---

ပြီးခဲ့သည့်လအတွင်း တောမီးငြိမ်းသတ်ရေးလုပ်ငန်းများ ဆောင်ရွက်နေစဉ် တောင်ကိုရီးယား စစ်ရဟတ်ယာဉ်တစ်စင်းသည် စစ်မဲ့ဇုန် (DMZ) အတွင်း မတော်တဆ ဝင်ရောက်ခဲ့ကြောင်း တောင်ကိုရီးယား ပူးတွဲစစ်ဦးစီးချုပ်ရုံး (JCS) က တနင်္ဂနွေနေ့တွင် ပြောကြားခဲ့သည်။ အဆိုပါဖြစ်ရပ်မှာ မတ်လ ၂၃ ရက်က ဖြစ်ပွားခဲ့ပြီး လုံခြုံရေးဆိုင်ရာ စိုးရိမ်မှုများကြောင့် အသေးစိတ်အချက်အလက်များကို စစ်တပ်က ထုတ်ဖော်ပြောကြားခြင်း မရှိခဲ့ပေ။

JCS ၏ အဆိုအရ Army Surion အမျိုးအစား ရဟတ်ယာဉ်သည် ဆိုးလ်မြို့၏ မြောက်ဘက် ၆၀ ကီလိုမီတာခန့်အကွာရှိ နယ်စပ်ခရိုင် Yeoncheon တွင် တောမီးငြိမ်းသတ်ရန် စေလွှတ်ခံရပြီးနောက် DMZ အတွင်းရှိ သတ်မှတ်ထားသော buffer zone ထဲသို့ မတော်တဆ ဝင်ရောက်ခဲ့ခြင်းဖြစ်သည်။ ထိုအချိန်တွင် DMZ အတွင်း လုပ်ငန်းဆောင်ရွက်မှုများကို ကြီးကြပ်နေသည့် ကုလသမဂ္ဂကွပ်ကဲရေးအဖွဲ့ (UNC) ထံမှ တောင်ကိုရီးယားဘက်က DMZ ထဲ ဝင်ရောက်ရန် ခွင့်ပြုချက် မရရှိထားကြောင်းလည်း သိရသည်။

ရဟတ်ယာဉ်သည် အကျယ် ၄ ကီလိုမီတာရှိသည့် no-man’s land ကို ပိုင်းခြားထားသော Military Demarcation Line အနီးသို့ ပျံသန်းခဲ့သဖြင့် တောင်ကိုရီးယား စစ်တပ်နှင့် UNC တို့က နယ်စပ်မျဉ်းကို ကျော်လွန်သွားခဲ့ခြင်း ရှိမရှိ စုံစမ်းစစ်ဆေးနေသည်။ ဖြစ်ရပ်အချိန်တွင် မြောက်ကိုရီးယားဘက်က ထူးခြားသည့် တုံ့ပြန်မှု မရှိခဲ့ဘဲ၊ အဆိုပါပြည်တွင်းထုတ် ရဟတ်ယာဉ်တွင် လက်နက်များလည်း တင်ဆောင်ထားခြင်း မရှိကြောင်း ဆိုသည်။ DMZ သည် ၁၉၅၀-၅၃ ကိုရီးယားစစ်ပွဲအပြီး ငြိမ်းချမ်းရေးစာချုပ် မချုပ်ဆိုနိုင်ဘဲ အပစ်အခတ်ရပ်စဲရေးဖြင့်သာ ရပ်ထားရသည့် သမိုင်းအမွေအနှစ်တစ်ခု ဖြစ်သည်။