---

ဖိလစ်ပိုင်တောင်ပိုင်းဒေသတွင် တနင်္လာနေ့ အစောပိုင်းက ရစ်ခ်တာစကေး ၇.၈ အင်အားရှိ ငလျင်တစ်ခု လှုပ်ခတ်ခဲ့ပြီး၊ ကမ်းရိုးတန်းအချို့၌ ဆူနာမီလှိုင်း ဖြစ်ပေါ်နိုင်ကြောင်း သတိပေးထုတ်ပြန်ထားသည်။ လျှပ်စစ်မီးပြတ်တောက်မှုများ ဖြစ်ပွားခဲ့ပြီး ဒေသခံများအား မြင့်မားသည့်နေရာများသို့ ရွှေ့ပြောင်းကြရန် တိုက်တွန်းထားသည်။

ဖိလစ်ပိုင် မီးတောင်နှင့် ငလျင်ဆိုင်ရာ အင်စတီကျု၏ ထုတ်ပြန်ချက်အရ ငလျင်ဗဟိုချက်သည် မင်ဒါနာအိုကျွန်းရှိ ဂျင်နရယ်ဆန်တိုစ်မြို့၏ အနောက်တောင်ဘက် ၁၃ ကီလိုမီတာအကွာ၊ အနက် ၁၀ ကီလိုမီတာတွင် တည်ရှိပြီး မနက် ၇ နာရီ ၃၇ မိနစ်တွင် လှုပ်ခတ်ခဲ့ခြင်း ဖြစ်သည်။ ပစိဖိတ် ဆူနာမီ သတိပေးစင်တာက ဖိလစ်ပိုင်ကမ်းရိုးတန်းအချို့တွင် အမြင့် ၃ မီတာအထိ လှိုင်းများ ဖြစ်နိုင်ကြောင်း၊ အင်ဒိုနီးရှားနှင့် မလေးရှားကမ်းခြေတချို့တွင်လည်း ၁ မီတာအထိ လှိုင်းများ ဖြစ်နိုင်ကြောင်း ပြောကြားသည်။ အင်စတီကျု အကြီးအကဲ တီရက်ဆို ဘက်ကိုးလ်က ကမ်းရိုးတန်းဒေသရှိ ပြည်သူများအနေဖြင့် မြင့်မားသည့်နေရာများသို့ သွားရောက်ရန် သို့မဟုတ် ကုန်းတွင်းပိုင်းသို့ အဝေးဆုံး ရွှေ့ပြောင်းရန် သတိပေးခဲ့သည်။

ထိုင်ဝမ်၊ ဂျပန်၊ ဂွမ်၊ ပါပူအာနယူးဂီနီနှင့် အနောက်ပစိဖိတ်ဒေသရှိ ကျွန်းနိုင်ငံများနှင့် ပိုင်နက်တချို့၌လည်း ဆူနာမီလှိုင်းငယ်များ ဖြစ်ပေါ်နိုင်ခြေရှိကြောင်း PTWC က ဆိုသည်။ ဟာဝိုင်အီနှင့် အမေရိကန်ပြည်မကြီး ကမ်းရိုးတန်းအတွက်မူ အန္တရာယ်မရှိကြောင်း ထုတ်ပြန်ထားသည်။ အဆိုပါ ငလျင်လှုပ်ခတ်မှုကို အင်ဒိုနီးရှားနိုင်ငံ မြောက်ဆူလာဝေစီနှင့် မြောက်မလူကူ ပြည်နယ်များအထိ ခံစားရပြီး၊ အမေရိကန် ဘူမိဗေဒဆိုင်ရာ စစ်တမ်းအဖွဲ့က နောက်ဆက်တွဲ ငလျင်ငယ်များသည် ပြင်းအား ၆.၁ အထိ ဆက်လက် ဖြစ်ပေါ်ခဲ့ကြောင်း ပြောကြားသည်။ ဖိလစ်ပိုင်သည် ပစိဖိတ် ‘Ring of Fire’ ဟု ခေါ်သည့် ငလျင်လှုပ်ရှားမှု များပြားသော ဒေသပေါ်တွင် တည်ရှိနေသဖြင့် ငလျင်နှင့် မီးတောင်ပေါက်ကွဲမှုများ မကြာခဏ ကြုံတွေ့ရပြီး နှစ်စဉ် တိုင်ဖွန်းနှင့် အပူပိုင်းမုန်တိုင်း ၂၀ ခန့်လည်း တိုက်ခတ်လေ့ရှိသည်။