---

ကိုရီးယားနိုင်ငံ ယဉ်ကျေးမှု၊ အားကစားနှင့် ခရီးသွားလုပ်ငန်းဝန်ကြီးဌာနနှင့် Korea Tourism Organization (KTO) တို့က ၂၀၂၆ ခုနှစ်အတွက် “Spring for Travel” ကမ်ပိန်းကို စတင်လိုက်ပြီး ဧပြီ ၁ ရက်မှ မေ ၃၁ ရက်အထိ လေယာဉ်လက်မှတ်၊ ရထားခရီးစဉ်၊ တည်းခိုစရိတ်နှင့် ခရီးသွားအတွေ့အကြုံဆိုင်ရာ အထူးလျော့ဈေးများကို ပေးအပ်ထားသည်။

ရထားခရီးစဉ်အပိုင်းတွင် KORAIL က လူဦးရေကျဆင်းနေသည့် ဒေသ ၄၂ ခုသို့ သွားမည့် ခရီးစဉ်များအတွက် ဧပြီ ၁ ရက်မှ မေ ၃၁ ရက်အတွင်း ကြိုတင်ဘွတ်ကင်လုပ်ထားသူများကို ခရီးစရိတ်၏ ၁၀၀ ရာခိုင်နှုန်းကို အမှတ်ပြန်အမ်းပေးမည်ဖြစ်သည်။ ခရီးသွားများအနေဖြင့် QR code သို့မဟုတ် digital tourism resident card ဖြင့် ဒေသအတွင်း ဝင်ရောက်ခဲ့ကြောင်း အတည်ပြုပြီးနောက် အနည်းဆုံး အသွားအပြန် ရထားစရိတ်နှင့်ညီမျှသည့် ကူပွန်ကို ရရှိနိုင်မည်ဖြစ်သည်။ ဥပမာအနေဖြင့် ဆိုးလ်မြို့ Cheongnyangni ဘူတာမှ Andong သို့ လူဦးရေကျဆင်းဒေသ ခရီးသွားပက်ကေ့ချ်ဖြင့် သွားပါက အသွားအပြန် ၅၅,၄၀၀ ဝမ် (အမေရိကန်ဒေါ်လာ ၃၆.၅ ခန့်) ကုန်ကျမည့် စရိတ်ကို နောက်တစ်ကြိမ်ရထားခရီးတွင် ၅၅,၄၀၀ ဝမ် လျော့ဈေးအဖြစ် ပြန်လည်အသုံးပြုနိုင်မည်ဖြစ်သည်။

ခရီးသွားရထားများလည်း လျော့ဈေးအစီအစဉ်တွင် ပါဝင်ပြီး East Santa Train (Gangneung-Buncheon), V-Train (Yeongju-Cheolam), G-Train (Yongsan-Iksan), S-Train (Seoul-Yeosu, Busan-Mokpo) နှင့် A-Train (Cheongnyangni-Mindungsan) တို့ကို ၅၀ ရာခိုင်နှုန်း လျော့ဈေးဖြင့် ရောင်းချမည်ဖြစ်သည်။ ၃ ရက် သို့မဟုတ် ၅ ရက်အတွင်း အကန့်အသတ်မရှိ စီးနိုင်သည့် “Naeilro Pass” ကိုလည်း ၂၀,၀၀၀ ဝမ် လျော့ဈေးဖြင့် ရရှိနိုင်မည်ဖြစ်ပြီး ယင်းရထားလျော့ဈေးအစီအစဉ်များကို ခရီးသွား ၉၀,၀၀၀ ဦးအထိသာ ခွင့်ပြုထားသည်။ လက်မှတ်များကို KORAIL ဝက်ဘ်ဆိုက်၊ အက်ပ် သို့မဟုတ် နိုင်ငံတစ်ဝန်း ဘူတာရုံလက်မှတ်ကောင်တာများမှ ဝယ်ယူနိုင်သည်။

လေယာဉ်ခရီးစဉ်နှင့် တည်းခိုစရိတ်ပိုင်းတွင်လည်း အကျိုးခံစားခွင့်များ ထည့်သွင်းထားသည်။ Naver Flight မှတစ်ဆင့် ပြည်တွင်း သွား-ပြန်လေယာဉ်လက်မှတ်များကို ဝယ်ယူသည့် ခရီးသွားများအနက် သတ်မှတ်ချက်များနှင့် မလွဲလွဲသောသူများအနေဖြင့် လူတစ်ဦးလျှင် Naver Pay points ၅,၀၀၀ ဝမ်တန်ဖိုး၊ လူ ၄ ဦးအထိဆိုပါက အများဆုံး ၂၀,၀၀၀ ဝမ်တန်ဖိုး ရရှိနိုင်မည်ဖြစ်ပြီး စုစုပေါင်း ၇၀,၀၀၀ ဦးအထိ အကျိုးခံစားခွင့် ရရှိမည်ဖြစ်သည်။

တည်းခိုစရိတ်လျော့ဈေးများကိုလည်း ဆိုးလ်၊ အင်ချွန်းနှင့် ဂျောင်ဂီဒေသအပြင်ဘက် ခရီးစဉ်များကို တွန်းအားပေးရန် ရည်ရွယ်ထားသည်။ တည်းခိုခ ၇၀,၀၀၀ ဝမ်နှင့်အထက်ရှိပါက ၃၀,၀၀၀ ဝမ် လျော့ဈေး၊ ၇၀,၀၀၀ ဝမ်အောက်ဆိုပါက ၂၀,၀၀၀ ဝမ် လျော့ဈေး ရရှိမည်ဖြစ်ပြီး ၂ ည ၃ ရက် အတွက် ၁၄၀,၀၀၀ ဝမ်နှင့်အထက်ရှိပါက ၇၀,၀၀၀ ဝမ်၊ ထိုထက်နည်းပါက ၅၀,၀၀၀ ဝမ် လျော့ဈေး ရရှိမည်ဖြစ်သည်။ ကူပွန်များကို ဧပြီ ၈ ရက် နံနက် ၁၀ နာရီမှစ၍ 2026 Korea Accommodation Sale Festa ဝက်ဘ်ဆိုက်နှင့် အွန်လိုင်းခရီးသွားကုမ္ပဏီများမှ first-come, first-served စနစ်ဖြင့် ဖြန့်ဝေမည်ဖြစ်ပြီး လူတစ်ဦးလျှင် ကူပွန်တစ်ခုသာ ရရှိနိုင်ကာ ဧပြီ ၃၀ ရက်အထိ အသုံးပြုနိုင်သည်။

ထို့အပြင် Yeongwol, Jecheon, Gochang, Gangjin, Haenam နှင့် Hadong အပါအဝင် ဒေသ ၁၆ ခုသို့ သွားရောက်သူများသည် ခရီးစရိတ်၏ ၅၀ ရာခိုင်နှုန်းကို မိုဘိုင်းဒေသတွင်းလက်ဆောင်ကူပွန်အဖြစ် ပြန်လည်ရရှိနိုင်သည်။ တစ်ဦးတည်းခရီးသွားသူများအတွက် အများဆုံး ၁၀၀,၀၀၀ ဝမ်၊ လူ ၂ ဦးနှင့်အထက် အုပ်စုများအတွက် အများဆုံး ၂၀၀,၀၀၀ ဝမ်အထိ ပြန်လည်ရရှိနိုင်ပြီး ဒေသအတွက် ခရီးသွားအစီအစဉ်တင်ပြကာ ဒေသအစိုးရ၏ အတည်ပြုချက်ရယူပြီးနောက် ခရီးစရိတ်အထောက်အထားများ တင်သွင်းရမည်ဖြစ်သည်။

ခရီးသွားအမျိုးအစားအလိုက် အထူးအစီအစဉ်များလည်း ရှိနေသည်။ Gmarket နှင့် LotteON ၏ အထူးပရိုမိုးရှင်းစာမျက်နှာများတွင် ရောင်းချသည့် ပြည်တွင်းခရီးသွားပရိုဒက်များကို ၄၀ ရာခိုင်နှုန်းအထိ လျော့ဈေးပေးမည်ဖြစ်ပြီး အများဆုံး လျော့ဈေးမှာ ၅၀,၀၀၀ ဝမ် ဖြစ်သည်။ Influencer များ ဦးဆောင်သည့် “5 People, 5 Colors of Taste Travel” အစီအစဉ်တွင် နွေဦးရာသီစားသောက်ဖွယ်ရာ၊ တစ်ဦးတည်းခရီးသွားခြင်း၊ ပြေးလွှားခြင်း၊ ဓာတ်ပုံရိုက်ကူးခြင်း၊ စာဖတ်ခြင်းနှင့် လက်ရေးလေ့ကျင့်ခြင်း စသည့် အကြောင်းအရာ ၅ ခုအခြေပြု ခရီးသွားပရိုဒက် ၂၅ မျိုးကို တင်ဆက်မည်ဖြစ်ပြီး လူ ၁,၀၀၀ ဦးအတွက် အထူးခရီးသွားအတွေ့အကြုံ ပေးအပ်မည်ဖြစ်သည်။

Gangwon ပြည်နယ် Yeongwol ဒေသတွင်လည်း ဖျက်သိမ်းခံခဲ့ရသည့် King Danjong ၏ နယ်နှင်ခံနေရာဖြစ်ပြီး ယခုအခါ “The King’s Warden” ရုပ်ရှင်၏ လူကြိုက်များမှုကြောင့် အာရုံစိုက်ခံနေရသဖြင့် Cheongnyeongpo အပါအဝင် အဓိက ခရီးသွားနေရာများသို့ ဝင်ကြေး ၅၀ ရာခိုင်နှုန်းအထိ လျော့ဈေးပေးထားသည်။ စိတ်အပန်းဖြေလိုသူများအတွက်တော့ Korea Buddhism ၏ Cultural Corps က မေလအတွင်း temple stay စရိတ်ကို ၅၀ ရာခိုင်နှုန်း လျော့ချမည်ဖြစ်သည်။ အသေးစိတ်အချက်အလက်များကို Visit Korea ဝက်ဘ်ဆိုက်တွင် ကြည့်ရှုနိုင်သည်။