အီတလီ ရောမမြို့၌ ကျင်းပမည့် စီးပွားရေးစားပွဲဝိုင်းသို့ သမ္မတ လီ တက်ရောက်မည်
တောင်ကိုရီးယားသမ္မတ လီဂျေမြောင်သည် တောင်ကိုရီးယားနှင့် အီတလီနိုင်ငံအကြား စီးပွားရေးပူးပေါင်းဆောင်ရွက်မှုကို ပိုမိုတိုးမြှင့်နိုင်မည့် နည်းလမ်းများကို ဆွေးနွေးရန် အီတလီနိုင်ငံ ရောမမြို့၌ သောကြာနေ့တွင် ကျင်းပမည့် စီးပွားရေးစားပွဲဝိုင်းသို့ တက်ရောက်မည်ဖြစ်သည်။ အဆိုပါပွဲသို့ Samsung Electronics ဥက္ကဋ္ဌ လီဂျေယောင်လည်း ပါဝင်တက်ရောက်မည်ဖြစ်သည်။
ရောမမြို့ရှိ ဟိုတယ်တစ်ခုတွင် ညပိုင်း ကျင်းပမည့် အဆိုပါစီးပွားရေးစားပွဲဝိုင်း၌ သမ္မတ လီက AI နည်းပညာပေါ်ထွန်းလာမှုနှင့် ထောက်ပံ့ရေးကွင်းဆက်များ ပြန်လည်ဖွဲ့စည်းနေသည့် အခြေအနေများကြောင့် ပြောင်းလဲလာသည့် စီးပွားရေးပတ်ဝန်းကျင်အတွင်း နှစ်နိုင်ငံ စီးပွားရေးပူးပေါင်းဆောင်ရွက်မှု၏ အရေးပါမှုကို အလေးပေးပြောကြားမည်ဟု မျှော်လင့်ရသည်။
ယင်းမတိုင်မီ တစ်ရက်က အီတလီသမ္မတ ဆာဂျီယို မာတာရဲလာနှင့် ပြုလုပ်ခဲ့သည့် ထိပ်သီးဆွေးနွေးပွဲတွင် နှစ်ဘက်ခေါင်းဆောင်များက တောင်ကိုရီးယား-အီတလီ ဆက်ဆံရေးကို “အထူးမဟာဗျူဟာမိတ်ဖက်ဆက်ဆံရေး” အဖြစ် မြှင့်တင်ရန် သဘောတူခဲ့ကြပြီး semiconductor၊ AI နှင့် အခြား မဟာဗျူဟာကျသော နယ်ပယ်များတွင် ပူးပေါင်းဆောင်ရွက်မှု တိုးချဲ့နိုင်မည့် နည်းလမ်းများကိုလည်း ဆွေးနွေးခဲ့ကြသည်။
အဆိုပါအခမ်းအနားသို့ နှစ်နိုင်ငံမှ ကုမ္ပဏီ ၃၀ ခုမှ စီးပွားရေးခေါင်းဆောင်များ တက်ရောက်မည်ဖြစ်ပြီး ကိုရီးယားဘက်မှ Korea Employers Federation ဥက္ကဋ္ဌ ရျူဂျင်၊ Samsung Electronics ဥက္ကဋ္ဌ လီဂျေယောင်၊ Hyosung Group ဥက္ကဋ္ဌ ချိုဟျွန်းဂျွန်၊ Hyundai Motor Co. ဥက္ကဋ္ဌ ဆောင်းကင်မ်နှင့် Naver အမှုဆောင်အရာရှိချုပ် ချွဲဆိုယွန်တို့ ပါဝင်မည်ဖြစ်သည်။ အီတလီဘက်မှ Confindustria ဟုခေါ်သည့် အီတလီစက်မှုလုပ်ငန်းအဖွဲ့ချုပ်၏ ဒုတိယဥက္ကဋ္ဌ ဂျော်ဂျီယို မာဆီယာ့စ်နှင့် ဇိမ်ခံကားထုတ်လုပ်သူ Ferrari ၏ အမှုဆောင်အရာရှိချုပ် ဘယ်နီဒက်တို ဗီညာတို့ တက်ရောက်မည်ဖြစ်သည်။
တက်ရောက်လာမည့် စီးပွားရေးခေါင်းဆောင်များက အဆင့်မြင့်စက်မှုလုပ်ငန်းများ၊ စွမ်းအင်၊ အခြေခံအဆောက်အအုံနှင့် အနာဂတ်ဦးတည်သည့် ကဏ္ဍများတွင် ပူးပေါင်းဆောင်ရွက်မှုကို ပိုမိုခိုင်မာစေရန် နည်းလမ်းများကို ဆွေးနွေးကြမည်ဖြစ်သည်။