ပြခဲ့သည်။ ထိုမူကြမ်းအရ ဟော်မုဇ်ရေလက်ကြားမှ စီးပွားရေးသင်္ဘောများ ဖြတ်သန်းသွားလာမှုကို တစ်လအတွင်း စစ်မဖြစ်မီအဆင့်သို့ ပြန်လည်ရောက်ရှိစေရန် အီရန်က သဘောတူမည်ဖြစ်ပြီး၊ အမေရိကန်ကလည်း အီရန်အနီးရှိ စစ်ရေးတပ်ဖွဲ့များကို ရုပ်သိမ်းကာ ရေတပ်ပိတ်ဆို့မှုကို အဆုံးသတ်မည်ဟု သိရသည်။
အီရန်ရုပ်သံ၏ ဖော်ပြချက်အရ အဆိုပါမူကြမ်းတွင် စစ်သင်္ဘောများ မပါဝင်ဘဲ အိုမန်နိုင်ငံနှင့် ပူးပေါင်း၍ ရေလက်ကြားအတွင်း သင်္ဘောလှုပ်ရှားမှုများကို အီရန်က စီမံခန့်ခွဲမည့်ပုံစံ ပါဝင်သည်။ သို့သော် မူကြမ်းသည် မပြီးပြတ်သေးဘဲ တီဟီရန်ဘက်က “လက်တွေ့အတည်ပြုနိုင်သည့် အထောက်အထား” မရရှိမချင်း မည်သည့်ခြေလှမ်းမျှ လှမ်းမည်မဟုတ်ကြောင်း ဆိုသည်။ ထို့ပြင် ရက်ပေါင်း ၆၀ အတွင်း နောက်ဆုံးသဘောတူညီချက် ရရှိပါက ကုလသမဂ္ဂ လုံခြုံရေးကောင်စီ၏ စည်းနှောင်အားရှိသည့် ဆုံးဖြတ်ချက်အဖြစ် အတည်ပြုနိုင်ကြောင်းလည်း ထည့်သွင်းဖော်ပြခဲ့သည်။
အမေရိကန်–အီရန် နားလည်မှုစာချွန်လွှာ ပေါ်ပေါက်လာခြင်းသည် ယခုနှစ် ဖေဖော်ဝါရီတွင် စတင်ခဲ့သည့် စစ်ပွဲနောက်ပိုင်း ဆက်လက်ပြုလုပ်နေသော သွယ်ဝိုက်ဆွေးနွေးမှုများမှ ထွက်ပေါ်လာခြင်းဖြစ်ပြီး ပါကစ္စတန်နိုင်ငံက တီဟီရန်နှင့် ဝါရှင်တန်အကြား အဓိက ကြားဝင်ညှိနှိုင်းပေးသူအဖြစ် ဆောင်ရွက်နေသည်ဟု ဆိုသည်။ အဆိုပါစစ်ပွဲမှာ ယခုနှစ်အစောပိုင်း အီရန်နှင့် အစ္စရေးအကြား တင်းမာမှု အလွန်မြင့်တက်လာပြီး နှစ်ဖက်စလုံးက ဒုံးကျည်နှင့် ဒရုန်းတိုက်ခိုက်မှုများ အပြန်အလှန် ပြုလုပ်ခဲ့ရာ ပင်လယ်ကွေ့ဒေသ၏ သင်္ဘောသွားလာမှုကို နှောင့်ယှက်ခဲ့သလို အမေရိကန်စစ်တပ်လည်း ပါဝင်လာစေခဲ့ပြီး ဒေသတွင်း ပိုမိုကျယ်ပြန့်သော ပဋိပက္ခ ဖြစ်ပွားလာနိုင်သည့် အန္တရာယ်ကို မြှင့်တင်စေခဲ့သည်။