---

အီလွန်မတ်စ်၏ SpaceX က အမေရိကန် ငွေချေးဈေးကွက်ကြီးကြပ်ရေးအဖွဲ့သို့ လျှို့ဝှက် IPO စာရွက်စာတမ်းများ တင်သွင်းထားကြောင်း Reuters က ဖော်ပြသည်။ သတင်းရင်းမြစ်များကို ကိုးကားပြီး ကုမ္ပဏီတန်ဖိုးမှာ ဒေါ်လာ 1.75 ထရီလီယံကျော် ရှိလာနိုင်သဖြင့် သမိုင်းတစ်လျှောက် အကြီးဆုံး IPO အဖြစ် မှတ်တမ်းဝင်နိုင်ကြောင်းလည်း သိရသည်။

Reuters ၏ ဖော်ပြချက်အရ Texas ပြည်နယ် Starbase တွင် အခြေစိုက်သည့် SpaceX သည် အများပြည်သူသို့ စတော့ရှယ်ယာ ရောင်းချမည့် အစီအစဉ်အတွက် အမေရိကန် ငွေချေးလုပ်ငန်းဆိုင်ရာ အရာရှိများထံ လျှို့ဝှက်အချက်အလက်များ တင်သွင်းထားသည်။ ထို့ပြင် SpaceX ကို ဇူလိုင်လအတွင်း အများပြည်သူဈေးကွက်တွင် စာရင်းသွင်းနိုင်ဖွယ်ရှိကြောင်း Wall Street Journal နှင့် Bloomberg တို့ကလည်း အမှုနှင့် နီးစပ်သူများကို ကိုးကား၍ ဖော်ပြခဲ့သည်။

ကုမ္ပဏီသည် ပြန်လည်အသုံးပြုနိုင်သော ရော့ကတ်များနှင့် Starlink ဂြိုဟ်တုအင်တာနက်ကွန်ရက်တို့ကြောင့် လျင်မြန်စွာ တိုးတက်လာခဲ့သည်။ xAI နှင့် ပေါင်းစည်းမှုအပြီး SpaceX ၏ တန်ဖိုးကို ဒေါ်လာ 1 ထရီလီယံ၊ Grok chatbot ကို တီထွင်ထားသည့် xAI ၏ တန်ဖိုးကို ဒေါ်လာ 250 ဘီလီယံအဖြစ် သတ်မှတ်ထားကြောင်းလည်း သိရသည်။

SpaceX သည် ဧပြီ 21 ရက်တွင် analyst day ကျင်းပမည်ဖြစ်ပြီး သုတေသနလေ့လာသူများကို ကိုယ်တိုင်လာရောက်ရန် ဖိတ်ကြားထားသည်။ ထို့အပြင် ဧပြီ 23 ရက်တွင် Tennessee ပြည်နယ် Memphis ရှိ xAI ၏ “Macrohard” data center site ကို လည်ပတ်ကြည့်ရှုနိုင်မည့် အခွင့်အရေးပေးထားပြီး မေ 4 ရက်တွင် ဘဏ်လုပ်ငန်းအဖွဲ့များ ပါဝင်နိုင်သည့် virtual session တစ်ခုကိုလည်း ပြုလုပ်မည်ဟု သတင်းရင်းမြစ်က ဆိုသည်။

SpaceX ၏ IPO မှတစ်ဆင့် ဒေါ်လာ 50 ဘီလီယံကျော် ရရှိရန် ကြိုးပမ်းနိုင်ပြီး ၎င်းမှာ ဆော်ဒီ Aramco ၏ 2019 ခုနှစ် IPO ကို ကျော်လွန်သွားမည်ဖြစ်သည်။ Reuters ၏ ဇန်နဝါရီလအစီရင်ခံမှုအရ SpaceX သည် 2025 ခုနှစ်တွင် ဝင်ငွေ ဒေါ်လာ 15 ဘီလီယံမှ 16 ဘီလီယံကြား ရရှိပြီး အမြတ် ဒေါ်လာ 8 ဘီလီယံခန့် ရရှိခဲ့ကြောင်း သိရသည်။

IPO ထွက်ပေါ်လာပါက Elon Musk ၏ ကျယ်ပြန့်သော စီးပွားရေးအင်ပါယာဖြစ်သည့် Tesla, Neuralink, The Boring Company နှင့် xAI တို့အပြင် SpaceX ၏ တန်ဖိုးသတ်မှတ်မှုနှင့် စီမံခန့်ခွဲမှုအပေါ် စျေးကွက်၏ စောင့်ကြည့်မှု ပိုမိုပြင်းထန်လာမည်ဟု လေ့လာသူများက သုံးသပ်သည်။ SpaceX ကလည်း Reuters ၏ မေးမြန်းမှုကို ချက်ချင်း တုံ့ပြန်ခြင်း မရှိခဲ့ကြောင်း သိရသည်။

တစ်ဖက်တွင် NASA ကလည်း ဗုဒ္ဓဟူးနေ့ ညပိုင်းအထိ ၄ ဦးပါ အာကာသယာဉ်မှူးအဖွဲ့ကို လ 10 ရက်ကြာ ပတ်လမ်းခရီးစဉ်အတွက် လွှတ်တင်ရန် ပြင်ဆင်နေပြီး ၎င်းသည် အမေရိကန်၏ ဆယ်စုနှစ်များအတွင်း အင်အားအကြီးဆုံး အာကာသမစ်ရှင်တစ်ခု ဖြစ်လာမည်ဖြစ်သည်။ ထို့ပြင် SpaceX သည် နေရောင်ခြည်စွမ်းအင်သုံး ဂြိုဟ်တု 1 သန်းအထိ လွှတ်တင်ရန် ခွင့်ပြုချက် တောင်းခံထားကြောင်းလည်း သိရသည်။