---

ကိုရီးယားနိုင်ငံ၏ ဘူချွန်း အပြည်ပြည်ဆိုင်ရာ ဖန်တက်စတစ် ရုပ်ရှင်ပွဲတော် (BIFAN) က ၃၀ နှစ်ပြည့် အထိမ်းအမှတ်အဖြစ် AI နှင့် extended reality (XR) အပါအဝင် နည်းပညာသစ်များကို တက်တက်ကြွကြွ လက်ခံအသုံးပြုပြီး ရုပ်ရှင်လောက၏ အပြောင်းအလဲကို ဦးဆောင်မည်ဟု ကြေညာလိုက်သည်။ ယခုနှစ်ပွဲတော်တွင် နိုင်ငံ ၅၀ မှ ရုပ်ရှင် ၃၂၁ ကား ပါဝင်မည်ဖြစ်ပြီး ဇူလိုင် ၂ ရက်မှ ၁၂ ရက်အထိ ဘူချွန်းမြို့၌ ကျင်းပမည်ဖြစ်သည်။

ဆိုးလ်မြို့အနောက်ဘက် ဘူချွန်းမြို့တွင် ဇူလိုင် ၂ ရက်မှ ၁၂ ရက်အထိ ကျင်းပမည့် ယခုနှစ် BIFAN တွင် AI ဖြင့် ထုတ်လုပ်ထားသော ရုပ်ရှင် ၃၈ ကား၊ XR ပရောဂျက် ၂၈ ခု၊ အရှည်ကား ၁၇၀ ကားနှင့် တိုတောင်းကား ၈၅ ကား ပါဝင်မည်ဖြစ်သည်။ ဖွင့်ပွဲရုပ်ရှင်အဖြစ် ဒါရိုက်တာ Yuen Woo-ping ၏ The Blades of the Guardians ကို ပြသမည်ဖြစ်ကြောင်း သိရသည်။

BIFAN ၏ ၃၀ နှစ်မြောက်သည် သက်တမ်းရင့်ပွဲတော်တစ်ခုကိုသာ အမှတ်ရစေသည့် အခမ်းအနားမဟုတ်ဘဲ ရုပ်ရှင်အနာဂတ်အတွက် ခရီးသစ်တစ်ခုကို စတင်သည့် အခိုက်အတန့်ဖြစ်ကြောင်း ပွဲစီစဉ်သူများက အလေးထား ပြောကြားခဲ့သည်။ BIFAN ဥက္ကဋ္ဌ မင်းသမီး Chang Mi-hee က ဆိုးလ်မြို့၌ ပြုလုပ်သည့် သတင်းစာရှင်းလင်းပွဲတွင် “ပြီးခဲ့တဲ့ နှစ် ၃၀ ရဲ့ ခရီးလမ်းကို ပြန်လည်သုံးသပ်ရုံတင်မက မရောက်သေးတဲ့ ရုပ်ရှင်အနာဂတ်ဆီ သွားလှမ်းမယ့် အခိုက်အတန့်တစ်ခုပါ” ဟု ပြောကြားခဲ့သည်။

သူမက BIFAN သည် ထူးခြားဆန်းသစ်ပြီး ဖန်တီးမှုအားကောင်းသည့် အတွေးအခေါ်များကို ရုပ်ရှင်လောကထဲ ယူဆောင်လာခြင်းအားဖြင့် ကိုယ်ပိုင်အမှတ်အသားတစ်ခုကို တည်ဆောက်ထားကြောင်းလည်း ဆိုသည်။ “ဒီနှစ်မှာ AI နဲ့ အဆင့်မြင့်နည်းပညာတွေက ရုပ်ရှင်ဖန်တီးမှု စိတ်ကူးပုံဖော်မှုနဲ့ ဘယ်လို ပေါင်းစည်းနိုင်မလဲဆိုတာကို စိတ်ဝင်စားဖွယ် ပြသသွားမှာ ဖြစ်ပါတယ်” ဟု Chang က ပြောသည်။

ကမ္ဘာ့ရုပ်ရှင်လောကသည် streaming service များနှင့် generative AI ကြောင့် စိန်ခေါ်မှုများ ရင်ဆိုင်နေရသော်လည်း BIFAN အဖွဲ့က ထိုအခြေအနေကို လူငယ်ရုပ်ရှင်ဖန်တီးသူများအတွက် အခွင့်အလမ်းကြီးတစ်ခုအဖြစ် ရှုမြင်နေသည်။ အမှုဆောင်ဒါရိုက်တာ Shin Chul က “လာမယ့်ခေတ်နဲ့အညီ BIFAN ရဲ့ ပုံရိပ်ကို ပြောင်းလဲသွားအောင် ကြိုးပမ်းနေပါတယ်။ streaming နဲ့ ရုပ်ရှင်ရုံကို ချိတ်ဆက်ပေးရင်း AI နည်းပညာကို ဖန်တီးသူတွေနဲ့လည်း ဆက်စပ်ပေးသွားချင်ပါတယ်” ဟု ပြောကြားခဲ့သည်။

ဖွင့်ပွဲအခမ်းအနားတွင်လည်း လူသားပုံသဏ္ဌာန် စက်ရုပ် humanoid robots များနှင့် လူသားဖျော်ဖြေသူများကြား ဆက်နွယ်မှုကို အခြေခံသည့် ပူးပေါင်းဖျော်ဖြေမှုတစ်ခုကို ထည့်သွင်းမည်ဟု ဖွင့်ပွဲအခမ်းအနားအကြီးအကဲ Song Seung-whan က ပြောသည်။ “ဒီဖွင့်ပွဲက BIFAN ရဲ့ ခေတ်သစ်ကို မြင်သာအောင် ကိုယ်စားပြုနိုင်ဖို့ ရည်ရွယ်ပါတယ်။ စက်ရုပ်နဲ့ လူသားဖျော်ဖြေသူတွေကို တစ်ခန်းတည်း ပေါင်းစည်းပြီး အနုပညာနဲ့ အဆင့်မြင့်နည်းပညာတွေ အတူယှဉ်တွဲကာ အပြန်အလှန် လှုံ့ဆော်နိုင်တယ်ဆိုတာကို ပြသသွားမှာပါ” ဟု ၎င်းက ဆိုသည်။

ထို့အပြင် ကိုရီးယားနှင့် ပြင်သစ် သံတမန်ဆက်ဆံရေး ၁၄၀ နှစ်ပြည့် အထိမ်းအမှတ်အဖြစ် ပြင်သစ် သိပ္ပံစိတ်ကူးယဉ် ရုပ်ရှင်များကို အထူးပြန်လည်ပြသမည့် အစီအစဉ်တစ်ခုလည်း ပါဝင်မည်ဖြစ်သည်။ ထို့အပြင် ဟောင်ကောင်နှင့် အင်ဒိုနီးရှားကဲ့သို့ အရှိန်အဟုန်ဖြင့် တိုးတက်လာနေသည့် အရှေ့အာရှဈေးကွက်များမှ ထင်ရှားသည့် ဒါရိုက်တာများနှင့် သရုပ်ဆောင်များကို မီးမောင်းထိုးပြမည့် အထူးအစီအစဉ်များလည်း ထည့်သွင်းထားသည်။