နိုင်ငံဝန်ထမ်းခန့်အပ်မီ မူးယစ်ဆေးဝါးစစ်ဆေးမှု မဖြစ်မနေ ထည့်သွင်း
နိုင်ငံဝန်ထမ်းရာထူးစာမေးပွဲ အောင်မြင်သူများကို တရားဝင်ခန့်အပ်မီ မူးယစ်ဆေးဝါးစစ်ဆေးမှု ခံယူရမည်ဖြစ်ကြောင်း တောင်ကိုရီးယား လူပုဂ္ဂိုလ်ရေးစီမံခန့်ခွဲမှုဝန်ကြီးဌာနက ဇွန် ၉ ရက်တွင် ထုတ်ပြန်ကြေညာခဲ့သည်။
အဆိုပါ စည်းမျဉ်းပြင်ဆင်ချက်ကို အတည်ပြုလိုက်သဖြင့် အထွေထွေနိုင်ငံဝန်ထမ်းရာထူးနှင့် နိုင်ငံခြားရေးဝန်ထမ်းရာထူး စာမေးပွဲအောင်မြင်သူများအတွက် လိုအပ်သည့် ကျန်းမာရေးစစ်ဆေးမှုတွင် မူးယစ်ဆေးဝါးစစ်ဆေးမှုကိုလည်း ထည့်သွင်းသွားမည်ဖြစ်သည်။ လက်ရှိတွင် ရဲနှင့် မီးသတ်ဝန်ထမ်းရာထူးများအတွက် ခန့်အပ်မီ မူးယစ်ဆေးဝါးစစ်ဆေးမှု စနစ်ကို အသုံးပြုနေပြီးဖြစ်သည်။
စစ်ဆေးမှုတွင် မက်သမ်ဖက်တမင်း၊ ကန်နဘစ်၊ အဖီယမ်နှင့် ကိုကိန်း အပါအဝင် မူးယစ်ဆေးဝါး ၆ မျိုးကို စစ်ဆေးမည်ဖြစ်ပြီး စစ်ဆေးမှုအောင်မြင်သူများကိုသာ နိုင်ငံဝန်ထမ်းအဖြစ် ခန့်အပ်မည်ဟု ဝန်ကြီးဌာနက ဆိုသည်။ အဆိုပါ ပြင်ဆင်ချက်သည် အစိုးရအဖွဲ့၏ အတည်ပြုချက်ရရှိပြီးနောက် ၁ ပတ်အကြာတွင် အသက်ဝင်မည်ဖြစ်သည်။
လူပုဂ္ဂိုလ်ရေးစီမံခန့်ခွဲမှုဝန်ကြီး ချွဲဒုံဆော့က “မူးယစ်ဆေးဝါးများသည် နေ့စဉ်ဘဝအတွင်း ပိုမိုထိုးဖောက်ဝင်ရောက်လာပြီး လူမှုရေးပြဿနာမှာ အလွန်ကြီးမားလာနေသည်” ဟု ပြောကြားခဲ့သည်။ ထို့ပြင် “ယုံကြည်စိတ်ချရသော ပြည်သူ့ဝန်ဆောင်မှုစနစ်တစ်ရပ် တည်ဆောက်နိုင်ရန် နိုင်ငံဝန်ထမ်းအဖွဲ့အစည်းအတွင်း မူးယစ်ဆေးဝါးပျံ့နှံ့မှုကို တားဆီးရေး ဆောင်ရွက်ချက်များကို ဆက်လက်တိုးတက်အောင် လုပ်ဆောင်သွားမည်” ဟုလည်း ထပ်မံပြောကြားခဲ့သည်။