---

ဆွစ်ဇာလန်နိုင်ငံတွင် ကျင်းပသည့် အမေရိကန်-အီရန် ငြိမ်းချမ်းရေးဆွေးနွေးပွဲအတွက် သတ်မှတ်ထားသော လေယာဉ်ပျံသန်းခွင့်ပိတ်နယ်မြေကြောင့် ဇူးရစ်လေဆိပ်၏ လေကြောင်းထိန်းချုပ်စနစ်၌ နည်းပညာချို့ယွင်းမှု ဖြစ်ပေါ်ခဲ့ပြီး လေယာဉ်ခရီးစဉ်အများအပြား နှောင့်နှေး၊ ဖျက်သိမ်းခံခဲ့ရကြောင်း အာဏာပိုင်များက ပြောကြားသည်။ နောက်ပိုင်းတွင် အဆိုပါပြဿနာကို ဖြေရှင်းပြီး စနစ်မှာ ပုံမှန်အတိုင်း ပြန်လည်လည်ပတ်နေပြီဟုလည်း ဆိုသည်။

ဆွစ်ဇာလန် လေကြောင်းထိန်းချုပ်ရေးဌာန Skyguide ၏ ထုတ်ပြန်ချက်အရ ဗျူလ်ဂန်စတော့ခ် (Buergenstock) တောင်ပေါ် ခရီးသွားအပန်းဖြေဒေသတွင် ဆွေးနွေးပွဲ ကျင်းပသည့်နေရာအပေါ် “restricted zone” တစ်ခုကို ရေဒါပြသစနစ်များအတွင်း ထည့်သွင်းလိုက်ပြီးနောက် အဆိုပါ ချို့ယွင်းမှု ပေါ်ပေါက်ခဲ့ခြင်းဖြစ်သည်။ ဆွေးနွေးပွဲနောက်ဆုံးအဆင့်ကို စနေနေ့မှသာ အတည်ပြုနိုင်ခဲ့သဖြင့် ထိုဇုန်ကို နောက်ဆုံးမိနစ်တွင်မှ သတ်မှတ်ခဲ့ရကြောင်းလည်း ဖော်ပြထားသည်။ Skyguide က “စနစ်များ ချောမွေ့စွာ လည်ပတ်နေပြီဖြစ်ပြီး လုံခြုံရေးကို အချိန်ပြည့် အာမခံထားနိုင်ခဲ့သည်” ဟု ပြောကြားခဲ့သည်။

Reuters သို့ လေဆိပ်ပြောရေးဆိုခွင့်ရှိသူက နေ့လယ်ပိုင်းအထိ ရောက်ရှိမည့် လေယာဉ် 12 စင်းနှင့် ထွက်ခွာမည့် လေယာဉ် 14 စင်း ဖျက်သိမ်းခဲ့ရပြီး အနည်းဆုံး ထွက်ခွာမည့် လေယာဉ် 60 စင်း နှောင့်နှေးခဲ့ကြောင်း ပြောသည်။ အမေရိကန်ဒုတိယသမ္မတ JD Vance သည် တနင်္ဂနွေနေ့က ဗျူလ်ဂန်စတော့ခ်သို့ ရောက်ရှိလာပြီး အီရန်နှင့် ငြိမ်းချမ်းရေးဆွေးနွေးပွဲများ တက်ရောက်ခဲ့သည်။ သို့သော် အီရန်က ဟော်မုဇ်ရေလက်ကြား (Strait of Hormuz) ကို ပြန်လည်ပိတ်ဆို့ထားကြောင်း ကြေညာလိုက်ခြင်းက ဆွေးနွေးပွဲအကြောင်းအရာများကို လွှမ်းမိုးသွားခဲ့သည်။ ဆွစ်ဇာလန်ဘက်ကလည်း ဇူးရစ်လေဆိပ်မှ လေကြောင်း တိုက်ရိုက်အကွာအဝေး 50 ကီလိုမီတာကျော်သာရှိသည့် ထိုအပန်းဖြေဒေသတွင် “သီးသန့်လျှို့ဝှက်ပြီး ယုံကြည်စိတ်ချရသော ပတ်ဝန်းကျင်” တစ်ခုကို ဆွေးနွေးပွဲအတွက် စီစဉ်ပေးထားကြောင်း ဆိုသည်။