ကိုရီးယား၏ KF-21 တိုက်လေယာဉ် အစိုးရဦးဆောင်သော လေယာဉ်အသင့်ဖြစ်မှု စစ်ဆေးချက် အောင်မြင်
တောင်ကိုရီးယား၏ ပထမဆုံး ပြည်တွင်းထုတ် KF-21 တိုက်လေယာဉ်သည် အစိုးရက ဦးဆောင်ဆောင်ရွက်သည့် လေယာဉ်အသင့်ဖြစ်မှု လုံခြုံရေးစစ်ဆေးချက်ကို အောင်မြင်ခဲ့ကြောင်း အစိုးရလက်အောက်ခံ လက်နက်ဝယ်ယူရေး အေဂျင်စီက အင်္ဂါနေ့တွင် ထုတ်ပြန်သည်။ ယင်းသည် လေယာဉ်အနေဖြင့် သတ်မှတ်ထားသည့် စံနှုန်းများကို ပြည့်မီကြောင်း တရားဝင် အတည်ပြုခံရခြင်းလည်း ဖြစ်သည်။
ကာကွယ်ရေးဝယ်ယူရေးအစီအစဉ် စီမံခန့်ခွဲရေးအဖွဲ့ (DAPA) ၏ ထုတ်ပြန်ချက်အရ KF-21 သည် ၂၀၂၁ ခုနှစ် ဧပြီလမှ ၂၀၂၆ ခုနှစ်အထိ ဆက်တိုက် ဆောင်ရွက်ခဲ့သည့် စမ်းသပ်မှုများကို အပြီးသတ်ပြီးနောက် တနင်္လာနေ့တွင် airworthiness certification ရရှိခဲ့သည်။ DAPA ၏ သုံးသပ်ရေးကော်မတီကလည်း အီလက်ထရောနစ်စနစ်များနှင့် လေယာဉ်ဖွဲ့စည်းပုံအပါအဝင် အကဲဖြတ်ကဏ္ဍ ၁၄ ခုအတွင်း သတ်မှတ်ချက် ၇၄၅ ခုလုံးကို လေယာဉ်က ပြည့်မီထားကြောင်း အတည်ပြုခဲ့သည်။
ထိုဆုံးဖြတ်ချက်သည် KF-21 က မေလအတွင်း တိုက်ပွဲအသင့်ဖြစ်မှု စစ်ဆေးမှုကိုလည်း အောင်မြင်ခဲ့ပြီးနောက် ထွက်ပေါ်လာခြင်းဖြစ်သည်။ ကိုရီးယားနိုင်ငံအနေဖြင့် ၂၀၃၂ ခုနှစ်အထိ KF-21 တိုက်လေယာဉ် ၁၂၀ စင်း ထုတ်လုပ်ရန် စီစဉ်ထားပြီး ပထမအဆင့်အနေဖြင့် ၄၀ စင်းကို လေယာဉ်ချင်းတိုက်ခိုက်ရေး (air-to-air) စွမ်းရည်ကို အဓိကထား၍ ၂၀၂၈ ခုနှစ်အထိ ပေးပို့မည်ဖြစ်သည်။ ထို့နောက် မြေပြင်ပစ်နှင့် သင်္ဘောပစ် စွမ်းရည်များပါဝင်သည့် လေယာဉ် ၈၀ စင်းကို ထပ်မံထုတ်လုပ်သွားမည်ဟု ဆိုသည်။
ပထမအသုတ်ကို ယခုနှစ် ဒုတိယနှစ်ဝက်အတွင်း လေတပ်သို့ လွှဲပြောင်းပေးမည်ဖြစ်ပြီး ကျန်လေယာဉ်များကို အဆင့်လိုက် ဆက်လက်ပေးအပ်သွားမည်ဟု သိရသည်။