---

Alphabet ပိုင် Google သည် နောက်မျိုးဆက် artificial intelligence (AI) ပရိုဆက်ဆာအတွက် အစိတ်အပိုင်းတချို့ ထုတ်လုပ်ရေးကို Samsung Electronics နှင့် ဆွေးနွေးနေကြောင်း The Information က သောကြာနေ့တွင် ဖော်ပြခဲ့သည်။ အဆိုပါ သဘောတူညီမှုသာ အထမြောက်ပါက Samsung ၏ ချစ်ပ်ထုတ်လုပ်ရေး လုပ်ငန်းခွဲကို တိုးချဲ့ရန် ကြိုးပမ်းမှုအတွက် အရေးပါသည့် အောင်မြင်မှုတစ်ရပ် ဖြစ်လာနိုင်ကြောင်း သတင်းတွင် ဆိုသည်။

သတင်းအရ Google သည် “Icefish” ဟု အမည်ဝှက်ပေးထားသည့် tensor processing unit (TPU) ၏ အဓိက တွက်ချက်မှုအစိတ်အပိုင်းကို TSMC က ထုတ်လုပ်စေမည်ဖြစ်ပြီး၊ memory နှင့် ချိတ်ဆက်ပေးသည့် အစိတ်အပိုင်းတစ်ခုကို Samsung က 2-nanometer (2nm) ထုတ်လုပ်မှုနည်းပညာဖြင့် ထုတ်လုပ်ပေးနိုင်ကြောင်း ဖော်ပြထားသည်။ Google သည် ဒီဇိုင်းပိုင်းတွင် ချစ်ပ်ကုမ္ပဏီ MediaTek နှင့်လည်း ပူးပေါင်းလုပ်ကိုင်နေပြီး “Icefish” ကို လက်ရှိတွင် ဆက်လက် ဖွံ့ဖြိုးနေဆဲဖြစ်ကာ အစုလိုက်အပြုံလိုက် ထုတ်လုပ်မှုကို အစောဆုံး 2028 ခုနှစ်အတွင်း စတင်နိုင်ဖွယ်ရှိကြောင်း သတင်းက ဆိုသည်။

2nm နည်းပညာသည် သေးငယ်သော ချစ်ပ်အတွင်း စွမ်းဆောင်ရည်မြင့် အစိတ်အပိုင်းများကို ပိုမိုတင်းကျပ်စွာ ထည့်သွင်းနိုင်သဖြင့် အမြန်နှုန်း၊ စွမ်းအင်သုံးစွဲမှုနှင့် AI စွမ်းရည်တို့ကို ပိုမိုတိုးတက်စေနိုင်သည်။ Samsung Electronics ကမူ မှတ်ချက်ပေးရန် ငြင်းဆိုခဲ့ပြီး Alphabet ကလည်း Reuters ၏ မေးမြန်းမှုကို ချက်ချင်း တုံ့ပြန်ခြင်း မရှိခဲ့ကြောင်း သိရသည်။ Reuters သည်လည်း အဆိုပါသတင်းကို သီးခြား အတည်မပြုနိုင်သေးကြောင်း ဖော်ပြထားသည်။

ပြီးခဲ့သည့် ဧပြီလတွင် Samsung က ၎င်း၏ အဆင့်မြင့်နည်းပညာဖြင့် ထုတ်လုပ်သည့် ချစ်ပ်များအတွက် ဖောက်သည် ပိုမိုရရှိလာမည်ဟု မျှော်လင့်နေပြီး ထုတ်လုပ်မှု တိုးမြှင့်ရန် Texas ပြည်နယ်တွင် ဒုတိယစက်ရုံ တည်ဆောက်ရေးကို ထည့်သွင်းစဉ်းစားနေကြောင်း ပြောကြားခဲ့သည်။ 2025 ခုနှစ် ဇူလိုင်လတွင်လည်း Tesla နှင့် AI ချစ်ပ်များ ထုတ်လုပ်ရန် အမေရိကန်ဒေါ်လာ 16.5 ဘီလီယံတန် သဘောတူညီမှုတစ်ရပ် ရရှိထားသည်။

ယင်းသတင်းသည် Google က TSMC အပေါ် မှီခိုမှု လျှော့ချရန် ကြိုးပမ်းနေကြောင်း ထပ်မံ ပြသနေသည်။ TSMC သည် အရှိန်အဟုန်မြင့် တိုးတက်နေသည့် AI ဝယ်လိုအားကို လိုက်မီရန် ကြိုးပမ်းနေရသော်လည်း လုပ်ငန်းအတွက် အတားအဆီးတစ်ရပ် ဖြစ်လာနိုင်ကြောင်း သတင်းတွင် ဆိုသည်။ ထို့အပြင် The Information က တနင်္လာနေ့တွင် Google သည် 2028 ခုနှစ်၌ TPUs ၃ သန်းကျော် ထုတ်လုပ်ရန် Intel နှင့်လည်း ဆွေးနွေးနေကြောင်း ဖော်ပြထားသည်။ Google ၏ ကိုယ်ပိုင် AI ချစ်ပ်များသည် Nvidia ၏ graphics processors များအတွက် အစားထိုးရွေးချယ်စရာတစ်ခုအဖြစ် ပေါ်ထွက်လာနေပြီး TPU ရောင်းအား တိုးလာမှုကလည်း ၎င်း၏ cloud လုပ်ငန်းအတွက် အားဖြည့်ပေးနေသည်။ Google သည် AI မော်ဒယ်များကို လေ့ကျင့်ရန်နှင့် inference အတွက် ဒီဇိုင်းထုတ်ထားသည့် custom chips အသစ် ၂ မျိုးကို ဧပြီလတွင် မိတ်ဆက်ခဲ့သည်။