စွမ်းအင်ထောက်ပံ့ရေး ဆက်ဆံမှု ခိုင်မာရေး ကိုရီးယားနှင့် ယူအေအီး ဆွေးနွေး
ကမ္ဘာ့လောင်စာဈေးကွက်နှင့် ထောက်ပံ့ရေးကွင်းဆက်ဆိုင်ရာ မရေရာမှုများ တိုးလာနေချိန်တွင် ကိုရီးယားနှင့် အာရပ်စော်ဘွားများ ပြည်ထောင်စု (UAE) တို့က ရေနံသိုလှောင်မှုနှင့် နျူကလီးယားစွမ်းအင် စီမံကိန်းများအပါအဝင် စွမ်းအင်ကဏ္ဍဆိုင်ရာ မဟာဗျူဟာပူးပေါင်းဆောင်ရွက်မှုများကို ဆွေးနွေးခဲ့ကြောင်း ကိုရီးယား စက်မှုဝန်ကြီးဌာနက အင်္ဂါနေ့တွင် ပြောကြားသည်။
စက်မှုဝန်ကြီး ကင်ယောင်-ဂွမ် (Kim Jung-kwan) သည် အဘူဒါဘီ အမျိုးသားရေနံကုမ္ပဏီ၏ upstream အမှုဆောင်အရာရှိချုပ် မူဆဘဘေ အယ်လ် ကိုင်ဘီ (Musabbeh Al Kaabi) နှင့် တွေ့ဆုံကာ ရေနံစိမ်းကို တည်ငြိမ်စွာ ထောက်ပံ့နိုင်ရေးအတွက် ဆွေးနွေးခဲ့သည်။ မတ်လအတွင်း UAE နှင့် ရရှိထားသည့် သဘောတူညီချက်အရ ရေနံစိမ်း ဘာရယ် ၂၄ သန်း တင်သွင်းရေး အစီအစဉ်များလည်း ချောမွေ့စွာ ဆက်လက်ဆောင်ရွက်နေကြောင်း ကိုရီးယားဘက်သို့ အသိပေးခဲ့သည်။
နှစ်ဖက်သည် ဟော်မုဇ်ရေလက်ကြား (Strait of Hormuz) ကို ရှောင်ကွင်းနိုင်မည့် လမ်းကြောင်းအသစ် ထူထောင်ရေးအပါအဝင် ကြီးမားသည့် အခြေခံအဆောက်အအုံ စီမံကိန်းများမှတစ်ဆင့် နှစ်နိုင်ငံ စွမ်းအင်ပူးပေါင်းဆောင်ရွက်မှုကို အားဖြည့်နိုင်မည့် နည်းလမ်းများကိုလည်း ဆွေးနွေးခဲ့ကြသည်။ ထို့ပြင် ကင်ဝန်ကြီးက UAE အတွင်း စွမ်းအင်စီမံကိန်းများတွင် ပါဝင်လိုသည့် ယှဉ်ပြိုင်နိုင်စွမ်းရှိသော ကိုရီးယားကုမ္ပဏီများအတွက် ထောက်ခံကူညီမှုနှင့် အာရုံစိုက်ပေးရန်လည်း တောင်းဆိုခဲ့သည်။
ကင်ဝန်ကြီးသည် UAE စွမ်းအင်ဝန်ကြီးဌာနမှ စွမ်းအင်ရေးရာ အမြဲတမ်းအတွင်းဝန် ရှာရစ်ဖ် ဆလင် အယ်လ် အိုလာမာ (Sharif Salim Al Olama) နှင့်လည်း တွေ့ဆုံပြီး တတိယနိုင်ငံများတွင် ပူးတွဲ နျူကလီးယားစွမ်းအင် စီမံကိန်းများ ဆောင်ရွက်နိုင်မည့် နည်းလမ်းများကို ဆွေးနွေးခဲ့သည်။ “အရှေ့အလယ်ပိုင်းဒေသတွင်း ပထဝီနိုင်ငံရေး မရေရာမှုများ ရှိနေသော်လည်း UAE သည် ကိုရီးယား၏ သယံဇာတနှင့် စွမ်းအင်ထောက်ပံ့ရေးကွင်းဆက်ကို ပံ့ပိုးနေသည့် အရေးကြီးသော မိတ်ဖက်နိုင်ငံဖြစ်သည်” ဟု ကင်က ထုတ်ပြန်ချက်တွင် ပြောသည်။
“ဤခရီးစဉ်က နှစ်နိုင်ငံ ရေနံစိမ်းထောက်ပံ့ရေး ဆက်ဆံမှုသည် ကုန်သွယ်ရေးသဘောတရားကို ကျော်လွန်ပြီး အရေးပေါ်အခြေအနေများတွင်ပါ လည်ပတ်နိုင်သည့် မဟာဗျူဟာမိတ်ဖက်ဆက်ဆံရေးတစ်ရပ် ဖြစ်ကြောင်း အတည်ပြုခဲ့သည်” ဟုလည်း ကင်က ထပ်လောင်းပြောကြားခဲ့သည်။ ကင်ဝန်ကြီးသည် စွမ်းအင်ကဏ္ဍတွင် ထောက်ပံ့ရေး အနှောင့်အယှက်များ ဖြစ်ပေါ်နေချိန် အရှေ့အလယ်ပိုင်းဒေသ၌ မိတ်ဖက်ဆက်ဆံမှုများ တိုးချဲ့ရန် ရည်ရွယ်၍ ဆော်ဒီအာရေးဗီးယားနှင့် ကာတာတို့ကိုလည်း လှည့်လည်မည့် နိုင်ငံ ၃ နိုင်ငံ ခရီးစဉ်အတွင်း ရှိနေသည်။ အာရှ၏ စီးပွားရေးအင်အားကြီး ၄ နိုင်ငံမြောက်ဖြစ်သည့် ကိုရီးယားသည် ၎င်း၏ စွမ်းအင်လိုအပ်ချက်အတွက် တင်သွင်းမှုအပေါ် အလွန်အမင်း မှီခိုနေရသည်။