ရွှေ့ပြောင်းနေထိုင်သူများအရေး ထောက်ခံသည့် မစ်ရှင်ဖြင့် ပုပ်ရဟန်းမင်း လီယို ကနေရီကျွန်းများသို့ သွားရောက်
ပုပ်ရဟန်းမင်း လီယို ၁၄ သည် စပိန်ခရီးစဉ်၏ နောက်ဆုံးအဆင့်အဖြစ် ကြာသပတေးနေ့တွင် ဘာစီလိုနာမှ ကနေရီကျွန်းများသို့ ထွက်ခွာခဲ့ပြီး၊ အန္တရာယ်ကြီးမားသည့် အတ္တလန္တိတ်ပင်လယ်ကို ဖြတ်ကျော်လာကြသည့် ရွှေ့ပြောင်းနေထိုင်သူများနှင့် တွေ့ဆုံရန် စီစဉ်ထားသည်။ ယင်းခရီးစဉ်အတွင်း ကမ္ဘာ့အသိုက်အဝန်းအနေဖြင့် ရွှေ့ပြောင်းနေထိုင်သူများကို ပိုမိုလူသားဆန်စွာ ဆက်ဆံရန်လည်း တိုက်တွန်းလျက်ရှိသည်။
အာဖရိကအနောက်ဘက်ကမ်းလွန်ရှိ စပိန်ပိုင် ကျွန်းစုသို့ သွားရောက်မည့် ယခုရပ်နားမှုသည် ပုပ်ရဟန်းမင်း၏ တစ်ပတ်ကြာ စပိန်ခရီးစဉ်အတွင်း အဓိကအပိုင်းတစ်ရပ်ဖြစ်ပြီး၊ ကမ္ဘာတစ်ဝန်း ပဋိပက္ခများ ပိုမိုပြင်းထန်လာမှုကြောင့် ကမ္ဘာကြီးသည် လေးနက်သည့် အကျပ်အတည်းတစ်ရပ်ကို ရင်ဆိုင်နေရကြောင်းလည်း ၎င်းက သတိပေးထားသည်။
ကနေရီကျွန်းများရှိ စပိန်ဒုက္ခသည်ကော်မရှင်၏ ညှိနှိုင်းရေးမှူး Juan Carlos Lorenzo က Reuters သို့ ပြောကြားရာတွင် ပုပ်ရဟန်းမင်း၏ လာရောက်မှုသည် “အရေးပါသော မှတ်တိုင်တစ်ခု” ဖြစ်ကြောင်း ပြောဆိုသည်။ “ဒါဟာ လူတိုင်းအတွက် မူလဇာစ်မြစ် မည်သို့ပင်ဖြစ်စေ လူ့အခွင့်အရေး၊ လေးစားမှုနဲ့ လူ့ဂုဏ်သိက္ခာကို ကာကွယ်ရမယ်ဆိုတဲ့ အတည်ပြုချက်တစ်ရပ် ဖြစ်လာပါလိမ့်မယ်” ဟု Lorenzo က ပြောသည်။
လီယို ၁၄ သည် အဓိကကျွန်းတစ်ခုဖြစ်သည့် Gran Canaria သို့ ဒေသစံတော်ချိန် နံနက် ၁၀:၅၀ ဝန်းကျင် (0950 GMT) တွင် ရောက်ရှိရန် စီစဉ်ထားသည်။ ရောက်ရှိပြီးနောက် မကြာသေးမီက ရောက်လာသည့် ရွှေ့ပြောင်းနေထိုင်သူများကို ကူညီနေသည့် အဖွဲ့အစည်းများနှင့် တွေ့ဆုံမည်ဖြစ်ပြီး၊ ပင်လယ်ပြင်တွင် အသက်ဆုံးရှုံးခဲ့ရသည့် ရွှေ့ပြောင်းနေထိုင်သူများအတွက် ရည်စူးထားသော အမှတ်တရနေရာ၌ ပန်းများချမည်ဖြစ်သည်။
Caminando Fronteras အဖွဲ့၏ အချက်အလက်များအရ ၂၀၂၅ ခုနှစ်အတွင်း ကနေရီကျွန်းများသို့ ရောက်ရှိရန် ကြိုးပမ်းရင်း လူ ၃,၀၀၀ ကျော် သေဆုံးခဲ့ကြောင်း သိရသည်။ ပြီးခဲ့သည့် လများအတွင်း ကမ္ဘာ့ခေါင်းဆောင်များ၏ ဦးတည်ချက်ကို ပြင်းပြင်းထန်ထန် ဝေဖန်ခဲ့သည့် လီယို ၁၄ သည် တနင်္လာနေ့က စပိန်ပါလီမန်တွင် ကမ္ဘာ့ရွှေ့ပြောင်းနေထိုင်သူများအတွက် အကူအညီ မလုံလောက်ခြင်းသည် “နိုင်ငံတကာစနစ်၏ ကျင့်ဝတ်အခြေခံကို စိန်ခေါ်နေသည်” ဟု ပြောကြားခဲ့သည်။
ဥရောပနိုင်ငံအများစုနှင့် နှိုင်းယှဉ်ပါက စပိန်က ရွှေ့ပြောင်းနေထိုင်သူများအပေါ် ပိုမိုဖွင့်လှစ်သည့် မူဝါဒကို ကျင့်သုံးလျက်ရှိပြီး၊ စာရွက်စာတမ်းမပြည့်စုံသည့် လူပေါင်း ၅ သိန်းကျော်ကို နေထိုင်ခွင့်ပေးရန် အစီအစဉ်တစ်ရပ်ကိုလည်း မိတ်ဆက်ထားသည်။ သို့သော် ယင်းအစီအစဉ်မှာ စပိန်ပြည်တွင်းနှင့် ဥရောပတစ်ဝန်း လက်ယာစွန်းခေါင်းဆောင်များ၏ ဝေဖန်မှုကို ရင်ဆိုင်နေရပြီး၊ တရားဝင်အခြေအနေမရသေးသည့် လူထောင်နှင့်ချီအတွက် လုပ်ငန်းစဉ်နှေးကွေးနေမှုကြောင့်လည်း စပိန်အစိုးရက ဖိအားတွေ့နေရသည်။