---

ကမ္ဘာ့ဖလားပြိုင်ပွဲအတွက် ပြင်ဆင်သည့် ခြေစမ်းပွဲတွင် သြစတြီးယားကို ၁-၀ ဂိုးဖြင့် ရှုံးနိမ့်ခဲ့သော်လည်း တောင်ကိုရီးယားအသင်းနည်းပြ ဟောင်မြောင်ဘိုက အသင်း၏ တိုးတက်လာမှုနှင့် အထူးသဖြင့် ခံစစ်ပိုင်းအားထုတ်မှုကို အပြုသဘောဆန်စွာ သုံးသပ်ခဲ့သည်။

မတ် ၃၁ ရက်က ဗီယင်နာမြို့ Ernst-Happel-Stadion ကွင်းတွင် ယှဉ်ပြိုင်ခဲ့သည့် အဆိုပါ ခြေစမ်းပွဲ၌ တောင်ကိုရီးယားသည် သြစတြီးယားကို ၁-၀ ဂိုးဖြင့် ရှုံးနိမ့်ကာ ဥရောပခရီးစဉ်ကို ၂ ပွဲဆက် ရှုံးနိမ့်မှုဖြင့် အဆုံးသတ်ခဲ့သည်။ ယင်းမတိုင်မီ စနေနေ့ကလည်း လန်ဒန်မြို့အနီးတွင် အိုင်ဗရီကို့စ်ကို ၄-၀ ဂိုးဖြင့် အရေးနိမ့်ထားသည်။

ဟောင်မြောင်ဘိုက “အရည်အသွေးမြင့်တဲ့ ပြိုင်ဘက်နဲ့ ယှဉ်ပြိုင်ရာမှာ အသင်းက ကောင်းမွန်တဲ့ ပွဲတစ်ပွဲကို ကစားနိုင်ခဲ့ပါတယ်” ဟု ပြောပြီး ရက်အနည်းငယ်အလိုက အကြီးအကျယ် ရှုံးနိမ့်ခဲ့သည့် ပွဲမှ ပြန်လည်တုံ့ပြန်နိုင်ခဲ့ခြင်းကိုလည်း ချီးကျူးခဲ့သည်။ “ဂိုးပေးလိုက်ရတဲ့ ပုံစံက စိတ်ပျက်စရာကောင်းပေမယ့် ခြေစမ်းပွဲဆိုတာ အားနည်းချက်တွေကို ရှာဖွေဖော်ထုတ်ဖို့ပါပဲ။ ကမ္ဘာ့ဖလားအတွက် ပြင်ဆင်ရာမှာ အဲဒီအားနည်းချက်တွေကို ပြင်ဆင်သွားမယ်” ဟု ပွဲအပြီး သတင်းစာရှင်းလင်းပွဲတွင် ပြောသည်။

၎င်းက ၃-နောက်ခံလူ စနစ်ကို ဆက်လက်အသုံးပြုနေခြင်းကိုလည်း ကာကွယ်ပြောဆိုခဲ့ပြီး နောက်ခံလူ ၃ ဦးနှင့် တောင်ပံကစားသမား ၂ ဦး ပါဝင်သည့် ဤပုံစံသည် တိုက်စစ်အခွင့်အရေးများတွင် ရှေ့တက်နိုင်သကဲ့သို့ ပြိုင်ဘက်ဘောလုံးရချိန်တွင် နောက်ပြန်ဆင်းကာ ၅-နောက်ခံလူပုံစံဖြင့် ခံစစ်တင်းကျပ်စေနိုင်ကြောင်း ရှင်းပြခဲ့သည်။ ဟောင်မြောင်ဘို မတိုင်မီ ၂၀၂၄ ခုနှစ်အထိ တောင်ကိုရီးယားအသင်းသည် ၄-နောက်ခံလူ စနစ်ကိုသာ အဓိက အသုံးပြုခဲ့သည်။

“ကျွန်တော်တို့ ကစားသမားတွေဟာ ၄-နောက်ခံလူစနစ်နဲ့ ကြာရှည် ကစားလာခဲ့တာ မှန်ပေမယ့် ကမ္ဘာ့ဖလားကို နည်းဗျူဟာတစ်ခုတည်းနဲ့ သွားလို့မရဘူးဆိုတာ အားလုံး သိပါတယ်။ လမ်းကြောင်းတလျှောက် အခက်အခဲတွေ ရှိနိုင်ပေမယ့် ၃-နောက်ခံလူစနစ်အပေါ် ကစားသမားတွေရဲ့ ယုံကြည်မှု တိုးလာအောင် လုပ်ဖို့ အရေးကြီးပါတယ်။ ဒီနေ့ပွဲမှာ အဲဒီအပိုင်းကောင်းခဲ့တယ်လို့ ထင်ပါတယ်” ဟု ၎င်းက ဆိုသည်။

“ပွဲတစ်ပွဲအတွင်းမှာ ၄-နောက်ခံလူနဲ့ ၅-နောက်ခံလူပုံစံကို အဆက်မပြတ် ပြောင်းနိုင်ရပါမယ်။ ကစားသမားတွေက အဲဒီအယူအဆကို နားလည်ဖို့ လိုပြီး ဒီနေ့ သူတို့ကောင်းကောင်း ပြသနိုင်ခဲ့တယ်” ဟုလည်း ဟောင်မြောင်ဘိုက ထပ်လောင်း ပြောကြားသည်။

ထို့ပြင် ကင်မင်ဂျေအား လီဟန်ဘွန်းနှင့် ကင်ဂျူဆွန်းတို့က ဝန်းရံထားသည့် အလယ်နောက်ခံလူ ၃ ဦးသည် နည်းစနစ်တကျ စီစဉ်ထားသည့် သြစတြီးယားအသင်း၏ တိုက်စစ်ကို ပိုမိုတက်ကြွစွာ ကာကွယ်နိုင်ခဲ့သလို ကိုယ်ပိုင်ဧရိယာအတွင်း အကွက်ယူကာ ကာကွယ်မှုလည်း ပိုမိုကောင်းမွန်ခဲ့ကြောင်း ၎င်းက သုံးသပ်ခဲ့သည်။

“အသင်းအတွက် တိုးတက်မှုတွေအများကြီး တွေ့ရသလို ပြင်ဆင်ရမယ့် ပြဿနာတွေလည်း တွေ့ခဲ့ရပါတယ်။ မေလမှာ ကလပ်အသင်းတွေမှာ ကစားသမားတွေရဲ့ လက်ရှိပုံစံကိုလည်း အနီးကပ် စောင့်ကြည့်သွားမယ်။ ဒီခရီးစဉ်အတွင်း လိဂ်ပြိုင်ပွဲတွေမှာ ကောင်းကောင်းကစားနိုင်သူတွေဟာ နိုင်ငံအသင်းအတွက်လည်း အဲဒီစွမ်းဆောင်ရည်ကို ယူဆောင်လာနိုင်တယ်ဆိုတာ ထပ်မံအတည်ပြုနိုင်ခဲ့ပါတယ်” ဟု ဟောင်မြောင်ဘိုက ဆိုသည်။