ကိုရီးယားနှင့် တရုတ် လေကြောင်းခရီးစဉ်များ တစ်ပတ်လျှင် ၇၀ ခု ထပ်တိုးရန် သဘောတူ
ကိုရီးယားနှင့် တရုတ်နိုင်ငံတို့အကြား ဆက်ဆံရေး ပြန်လည်တက်ကြွလာနေချိန်တွင် နှစ်နိုင်ငံအပြန်အလှန် လေကြောင်းခရီးစဉ်များကို တစ်ပတ်လျှင် ၇၀ ခု ထပ်တိုးရန် သဘောတူခဲ့ကြောင်း ကိုရီးယား သယ်ယူပို့ဆောင်ရေးဝန်ကြီးဌာနက ကြာသပတေးနေ့တွင် ပြောကြားသည်။
ပြီးခဲ့သည့်လက ဆိုးလ်မြို့တွင် ကျင်းပခဲ့သော ကိုရီးယား-တရုတ် လေကြောင်းညှိနှိုင်းဆွေးနွေးပွဲ၌ ၂၀၁၉ ခုနှစ်နောက်ပိုင်း ပထမဆုံးအကြိမ်အဖြစ် နှစ်နိုင်ငံကြား လေကြောင်းသွားလာခွင့်ကို တစ်ပတ်လျှင် ၇၀ ခု ထပ်မံတိုးချဲ့ရန် သဘောတူညီခဲ့ကြကြောင်း ဝန်ကြီးဌာနက ဆိုသည်။ ထိုသဘောတူညီချက်အရ ခရီးသည်တင်လေကြောင်းခရီးစဉ်များကို တစ်ပတ်လျှင် ၆၆၄ ခုအထိ တိုးမြှင့်မည်ဖြစ်ပြီး ကုန်စည်တင်လေကြောင်းခရီးစဉ်များကိုလည်း တစ်ပတ်လျှင် ၆၈ ခုအထိ တိုးချဲ့မည်ဖြစ်ကြောင်း ထပ်မံရှင်းလင်းသည်။
ဝန်ကြီးဌာန၏ စာရင်းများအရ ကိုရီးယားမှ တရုတ်သို့ သွားလာသည့် ခရီးသည်အရေအတွက်မှာ COVID-19 မတိုင်မီအဆင့်ကို ကျော်လွန်ကာ ပြန်လည်မြင့်တက်လာပြီး ယခုနှစ် ပထမသုံးလပတ်အတွင်း ထိုလမ်းကြောင်းကို အသုံးပြုသူ ၄.၄ သန်းနီးပါး ရှိခဲ့သည်။ ထို့ပြင် သယ်ယူပို့ဆောင်ရေးဝန်ကြီးဌာနသည် အသစ်ရရှိထားသည့် နိုင်ငံတကာလေကြောင်းသွားလာခွင့်များကို ပြည်တွင်းလေကြောင်းလိုင်းများသို့ ယခုနှစ် ဒုတိယနှစ်ဝက်အတွင်း အစောဆုံး ခွဲဝေပေးရန် စီစဉ်နေကြောင်းလည်း သိရသည်။