---

ထိုင်ဝမ်တွင် ခရီးသွားလုပ်ငန်းကို မြှင့်တင်ရန်နှင့် ရိုးရာယဉ်ကျေးမှုကို နည်းပညာဖြင့် ထိန်းသိမ်းရန် ဉာဏ်ရည်တု (AI) ကို ဘုရားကျောင်းများနှင့် ဗေဒင်ယုံကြည်မှုဆိုင်ရာ လုပ်ငန်းစဉ်များတွင် ပေါင်းစပ်အသုံးပြုနေကြောင်း သိရသည်။ ယင်းနည်းလမ်းသည် နိုင်ငံခြားခရီးသွားများနှင့် လူငယ်မျိုးဆက်အတွက် ရိုးရာဓလေ့ထုံးစံများကို ပိုမိုလွယ်ကူစွာ လက်လှမ်းမီစေရန် ရည်ရွယ်ထားခြင်း ဖြစ်သည်။

ထိုင်ပေမြို့ နန်ကန်ခရိုင်တွင် မတ် 19 ရက်က ကျင်းပသည့် Smart City Summit and Expo 2026 တွင် ထိုင်ဝမ် ပို့ဆောင်ရေးနှင့် ဆက်သွယ်ရေးဝန်ကြီးဌာနလက်အောက်ရှိ Tourism Administration က AI ကို ခရီးသွားမူဝါဒများနှင့် ရိုးရာယဉ်ကျေးမှု ထိန်းသိမ်းရေးတွင် မည်သို့ပေါင်းစပ်အသုံးပြုနိုင်ကြောင်း ပြသခဲ့သည်။ AI bartender၊ AI perfumer အပါအဝင် လက်တွေ့အသုံးချပြခန်းများကလည်း လူအများ၏ အာရုံစိုက်မှုကို ရရှိခဲ့သည်။

တာဝန်ရှိသူများ၏ ပြောကြားချက်အရ ထိုင်ဝမ်တွင် ဘုရားကျောင်းပေါင်း 15,000 ကျော်ရှိပြီး အများစုကို သက်ကြီးပိုင်းများကသာ လုပ်ကိုင်ထိန်းသိမ်းနေကြသဖြင့် ဆက်ခံမည့် လူငယ်မျိုးဆက် နည်းပါးလာနေသည်။ ထိုအခြေအနေကို ဖြေရှင်းရန် အာဏာပိုင်များက ဘုရားကျောင်းများနှင့် ဗေဒင်ဆိုင်ရာ ပညာရှင်များ ရာနှင့်ချီနှင့် ပူးပေါင်းကာ AI အကူအညီပေးသည့် စနစ်များကို စတင်မိတ်ဆက်နေပြီး ၎င်းစနစ်များက လုပ်ငန်းစဉ်များကို အလိုအလျောက်လုပ်ဆောင်ပေးရုံသာမက ရိုးရာဓလေ့များကိုလည်း ထိန်းသိမ်းပေးနိုင်ရန် ရည်ရွယ်ထားသည်။

ဤအစီအစဉ်အရ ဘုရားကျောင်းများတွင် ဒစ်ဂျစ်တယ်ဗေဒင်စနစ်များကို အသုံးပြုလာပြီး ဒေသခံနှင့် နိုင်ငံတကာခရီးသွားများအား လွယ်ကူသော နည်းပညာပုံစံဖြင့် ရိုးရာယုံကြည်မှုများကို ခံစားတွေ့ကြုံနိုင်စေသည်။ AI က ထုတ်ပေးသည့် အဖြေများကို လူ့ဗေဒင်ဆရာများက ပြန်လည်စစ်ဆေး အတည်ပြုခြင်းကြောင့် ယဉ်ကျေးမှုဆိုင်ရာ အတိအကျမှု မပျက်စီးစေရန် ထိန်းသိမ်းထားသည်။

ဥပမာအားဖြင့် ယူနလင်ခရိုင် ဘေဂန်ရှိ Wude Temple သည် “heavenly advice” ဟု ခေါ်သည့် ရှေးဟောင်း ဝိညာဉ်ရေး စာပေကို AI ဖြင့် အဓိပ္ပာယ်ဖွင့်ဆိုသည့် နည်းလမ်းကို ဦးဆောင်အသုံးပြုနေသည်။ ဤဓလေ့မှာ ကြိုတင်ပုံနှိပ်ထားသည့် ကံဇာတာချေများကို ရွေးယူသည့် ပုံစံမဟုတ်ဘဲ နတ်ဘုရားတစ်ဆူက လူမှတစ်ဆင့် တိုက်ရိုက် ဆက်သွယ်ပေးသည်ဟု ယုံကြည်သည့် ပိုမိုတိုက်ရိုက်သော လုပ်ထုံးလုပ်နည်းဖြစ်သည်။

ခေတ်မီအခြေအနေတွင်လည်း ရိုးရာဓလေ့ မပျောက်ပျက်စေရန် ဘုရားကျောင်းများက ရှုပ်ထွေးသည့် လက်ရေးစာများကို ဖတ်နိုင်ပြီး ရှေးတရုတ်ဘာသာကို လွယ်ကူနားလည်သည့် ခေတ်မီဘာသာစကားသို့ ပြန်ဆိုပေးနိုင်သည့် AI စနစ်များကို မိတ်ဆက်ထားသည်။ အတွေ့အကြုံရှိသည့် လက်တွေ့ကျွမ်းကျင်သူများ နည်းပါးလာသည်နှင့်အမျှ အဆိုပါစနစ်များက အဓိပ္ပာယ်ဖွင့်ဆိုနည်းများကို ဆက်လက်ထိန်းသိမ်းပေးနေသည်။

တာဝန်ရှိသူများက အသက်ကြီးပိုင်း လက်တွေ့ကျွမ်းကျင်သူအချို့ကို လက်ခံလာစေရန် အချိန်ယူ စည်းရုံးရှင်းပြရကြောင်းလည်း ပြောကြားသည်။ “နည်းပညာကို အသုံးပြုပြီး လက်လှမ်းမီလွယ်ကူအောင် လုပ်ပေးပြီး ထိုင်ဝမ်၏ ရိုးရာယဉ်ကျေးမှုကို အွန်လိုင်းကနေပါ တွေ့ကြုံနိုင်စေခြင်းက တစ်ဖက်တွင် အွန်လိုင်းစိတ်ဝင်စားမှုကို မြှင့်တင်ပေးသလို အခြားတစ်ဖက်တွင်လည်း လက်တွေ့လာရောက်လည်ပတ်မှုကို အားကောင်းစေကာ ခရီးသွားလုပ်ငန်းကို အထောက်အကူပြုနိုင်ပါတယ်” ဟု Tourism Administration တာဝန်ရှိသူတစ်ဦးက ပြောသည်။

အချို့ဘုရားကျောင်းများတွင်လည်း ဘုရားဝတ်ပြုနည်းလမ်းများကို အဆင့်လိုက် သင်ကြားပေးသည့် AI လမ်းညွှန်စနစ်များကို စတင်ထားသဖြင့် ပထမဆုံးအကြိမ် လာရောက်သူများအတွက် ပါဝင်ဆောင်ရွက်ရန် ပိုမိုလွယ်ကူလာသည်။

ထိုင်ဝမ်အစိုးရကလည်း ပုဂ္ဂလိကကုမ္ပဏီများနှင့် ပူးပေါင်း၍ AI အခြေပြု ခရီးသွားဝန်ဆောင်မှုများကို တိုးချဲ့ရန် စီစဉ်နေပြီး ပို့ဆောင်ရေးနှင့် ဆက်သွယ်ရေးဝန်ကြီးဌာနလက်အောက် Tourism Administration မှတစ်ဆင့် ခရီးသွားအခြေခံအဆောက်အအုံများတွင် နည်းပညာကို ပိုမိုပေါင်းစပ်ထည့်သွင်းနေသည်။

အများပြည်သူ သယ်ယူပို့ဆောင်ရေး အချက်အလက်များသာမက စနစ်အသစ်များတွင် ဓာတ်လှေကားတည်နေရာနှင့် ဘူတာအတွင်းရှိ အဆင်ပြေချောမွေ့ရေးပစ္စည်းများကိုပါ အသေးစိတ်ဖော်ပြပေးနေသဖြင့် နိုင်ငံခြားဧည့်သည်များ၊ သက်ကြီးရွယ်အို ခရီးသွားများနှင့် အခြားအသုံးပြုသူများအတွက် လက်လှမ်းမီမှု ပိုမိုကောင်းမွန်လာသည်။ သက်ကြီးပိုင်းများအတွက်လည်း ဝန်ကြီးဌာနက သက်ကြီးအဆင်ပြေ ခရီးသွားရေးနှင့် ဆေးကုသရေး စမ်းသပ်နေရာများကို ဖွင့်လှစ်ကာ သယ်ယူပို့ဆောင်ရေးနှင့် လမ်းညွှန်အချက်အလက်များကို ပေါင်းစည်းပေးထားသည်။

ဝန်ကြီးဌာနပြခန်းမှ ဝန်ထမ်းတစ်ဦးကလည်း အဆိုပါအစီအစဉ်များသည် ထိုင်ဝမ်၏ ခရီးသွားအခြေခံစနစ်တစ်ခုလုံးတွင် နည်းပညာကို အသုံးပြုပြီး လုံခြုံရေး၊ အဆင်ပြေမှုနှင့် လူတိုင်းပါဝင်နိုင်မှုကို မြှင့်တင်ရန် ရည်ရွယ်သည့် ပိုမိုကျယ်ပြန့်သော ကြိုးပမ်းမှု၏ တစ်စိတ်တစ်ပိုင်း ဖြစ်ကြောင်း ပြောကြားခဲ့သည်။