---

တောင်ကိုရီးယား အမျိုးသမီးရေးရာနှင့် မိသားစုရေးရာဝန်ကြီးဌာနက ကလေးထောက်ပံ့ကြေး မပေးချေသူ ၁၆၆ ဦးအပေါ် ခရီးသွားတားမြစ်ချက်နှင့် ယာဉ်မောင်းလိုင်စင် ရပ်ဆိုင်းမှု အပါအဝင် အရေးယူမှု ၁၈၄ ခုကို အတည်ပြုလိုက်ကြောင်း ကြေညာခဲ့သည်။

ဝန်ကြီးဌာန၏ ထုတ်ပြန်ချက်အရ ယင်းအရေးယူမှုများကို ယခုလအစောပိုင်းတွင် ပြုလုပ်ခဲ့သည့် ကလေးထောက်ပံ့ကြေး အကောင်အထည်ဖော်ရေး ပြန်လည်စိစစ်ကော်မတီ၏ ၅၁ ကြိမ်မြောက် အစည်းအဝေး၌ အတည်ပြုခဲ့ခြင်းဖြစ်ပြီး ခရီးသွားတားမြစ်မှု ၁၂၀ ခု၊ ယာဉ်မောင်းလိုင်စင် ရပ်ဆိုင်းမှု ၄၁ ခုနှင့် ကိုယ်ရေးအချက်အလက် လူမြင်ကွင်းသိရှိစေမှု ၂၃ ခု ပါဝင်သည်။ ပျမ်းမျှ အကြွေးကျန် ကလေးထောက်ပံ့ကြေးမှာ ဝမ် ၄၅ သန်းခန့် (ဒေါ်လာ ၂၉,၃၅၄) ရှိပြီး အကြီးဆုံး အကြွေးကျန်ပမာဏမှာ ဝမ် ၁၉၂ သန်းခန့် ဖြစ်သည်။

ကလေးထောက်ပံ့ကြေး ဥပဒေအရ တရားရုံးက ချမှတ်ထားသည့် တစ်လုံးတည်းပေးငွေ အမိန့်ကို ရက် ၃၀ ကျော် မလိုက်နာသူများ၊ တရားရုံး၏ အကောင်အထည်ဖော်ရေးအမိန့် ရှိနေသော်လည်း ကလေးထောက်ပံ့ကြေးကို အနည်းဆုံး ၃ ကြိမ် မပေးသူများနှင့် အကြွေးကျန်ပမာဏ ဝမ် ၃၀ သန်းကျော် ရှိသူများကို အရေးယူနိုင်သည်။

အရေးယူမှု အရေအတွက်မှာ ၂၀၂၃ ခုနှစ်တွင် ၆၃၉ ခု၊ ၂၀၂၄ ခုနှစ်တွင် ၉၄၇ ခု၊ ယမန်နှစ်တွင် ၁,၃၈၉ ခုအထိ တဖြည်းဖြည်း မြင့်တက်လာခဲ့ပြီး ယခုနှစ် ပထမ ၆ လအတွင်းလည်း ၇၂၀ ခုကို အတည်ပြုပြီးဖြစ်သည်။ အမျိုးသမီးရေးရာဝန်ကြီး ဝန် မင်-ကျောင်က အစိုးရအနေဖြင့် အကောင်အထည်ဖော်မှုကို ပိုမိုတင်းကျပ်စွာ ဆောင်ရွက်မည်ဖြစ်ပြီး ကလေးထောက်ပံ့ကြေးကို အချိန်မီ မရရှိသည့် မိခင်တစ်ဦးတည်း၊ ဖခင်တစ်ဦးတည်း မိသားစုများ၏ စီးပွားရေးဝန်ထုပ်ဝန်ပိုး လျှော့ချပေးနိုင်ရန် ထိရောက်သည့် ပြစ်ဒဏ်များကို ဆက်လက်ရှာဖွေသွားမည်ဟု ပြောကြားခဲ့သည်။