မက်ဆီအပါအဝင် ကစားသမားအများအပြား ရုပ်ပိုင်း ၁၀၀ ရာခိုင်နှုန်း မပြည့်သေးဟု အာဂျင်တီးနားနည်းပြ ပြော
ကမ္ဘာ့ဖလားပြိုင်ပွဲ မစတင်မီ အာဂျင်တီးနားအသင်းတွင် လီယွန်နယ် မက်ဆီအပါအဝင် ကစားသမားအများအပြား ရုပ်ပိုင်းဆိုင်ရာ ၁၀၀ ရာခိုင်နှုန်း မပြည့်စုံသေးကြောင်း နည်းပြ လီယွန်နယ် စကာလိုနီက ပြောကြားလိုက်သည်။ သို့သော် အခြေအနေကို အလွန်အကျွံ စိုးရိမ်ရန်မလိုကြောင်းလည်း ၎င်းက ဆိုသည်။
ကာကွယ်ချန်ပီယံ အာဂျင်တီးနားအသင်းသည် စနေနေ့က တက္ကဆက်ပြည်နယ် ကောလိပ်စတေးရှင်းမြို့ရှိ Kyle Field ကွင်းတွင် ဟွန်ဒူးရပ်စ်ကို ၂-၀ ဖြင့် အနိုင်ရသည့် ချစ်ကြည်ရေးပွဲ၌ မက်ဆီကို အစားထိုးလူစာရင်းတွင်သာ ထားရှိခဲ့သည်။ လာမည့် ၃၉ နှစ်ပြည့်တော့မည့် အသင်းခေါင်းဆောင် မက်ဆီသည် မကြာသေးမီက ပေါင်ကြွက်သားနာကျင်မှု ပြဿနာ ကြုံတွေ့ခဲ့ရပြီး “လီယိုက တိုးတက်မှုကောင်းတွေ ရှိနေပြီး အသင်းနဲ့လည်း တစ်စိတ်တစ်ပိုင်း လေ့ကျင့်ပြီးပြီ။ အဲဒါက အရမ်းကောင်းပါတယ်” ဟု စကာလိုနီက ဟွန်ဒူးရပ်စ်ပွဲမတိုင်မီ ပြောကြားခဲ့သည်။
မက်ဆီသည် ယခုသီတင်းပတ်အလယ်ပိုင်းတွင် အိုက်စလန်နှင့် ကစားမည့် နောက်ဆုံးအကြိုပွဲ၌ ပါဝင်နိုင်မည်လား သို့မဟုတ် မပါဝင်နိုင်မည်လား မသေချာသေးကြောင်း သိရသည်။ ထို့အတူ ဂိုးသမား အမီလီယာနို မာတီနက်ဇ်လည်း မပါဝင်နိုင်သေးဘဲ၊ ၂၀၂၂ ကမ္ဘာ့ဖလားချန်ပီယံအသင်းဝင် အချို့လည်း အပြည့်အဝ လေ့ကျင့်နိုင်ခြင်း မရှိသေးကြောင်း ဖော်ပြထားသည်။ မာတီနက်ဇ်မှာ ပြီးခဲ့သည့်လက အက်စတန်ဗီလာ၏ ယူရိုပါလိဂ်ဗိုလ်လုပွဲမတိုင်မီ လက်ချောင်းကျိုးခဲ့ဖူးသော်လည်း အာဂျင်တီးနားမီဒီယာအချို့ကမူ ဇွန်လ ၁၆ ရက်တွင် အယ်လ်ဂျီးရီးယားနှင့် ကမ္ဘာ့ဖလားအဖွင့်ပွဲ ကစားမည့်အချိန်တွင် ၎င်းလည်း ပြန်လည်ကစားနိုင်မည်ဟု ခန့်မှန်းနေကြသည်။ အုပ်စုအဆင့်တွင် အာဂျင်တီးနားသည် ဩစတြီးယားနှင့် ဂျော်ဒန်တို့ကိုလည်း ရင်ဆိုင်ကစားရမည်ဖြစ်သည်။