ဖိလစ်ပိုင်တွင် ပြင်းအား ၇.၈ ငလျင်လှုပ်ခတ်၊ အနည်းဆုံး ၃၅ ဦးသေဆုံးပြီး ဆူနာမီလှိုင်းများ ရောက်ရှိ
ဖိလစ်ပိုင်နိုင်ငံတောင်ပိုင်းတွင် တနင်္လာနေ့က ပြင်းအား ၇.၈ ရှိ မြေအောက်ငလျင်တစ်ခု လှုပ်ခတ်ခဲ့ရာ အနည်းဆုံး ၃၅ ဦး သေဆုံးပြီး လူ ၂၀၀ ကျော် ဒဏ်ရာရရှိခဲ့ကြောင်း သိရသည်။ ငလျင်ကြောင့် အမြင့် ၁ မီတာခန့်ရှိသော ဆူနာမီလှိုင်းများလည်း အနီးအနားရှိ ကမ်းရိုးတန်းဒေသများသို့ ရောက်ရှိခဲ့သည်။
AFP သတင်းအရ General Santos မြို့တွင် နိမ့်ထပ်အဆောက်အအုံအများအပြား ပြိုကျပျက်စီးခဲ့ပြီး Sarangani ပြည်နယ် Glan မြို့နယ်တွင် မြေပြိုမှုဖြစ်ပွားကာ ရွာသူရွာသား ၁၃ ဦး သေဆုံးခဲ့သည်။ Sarangani ဒေသတွင် နောက်ထပ် ၄ ဦး သေဆုံးခဲ့ကြောင်းလည်း တာဝန်ရှိသူများက ပြောကြားသည်။ General Santos တွင် လူ ၄ ဦး ပျောက်ဆုံးနေဆဲဖြစ်ပြီး စူပါမားကတ်၊ ဂိုဒေါင်၊ မူလတန်းကျောင်းနှင့် အခြားအဆောက်အအုံငယ်များအတွင်း ပိတ်မိနေသူများကို ရှာဖွေကယ်ဆယ်ရေးအဖွဲ့များက ဆက်လက်ရှာဖွေနေသည်။ အဆိုပါမြို့ရှိ နိုင်ငံတကာလေဆိပ်ကိုလည်း ယာယီပိတ်ထားခဲ့ရပြီး ပြည်တွင်းလေယာဉ် ၁၇ စင်းကို ဖျက်သိမ်းခဲ့သည်။
ဖိလစ်ပိုင် မီးတောင်နှင့် ငလျင်ဗေဒဌာန ညွှန်ကြားရေးမှူး Teresito Bacolcol က ယခုငလျင်သည် ယခုနှစ်အတွင်း ဖိလစ်ပိုင်နိုင်ငံတွင် လှုပ်ခတ်ခဲ့သည့် အပြင်းဆုံးငလျင်ဖြစ်ကြောင်း ပြောကြားပြီး နောက်ဆက်တွဲငလျင်များကြောင့် ပျက်စီးနေသည့် အဆောက်အအုံများသို့ ပြန်လည်ဝင်ရောက်မီ စစ်ဆေးအတည်ပြုရန် သတိပေးခဲ့သည်။ ငလျင်ဗဟိုချက်မှာ မင်ဒါနာအိုကျွန်းအနီး ပင်လယ်ပြင်အောက် ၃၃ ကီလိုမီတာ အနက်တွင် တည်ရှိပြီး Sarangani ပြည်နယ် Maasim မြို့၏ အနောက်တောင်ဘက် ၃၂ ကီလိုမီတာခန့်အကွာတွင် ဖြစ်ပွားခဲ့သည်။ ဆူနာမီသတိပေးချက်ကို နောက်ပိုင်းတွင် ရုပ်သိမ်းခဲ့ပြီး ပင်လယ်ကမ်းရိုးတန်းဒေသအချို့တွင် လှိုင်းအမြင့် ၁ မီတာ၊ Kiamba မြို့တွင် ၁.၄ မီတာအထိ တိုင်းတာရရှိခဲ့သည်။
ငလျင်သည် Davao Occidental ပြည်နယ် Malita မြို့နယ်ရှိ မူလတန်းကျောင်းတစ်ကျောင်းတွင် နံနက်ခင်း အလံတင်အခမ်းအနား ကျင်းပနေချိန်၌လည်း လှုပ်ခတ်ခဲ့ရာ ကျောင်းသား ၁၀၀ ကျော်နှင့် ဆရာ ၁၂ ဦးခန့် အတုန်အလှုပ်ဖြစ်ခဲ့သော်လည်း ထိခိုက်ဒဏ်ရာရရှိမှု မရှိခဲ့ကြောင်း ကျောင်းအုပ်ဆရာမကြီး Rosavel Cachuela က ပြောသည်။ သေဆုံးသူများအနက် အများစုမှာ အဆောက်အအုံပြိုကျမှုနှင့် အပျက်အစီးများကြောင့် ဖြစ်ပြီး South Cotabato၊ Davao Occidental နှင့် Balut Island တို့တွင် အထူးသဖြင့် ဖြစ်ပွားခဲ့ကြောင်း တာဝန်ရှိသူများက ဆိုသည်။ အမေရိကန်၊ ပြင်သစ်၊ ဂျပန်နှင့် နယူးဇီလန်တို့က ဖိလစ်ပိုင်အစိုးရအား အကူအညီပေးရန် အသင့်ရှိကြောင်း ထုတ်ဖော်ပြောကြားခဲ့သည်။