---

ပုပ်ရဟန်းမင်း လီယိုသည် ဇွန် ၆ ရက်မှ ၁၂ ရက်အထိ စပိန်နိုင်ငံသို့ သီတင်းတစ်ပတ်ကြာ ခရီးစဉ်အဖြစ် သွားရောက်မည်ဖြစ်ပြီး၊ ဥရောပသမဂ္ဂအဖွဲ့ဝင်နိုင်ငံတစ်နိုင်ငံ၌ အီတလီပြင်ပသို့ ၎င်း၏ ပထမဆုံးခရီးစဉ်လည်း ဖြစ်လာမည်ဖြစ်သည်။ ခရီးစဉ်အတွင်း ရွှေ့ပြောင်းနေထိုင်သူများနှင့် တွေ့ဆုံမည်ဖြစ်ကာ လူဝင်မှုဆိုင်ရာ မူဝါဒများနှင့် လူမှုရေးကွဲပြားမှုများအပေါ်လည်း အလေးထား ပြောကြားမည်ဟု မျှော်လင့်ရသည်။

ဗာတီကန်၏ ပြောရေးဆိုခွင့်ရှိသူ မာတယ်အို ဘရူနီက ရွှေ့ပြောင်းနေထိုင်သူများ၏ အခြေအနေသည် ပုပ်ရဟန်းမင်း၏ စိတ်နှလုံးနှင့် အလွန်နီးစပ်သည့် ကိစ္စဖြစ်ကြောင်း ပြောကြားခဲ့သည်။ လီယိုသည် ဘာစီလိုနာမြို့ရှိ နာမည်ကျော် ဆာဂရာဒါ ဖမီးလီယာ ဘာစီလီကာ၌ တိုးချဲ့တည်ဆောက်ထားသည့် အဆောက်အအုံအသစ်ကို ဖွင့်လှစ်ပေးမည်ဖြစ်ပြီး မဒရစ်မြို့၊ မွန်ဆယ်ရက်တ် ဘုန်းတော်ကြီးကျောင်းနှင့် အာဖရိကအနောက်ဘက်ကမ်းရိုးတန်းအနီးရှိ ကနေရီကျွန်းစုများသို့လည်း သွားရောက်မည်ဖြစ်သည်။

လီယိုသည် အမေရိကန်သမ္မတ ဒေါ်နယ် ထရမ့်၏ လူဝင်မှုတားဆီးရေးမူဝါဒများကို ဝေဖန်ခဲ့သဖြင့် ထရမ့်၏ မကျေနပ်မှုကို ရရှိထားသူဖြစ်သည်။ ခရီးစဉ်၏ နောက်ဆုံးအပိုင်းဖြစ်သည့် ကနေရီကျွန်းစုတွင် ရွှေ့ပြောင်းနေထိုင်သူများနှင့် ၎င်းတို့ကို ကူညီနေသည့် အဖွဲ့အစည်းများကို တွေ့ဆုံမည်ဖြစ်သည်။ ထို့အပြင် လာမည့်ကာလတွင် ကမ္ဘာတစ်ဝန်းဖြစ်ပွားနေသော စစ်ပွဲများကို ရှုတ်ချပြီး နိုင်ငံရေးနှင့် လူမှုရေးအရ ပိုမိုကွဲပြားလာမှုများကို ကျော်လွှားနိုင်ရန် ဆွေးနွေးမှုများ လိုအပ်ကြောင်း တိုက်တွန်းမည်ဟု ဗာတီကန်က ဆိုသည်။

အမေရိကန်နိုင်ငံသားဖြစ်သည့် ပုပ်ရဟန်းမင်း လီယိုသည် ပြီးခဲ့သည့် မေလတွင် ပုပ်ရဟန်းမင်းအဖြစ် ရွေးချယ်ခံရပြီးနောက် ပီရူးနိုင်ငံ၌ သာသနာပြုနှင့် ဘုန်းတော်ကြီးအဖြစ် ဆယ်စုနှစ်များစွာ တာဝန်ထမ်းဆောင်ခဲ့သူဖြစ်ကာ ခရီးစဉ်အများစုကို စပိန်ဘာသာဖြင့် ပြောဆိုမည်ဖြစ်သည်။ တင်နရီဖီကျွန်းတွင် ရွှေ့ပြောင်းနေထိုင်သူများနှင့် တွေ့ဆုံရာ၌မူ အများစုမှာ ပြင်သစ်စကားပြော အာဖရိကဒေသများမှ လာကြသည့်အတွက် ပြင်သစ်ဘာသာကို အသုံးပြုမည်ဟု ခန့်မှန်းရသည်။

စပိန်နိုင်ငံ၏ ဆိုရှယ်လစ်ဝန်ကြီးချုပ် ပက်ဒရို ဆန်ချက်စ်အစိုးရသည် အမေရိကန်အပါအဝင် အနောက်နိုင်ငံကြီးများနှင့် မတူဘဲ ရွှေ့ပြောင်းနေထိုင်သူ ၅ သိန်းခန့်အား တရားဝင်နေထိုင်ခွင့် လျှောက်ထားနိုင်မည့် ကျယ်ပြန့်သည့် အမန့်စ်တီအစီအစဉ်ကို ဖွင့်လှစ်ထားသည်။ တစ်ဖက်တွင်လည်း ၂၀၂၅ ခုနှစ်အတွင်း ကနေရီကျွန်းစုများသို့ ရောက်ရှိရန် ကြိုးပမ်းရာ၌ လက်လုပ်လှေငယ်များဖြင့် ခရီးထွက်သူ ၃,၀၀၀ ကျော် သေဆုံးခဲ့ကြောင်း Caminando Fronteras အမည်ရှိ NGO က ပြောကြားထားသည်။

လီယိုသည် စနေနေ့နံနက် မဒရစ်မြို့သို့ ရောက်ရှိပြီးနောက် Royal Palace တွင် ဘုရင် ဖီလိပ်ပေ နှင့် ဘုရင်မ လက်တီဇီယာ တို့ကို တွေ့ဆုံမည်ဖြစ်ကာ သံတမန်များနှင့် လူမှုရေးခေါင်းဆောင်များကိုလည်း မိန့်ခွန်းပြောကြားမည်ဖြစ်သည်။ ထိုနေ့တွင်ပင် ရီးယဲလ်မဒရစ် ဘောလုံးကလပ်၏ အိမ်ကွင်းဖြစ်သော Santiago Bernabéu အားကစားကွင်းအပြင်ဘက် စတုရန်းတွင် လူငယ်များနှင့် တွေ့ဆုံမည်ဖြစ်ပြီး အိုးမဲ့အိမ်မဲ့များကို ကူညီသည့် ကက်သလစ်ပရဟိတအဖွဲ့အစည်းတစ်ခုကိုလည်း သွားရောက်မည်ဖြစ်သည်။