---

K-pop အဖွဲ့ Seventeen မှ Joshua သည် လာမည့် ဇွန် ၂၅ ရက်တွင် ပြင်သစ်နိုင်ငံ ပါရီမြို့ရှိ UNESCO ရုံးချုပ်၌ မိန့်ခွန်းပြောကြားမည်ဖြစ်ကြောင်း သိရသည်။ ၎င်းသည် UNESCO ၏ လူငယ်သံတမန်အဖြစ် တက်ရောက်မည့် အစီအစဉ်လည်း ဖြစ်သည်။

Pledis Entertainment ၏ ထုတ်ပြန်ချက်အရ အဆိုပါအစီအစဉ်သည် Seventeen နှင့် UNESCO တို့ ပူးပေါင်းစတင်ထားသည့် “Going Together — For Youth Creativity & Well-Being” ဟု အမည်ပေးထားသော ကမ္ဘာလုံးဆိုင်ရာ လူငယ်အစီအစဉ်၏ တစ်စိတ်တစ်ပိုင်းဖြစ်သည်။ Joshua သည် အဖွဲ့ကိုယ်စား ကမ္ဘာတစ်ဝန်းရှိ လူငယ်များအား အားပေးစကားပြောကြားမည်ဖြစ်ပြီး UNESCO အထွေထွေညွှန်ကြားရေးမှူး Khaled El-Enany လည်း တက်ရောက်မည်ဖြစ်သည်။ အဆိုပါအစီအစဉ်ကို UNESCO ၏ တရားဝင် YouTube ချန်နယ်တွင် တိုက်ရိုက်ထုတ်လွှင့်သွားမည်ဖြစ်သည်။

Seventeen ကို UNESCO ၏ လူငယ်သံတမန်အဖြစ် 2024 ခုနှစ်တွင် ခန့်အပ်ခဲ့ပြီး ကမ္ဘာလုံးဆိုင်ရာ လူငယ်ရန်ပုံငွေတစ်ရပ် တည်ထောင်ရန် အမေရိကန်ဒေါ်လာ ၁ သန်း လှူဒါန်းခဲ့သည်။ အဆိုပါရန်ပုံငွေဖြင့် ဂီတ၊ အနုပညာနှင့် အားကစားမှတစ်ဆင့် လူငယ်များ၏ ယုံကြည်မှုနှင့် ခံနိုင်ရည်အားကို မြှင့်တင်ရန်၊ ဖန်တီးမှုရှိသော လူငယ်အသိုက်အဝန်းများကို အားကောင်းစေရန်နှင့် စိတ်ကျန်းမာရေး မြှင့်တင်ရေး စီမံကိန်းများကို ထောက်ပံ့လျက်ရှိသည်။ ထို့ပြင် ပြီးခဲ့သည့်နှစ်ကလည်း အဖွဲ့သည် International Youth Day အထိမ်းအမှတ် ပရဟိတလေလံပွဲမှ ရရှိသည့် ဝင်ငွေကို လှူဒါန်းခဲ့ကြောင်း သိရသည်။