ယူကေ အထူးရွေးကောက်ပွဲကြောင့် အန်ဒီ ဘန်းဟမ် တက်လှမ်းမှု အရှိန်မြန်နိုင်၊ ကီယာ စတားမာ အနာဂတ် မရေရာ
ယူကေမြောက်ပိုင်း အင်္ဂလန်ရှိ မိတ်ကာဖီးလ်ဒ် မဲဆန္ဒနယ်တွင် ကျင်းပနေသည့် အထူးရွေးကောက်ပွဲသည် အုပ်ချုပ်နေသည့် လေဘာပါတီမှ အန်ဒီ ဘန်းဟမ်အတွက် နိုင်ငံရေးအဆင့်မြင့်တက်ရန် အခွင့်အရေးတစ်ရပ် ဖြစ်လာနိုင်သကဲ့သို့ ဝန်ကြီးချုပ် ကီယာ စတားမာအပေါ် ဖိအားများကိုလည်း ပိုမိုမြင့်တက်စေနိုင်ကြောင်း သတင်းရရှိသည်။ ဘန်းဟမ် အနိုင်ရပြီး မိတ်ကာဖီးလ်ဒ် အမတ်နေရာကို လေဘာပါတီအတွက် ပြန်လည်သိမ်းယူနိုင်ပါက ပါတီခေါင်းဆောင်ပိုင်းကို စိန်ခေါ်လာနိုင်သည့် အလားအလာမှာလည်း မြင့်မားနေသည်။
မိတ်ကာဖီးလ်ဒ် မဲဆန္ဒနယ်တွင် မဲပေးခွင့်ရှိသူ ၇၅,၀၀၀ ခန့် ရှိပြီး လန်ဒန်မြို့အနောက်မြောက်ဘက် ၂၀၀ မိုင် (၃၂၀ ကီလိုမီတာ) အကွာ၊ မန်ချက်စတာမြို့တော်ဒေသအနီးရှိ မြို့နှင့် ကျေးရွာပေါင်းများစွာကို လွှမ်းခြုံထားသည်။ မဲရုံများကို ည ၁၀ နာရီ (GMT 2100) တွင် ပိတ်မည်ဖြစ်ပြီး ရလဒ်များကို သောကြာမနက်ပိုင်းတွင် ထုတ်ပြန်မည်ဟု သိရသည်။ စစ်တမ်းများအရ အန်ဒီ ဘန်းဟမ်သည် လက်ရှိတွင် မန်ချက်စတာမြို့တော်ဝန်အဖြစ် တာဝန်ထမ်းဆောင်နေပြီး လေဘာပါတီ၏ အလားအလာရှိသည့် ခေါင်းဆောင်လောင်းအဖြစ် သတ်မှတ်ခံထားရသည်။
စတားမာသည် ၂၀၂၄ ခုနှစ် ဇူလိုင်လ ရွေးကောက်ပွဲတွင် လေဘာပါတီကို အပြတ်အသတ် အနိုင်ရအောင် ဦးဆောင်ခဲ့သော်လည်း နောက်ပိုင်းတွင် စီးပွားရေးတိုးတက်မှု မဖော်ဆောင်နိုင်ခြင်း၊ အများပြည်သူ ဝန်ဆောင်မှုများ ပြန်လည်တည်ဆောက်ရာတွင် အခက်အခဲများ ကြုံတွေ့နေရခြင်း၊ နေထိုင်စရိတ်မြင့်တက်မှုကို ထိရောက်စွာ မဖြေရှင်းနိုင်ခြင်းတို့ကြောင့် လူထုထောက်ခံမှု ကျဆင်းလာခဲ့သည်။ ထို့အပြင် Jeffrey Epstein နှင့် ပတ်သက်သည့် အရှုပ်တော်ပုံများဖြင့် နာမည်ဆိုးထွက်ခဲ့သူ ပီတာ မန်ဒယ်လ်ဆန်ကို အမေရိကန်ဆိုင်ရာ ယူကေ သံအမတ်အဖြစ် ခန့်အပ်ခဲ့သည့် ဆုံးဖြတ်ချက်ကလည်း စတားမာအပေါ် ဝေဖန်မှုများ ပိုမိုမြင့်တက်စေခဲ့သည်။ မေလ ဒေသန္တရရွေးကောက်ပွဲတွင် လေဘာပါတီ ရလဒ်မကောင်းခဲ့ပြီးနောက် ပါတီအမတ်အများအပြားက စတားမာ၏ နုတ်ထွက်မှုကို တောင်းဆိုခဲ့ကြသော်လည်း ၎င်းက ငြင်းဆိုထားဆဲဖြစ်သည်။
အစိုးရအဖွဲ့အတွင်းတွင်လည်း ဖိအားများ ရှိနေသည်။ ကျန်းမာရေးဝန်ကြီးဟောင်း ဝက်စ် စတရီးတင်းက မေလအတွင်း နုတ်ထွက်စဉ် “Vision လိုအပ်တဲ့နေရာမှာ လက်ရှိအခြေအနေက လေဟာနယ်တစ်ခုလို ဖြစ်နေတယ်” ဟု ပြောဆိုခဲ့သည်။ ထို့နောက် မိတ်ကာဖီးလ်ဒ် အမတ် ဂျော့ ရှေးမုန်းစ်က အထူးရွေးကောက်ပွဲ ဖြစ်လာစေရန် နုတ်ထွက်ခဲ့ပြီး ဘန်းဟမ်ကို ပါလီမန်သို့ ပြန်လည်ဝင်ရောက်နိုင်ရန် လမ်းဖွင့်ပေးခဲ့သည်။ ယူကေ ပါလီမန်စနစ်အရ အုပ်ချုပ်ပါတီသည် သက်တမ်းအတွင်း ခေါင်းဆောင်ကို ပြောင်းလဲနိုင်ပြီး အနိုင်ရသူက အထွေထွေရွေးကောက်ပွဲ မလိုဘဲ ဝန်ကြီးချုပ် ဖြစ်လာနိုင်သည်။ လေဘာစည်းမျဉ်းအရ ပါတီအမတ်စုစုပေါင်း၏ ၅ ပုံ ၁ ပုံ ထောက်ခံမှုရရှိပါက ခေါင်းဆောင်ကို စိန်ခေါ်နိုင်ပြီး လက်ရှိတွင် ထိုအရေအတွက်မှာ ၈၁ ဦး ဖြစ်သည်။
အသက် ၅၆ နှစ်အရွယ် ဘန်းဟမ်သည် “King of the North” ဟု အမည်ပြောင်ရထားသူဖြစ်ပြီး ၂၀၁၇ ခုနှစ်မှစ၍ မန်ချက်စတာကို ဦးဆောင်လျက်ရှိသည်။ စက်မှုတော်လှန်ရေး၏ အခြေခံကျသည့် မြို့တော်ဒေသကို ပြန်လည်ဖွံ့ဖြိုးတိုးတက်အောင် လုပ်ဆောင်ခဲ့သလို ၎င်း၏ “Manchesterism” မူဝါဒပုံစံကို နိုင်ငံတစ်ဝန်းသို့ တိုးချဲ့လိုကြောင်းလည်း ကြေညာထားသည်။ “နိုင်ငံကို ဒီလိုအုပ်ချုပ်နေတာ မသင့်တော်ဘူး” ဟု ၎င်းက မဲဆွယ်စည်းရုံးရေးအတွင်း ပြောကြားခဲ့ပြီး လန်ဒန်ဗဟိုဆန်သည့် နိုင်ငံရေးကြောင့် ယူကေဒေသအခြားဒေသများ ထိခိုက်နေရကြောင်း စွပ်စွဲခဲ့သည်။
စတားမာကမူ ပြိုင်ဘက် ပေါ်ပေါက်လာပါက ရင်ဆိုင်တိုက်ခိုက်မည်ဟု ပြောကြားကာ ရာထူးမှ နုတ်ထွက်ရန် အစီအစဉ်မရှိကြောင်း ပြင်သစ်နိုင်ငံတွင် ကျင်းပနေသည့် G7 ထိပ်သီးအစည်းအဝေးအတွင်း ထပ်မံအတည်ပြုခဲ့သည်။ Sky News နှင့် အင်္ဂါနေ့က ပြောဆိုရာတွင်လည်း “သူ့ကို အစိုးရအဖွဲ့ထဲမှာ အရေးပါတဲ့ အခန်းကဏ္ဍတစ်ခု ပေးချင်တယ်” ဟုဆိုကာ ဘန်းဟမ်ကို ဗဟိုအစိုးရအဖွဲ့ဝင်အဖြစ် ကမ်းလှမ်းနိုင်ကြောင်း အရိပ်အမြွက် ပြခဲ့သော်လည်း ဘန်းဟမ်နှင့် နီးစပ်သူများက စိတ်ဝင်စားမည်မဟုတ်ကြောင်း ဆိုသည်။ မန်ချက်စတာတက္ကသိုလ် နိုင်ငံရေးသိပ္ပံ ပါမောက္ခ ရော့ ဖို့ဒ်၏ အဆိုအရ ဘန်းဟမ် အနိုင်ရလျှင် “စတားမာအပေါ် ဖိအားကို တောင့်ခံနိုင်မည့်အထိ မလွယ်ကူတော့” ဟု သုံးသပ်ထားသည်။
သို့သော် ဘန်းဟမ် အနိုင်ရမည်ဟု သေချာမဆုံးဖြတ်နိုင်သေးဘဲ မိတ်ကာဖီးလ်ဒ်သည် လွန်ခဲ့သည့် ရာစုတစ်လျှောက်လုံး လေဘာပါတီကို မဲပေးလာသည့် နယ်မြေဖြစ်သည်။ အဆိုပါနယ်မြေတွင် လေဘာပါတီကို ဆန့်ကျင်သည့် Reform UK ပါတီက ပြီးခဲ့သည့်လ ဒေသန္တရရွေးကောက်ပွဲများတွင် အောင်မြင်မှုများ ရရှိထားပြီး အထူးသဖြင့် မြောက်ပိုင်းအင်္ဂလန်၏ စက်မှုလွန်ဒေသများတွင် လျင်မြန်စွာ ခိုင်မာလာနေသည်။ Reform ကိုယ်စားလှယ် ရော့ ကင်ယွန်က လူဝင်မှုကြီးကြပ်ရေးအပေါ် စိုးရိမ်မှုများကို အခြေခံ၍ မဲဆွယ်နေပြီး နယ်မြေအတွင်း ရွှေ့ပြောင်းနေထိုင်သူဦးရေ နည်းပါးသော်လည်း မဲဆန္ဒရှင်များအကြား ထိုကိစ္စမှာ အမြဲတမ်း ထိခိုက်လွယ်သည့် အကြောင်းအရာတစ်ရပ် ဖြစ်နေကြောင်း သိရသည်။ Reform ၏ ညာဘက်ပိုင်းတွင် ပိုမိုပြင်းထန်သည့် လူမျိုးရေးအခြေပြု Anti-immigration ပါတီ Restore လည်း ယှဉ်ပြိုင်နေသဖြင့် မဲခွဲရလဒ်မှာ ပိုမိုရှုပ်ထွေးနေသည်။ ဖို့ဒ်ကတော့ Reform က မိတ်ကာဖီးလ်ဒ်ကို အနိုင်ရသွားပါက လေဘာပါတီအတွက် “အလွန်ကြီးမားတဲ့ ဘေးအန္တရာယ်၊ ရှုပ်ထွေးပျက်စီးမှု” ဖြစ်လာမည်ဟု သတိပေးထားသည်။