အမေရိကန်က တောင်ကိုရီးယားသို့ AMRAAM လေ-ဝေဟင်ပစ် ဒုံးကျည်များ ရောင်းချခွင့် မူအားဖြင့် အတည်ပြု
အမေရိကန်အစိုးရက တောင်ကိုရီးယားသို့ AIM-120C-8 AMRAAM လေ-ဝေဟင်ပစ် ဒုံးကျည်များနှင့် ဆက်စပ်ပစ္စည်းများ ရောင်းချခွင့်ကို မူအားဖြင့် အတည်ပြုလိုက်ကြောင်း အမေရိကန် နိုင်ငံခြားရေးဌာနက ဇွန် ၁၁ ရက်တွင် ထုတ်ပြန်ခဲ့သည်။ အဆိုပါ ရောင်းချမှု၏ ခန့်မှန်းတန်ဖိုးမှာ ဒေါ်လာ ၂၉၂ သန်းဖြစ်ပြီး တောင်ကိုရီးယား၏ ကာကွယ်ရေးစွမ်းရည်ကို မြှင့်တင်ပေးနိုင်မည်ဟု ဆိုသည်။
နိုင်ငံခြားရေးဌာန၏ ထုတ်ပြန်ချက်အရ တောင်ကိုရီးယားဘက်က AIM-120C-8 AMRAAM ဒုံးကျည် ၇၀ လုံး၊ AIM-120C-8 AMRAAM guidance section ၂ စုံအပြင် AMRAAM container များ၊ control section များနှင့် support equipment များကို ဝယ်ယူရန် တောင်းဆိုထားသည်။ အဆိုပါ အရောင်းအဝယ်ကို အမေရိကန်အစိုးရနှင့် တောင်ကိုရီးယားအစိုးရအကြား Foreign Military Sale (FMS) အစီအစဉ်အရ ဆောင်ရွက်မည်ဖြစ်ပြီး အမေရိကန်ကွန်ဂရက်သို့ အသိပေးတင်ပြကာ စိစစ်မှုခံယူရမည်ဖြစ်သည်။
“အဆိုပြုထားသည့် ရောင်းချမှုသည် တောင်ကိုရီးယားသမ္မတနိုင်ငံ၏ လေကြောင်းကာကွယ်ရေးစွမ်းရည်ကို တိုးချဲ့ပေးပြီး လက်ရှိနှင့် အနာဂတ် ခြိမ်းခြောက်မှုများကို ရင်ဆိုင်နိုင်စွမ်း တိုးတက်စေကာ ဒေသတွင်း ရန်လိုမှုများကို တားဆီးနိုင်မည်ဖြစ်သည်။ ထို့အပြင် အမေရိကန်တပ်ဖွဲ့များနှင့် လုပ်ငန်းဆောင်ရွက်မှု လိုက်ဖက်ညီမှုကိုလည်း အာမခံပေးမည်” ဟု နိုင်ငံခြားရေးဌာနက ပြောကြားသည်။ အဆိုပါ စီမံကိန်းအတွက် အဓိကကန်ထရိုက်တာမှာ ဗာဂျီးနီးယားပြည်နယ် အာလင်တန်မြို့အခြေစိုက် RTX Corporation ဖြစ်ကြောင်းလည်း ဖော်ပြထားသည်။
ပြီးခဲ့သည့် ရက်သတ္တပတ်အတွင်း အမေရိကန်အစိုးရက တောင်ကိုရီးယားသို့ Joint Direct Attack Munition (JDAM) တိကျစွာပစ်ခတ်နိုင်သော ဗုံးများနှင့် ဆက်စပ်ပစ္စည်းများ ရောင်းချခွင့်ကိုလည်း မူအားဖြင့် အတည်ပြုခဲ့ပြီး ယင်း၏ ခန့်မှန်းတန်ဖိုးမှာ ဒေါ်လာ ၁၀၆ သန်း ဖြစ်သည်။