---

အသေးစားနှင့် အလတ်စားလုပ်ငန်းများ (SMEs) တွင် အလုပ်လုပ်နေသည့် လူငယ်ဝန်ထမ်းများအတွက် ဝင်ငွေခွန် လျှော့ပေါ့မှု အစီအစဉ်ကို ကိုရီးယားအစိုးရက ပြန်လည်သုံးသပ်မည်ဖြစ်ကြောင်း ဘဏ္ဍာရေးဝန်ကြီး Koo Yun-cheol က ပြောကြားသည်။ ဒေသတွင်း စီးပွားရေးမြှင့်တင်ရေး အားထုတ်မှုများနှင့် ချိတ်ဆက်ကာ အခွန်မူဝါဒများကို လိုက်လျောညီထွေ ပြင်ဆင်ရန် ရည်ရွယ်ထားကြောင်းလည်း ၎င်းက ဆိုသည်။

ဇွန် ၁၇ ရက် အင်္ဂါနေ့က Gwangju မြို့တွင် သတင်းထောက်များနှင့် တွေ့ဆုံစဉ် ဝန်ကြီး Koo က “SMEs မှာ အလုပ်လုပ်နေတဲ့ ဝန်ထမ်းတွေအတွက် ဝင်ငွေခွန် လျှော့ချနှုန်းနဲ့ ခံစားခွင့်ကာလကို ကွဲပြားစွာ သတ်မှတ်နိုင်မလားဆိုတာ စိစစ်သွားမယ်” ဟု ပြောကြားခဲ့သည်။ “ဒေသအခြေပြု စီးပွားရေးတိုးတက်မှု ရရှိဖို့အတွက် အခွန်မူဝါဒတွေကနေ ဒေသတွေကို ဦးစားပေးပေးမယ့် နည်းလမ်းတွေကိုလည်း သုံးသပ်နေပါတယ်” ဟုလည်း ၎င်းက ရှင်းလင်းပြောဆိုသည်။

လက်ရှိတွင် ကိုရီးယားအစိုးရသည် SMEs တွင် အလုပ်လုပ်သည့် လူငယ်ဝန်ထမ်းများကို ၅ နှစ်တာအတွက် ဝင်ငွေခွန် ၉၀ ရာခိုင်နှုန်း လျှော့ပေါ့ခွင့် ပေးထားသည်။ ဝန်ကြီး Koo ၏ ပြောကြားချက်အရ ဆိုးလ်မြို့တော်နှင့် အနီးဝန်းကျင်ထက် ပိုဝေးသော ဒေသများရှိ ဝန်ထမ်းများအတွက် ထပ်တိုးအကျိုးခံစားခွင့်များ ပေးနိုင်ခြေ ရှိနေကြောင်း သိရသည်။ “ဆိုးလ်နဲ့ ဝေးလေလေ နေထိုင်မှုအခြေအနေ ပိုခက်ခဲလေလေ ဖြစ်တဲ့နေရာတွေမှာ အလုပ်လုပ်နေသူတွေကို ပိုမိုအကျိုးခံစားခွင့်ပေးဖို့၊ အဲဒီအကျိုးခံစားခွင့်တွေက ကုမ္ပဏီတွေမဟုတ်ဘဲ ဝန်ထမ်းတွေဆီ ရောက်ရှိစေဖို့ အဓိကထားပါတယ်” ဟု ၎င်းက ပြောသည်။

စီးပွားရေးအခြေအနေအပေါ် မှတ်ချက်ပေးရာတွင် ကမ္ဘာ့ရေနံစိမ်းဈေး ကျဆင်းလာခြင်းကို “ကောင်းမွန်သည့် အချက်” ဟု Koo က ပြောကြားခဲ့သည်။ သို့သော် အခြေအနေ ပြည့်စုံစွာ သက်သာစေရန်မှာ Hormuz ရေလက်ကြားကို လုံးဝပြန်ဖွင့်ရန် လိုအပ်ပြီး အမေရိကန်နှင့် အီရန်တို့ သဘောတူညီချက် လက်မှတ်ရေးထိုးရမည်ဟု ဆိုသည်။ ထို့နောက်တွင်လည်း အချိန်တစ်ရပ်ကြာ အခြေအနေကို စောင့်ကြည့်ရမည်ဖြစ်ကြောင်း ၎င်းက ထပ်လောင်း ပြောကြားသည်။

လက်ရှိ အကျိုးခံစားခွင့်အဖြစ် သတ်မှတ်ထားသည့် လောင်စာဆီအခွန် လျှော့ချမှုအစီအစဉ်ကို ဆက်လက်တိုးမြှင့်မည်လား သို့မဟုတ် ရုပ်သိမ်းမည်လားဆိုသည်ကို စျေးနှုန်းအခြေအနေများကို အနီးကပ် စောင့်ကြည့်ပြီးမှ ဆုံးဖြတ်မည်ဖြစ်ကြောင်း ဘဏ္ဍာရေးဝန်ကြီးက ဆိုသည်။ ထိုဆုံးဖြတ်ချက်ကို ကြာသပတေးနေ့တွင် ထုတ်ပြန်မည်ဟုလည်း ၎င်းက ပြောကြားခဲ့သည်။

AI နည်းပညာ ဖွံ့ဖြိုးမှုကြောင့် ချစ်ပ်ထုတ်လုပ်သူများထံမှ ရရှိလာနိုင်သည့် အပိုအခွန်ဝင်ငွေနှင့် ပတ်သက်၍လည်း ထိုဝင်ငွေများကို စီးပွားရေးမညီမျှမှု လျှော့ချရေးအတွက် အသုံးချသင့်ပြီး လူငယ်ဝန်ထမ်းများ၊ အသေးစားစီးပွားရေးလုပ်ငန်းရှင်များနှင့် ကိုယ်ပိုင်လုပ်ငန်းရှင်များကို ဦးစားပေးသင့်ကြောင်း Koo က ပြောသည်။ “ရွေးချယ်စရာ နည်းလမ်းတွေ အမျိုးမျိုးအတွက် ဖွင့်ထားပြီး လိုအပ်ရင် စိစစ်သွားမယ်” ဟုလည်း ၎င်းက ထပ်မံ ဖြည့်စွက် ပြောကြားခဲ့သည်။