BOK က ၂၀၂၆ ခုနှစ် စီးပွားရေးတိုးတက်မှု ခန့်မှန်းချက်ကို ၂.၆ ရာခိုင်နှုန်းအထိ မြှင့်တင်
တောင်ကိုရီးယားဗဟိုဘဏ် (BOK) သည် ၂၀၂၆ ခုနှစ်အတွက် စီးပွားရေးတိုးတက်မှု ခန့်မှန်းချက်ကို ၂ ရာခိုင်နှုန်းမှ ၂.၆ ရာခိုင်နှုန်းအထိ မြှင့်တင်လိုက်ကြောင်း သိရသည်။ ဆီမီးကွန်ဒက်တာ တင်ပို့မှု အလားအလာ ပိုမိုကောင်းမွန်လာခြင်းကြောင့်ဖြစ်ပြီး အခြေခံအတိုးနှုန်းကိုလည်း ၂.၅ ရာခိုင်နှုန်းအတိုင်း ဆက်လက်ထိန်းထားခဲ့သည်။
BOK က ၂၀၂၇ ခုနှစ်တွင် စီးပွားရေးတိုးတက်မှု ၂.၁ ရာခိုင်နှုန်းရှိမည်ဟု ခန့်မှန်းထားပြီး ယခုနှစ် စားသုံးသူ ငွေကြေးဖောင်းပွမှုကို ၂.၇ ရာခိုင်နှုန်း၊ ၂၀၂၇ ခုနှစ်တွင် ၂.၃ ရာခိုင်နှုန်းရှိမည်ဟုလည်း ခန့်မှန်းထားသည်။ အခြေခံအတိုးနှုန်းကို တည်ငြိမ်စွာ ထားရှိရန် ဆုံးဖြတ်ခဲ့သဖြင့် ယင်းသည် ဆက်တိုက် ၈ ကြိမ်မြောက် မပြောင်းလဲခြင်း ဖြစ်သည်။
မေလ ၂၈ ရက်တွင် ဆိုးလ်မြို့ရှိ ဗဟိုဘဏ်၌ ကျင်းပသည့် ငွေကြေးမူဝါဒဘုတ်အဖွဲ့ အစည်းအဝေးတွင် အဆိုပါ ဆုံးဖြတ်ချက်ကို ချမှတ်ခဲ့ခြင်းဖြစ်သည်။ မေလ ၂၁ ရက်တွင် တာဝန် စတင်ယူခဲ့သည့် ဗဟိုဘဏ်အုပ်ချုပ်ရေးမှူး ရှင်ဟျွန်ဆောင်းအတွက် ပထမဆုံးသော အတိုးနှုန်း သတ်မှတ်အစည်းအဝေးလည်း ဖြစ်သည်။ အရှေ့အလယ်ပိုင်းဒေသ၌ မတည်ငြိမ်မှုများ ဆက်လက်ဖြစ်ပေါ်နေသဖြင့် မူဝါဒချမှတ်သူများက သတိထားချဉ်းကပ်ခဲ့ကြောင်းလည်း သိရသည်။