---

အမေရိကန်သမ္မတ ဒေါ်နယ်လ် ထရမ့်က အီရန်နှင့် စစ်ပွဲအတွင်း အမေရိကန်တပ်ဖွဲ့များကို ပြန်လည်ရုပ်သိမ်းရန် ရည်ရွယ်သည့် အောက်လွှတ်တော် မဲခွဲဆုံးဖြတ်မှုကို ပြင်းပြင်းထန်ထန် ဝေဖန်လိုက်ပြီး အဆိုပါလုပ်ရပ်သည် တီဟရန်နှင့် ဆွေးနွေးညှိနှိုင်းမှုများကို အနှောင့်အယှက်ဖြစ်စေသည်ဟု ပြောကြားခဲ့သည်။ ထရမ့်က ယင်းမဲခွဲဆုံးဖြတ်မှုကို “နိုင်ငံမချစ်သူများ၏ လုပ်ရပ်” ဟုလည်း ခေါ်ဆိုခဲ့သည်။

AFP ၏ ဖော်ပြချက်အရ အဆိုပါပြောဆိုချက်ကို ထရမ့်က ဇွန် ၄ ရက် ကြာသပတေးနေ့တွင် ၎င်း၏ Truth Social ပလက်ဖောင်းပေါ်၌ ထုတ်ဖော်ရေးသားခဲ့ခြင်း ဖြစ်သည်။ “အစ္စလာမ်သမ္မတနိုင်ငံ အီရန်နှင့် စစ်ပွဲကို အဆုံးသတ်ဖို့ ကျွန်တော်၏ နောက်ဆုံးအဆင့် ဆွေးနွေးညှိနှိုင်းမှုတွေရဲ့ အလယ်ဗဟိုမှာပဲ ဒီမဲခွဲမှုက ဖြစ်လာတာ” ဟု ထရမ့်ကရေးသားခဲ့ပြီး “အဲဒီလို နိုင်ငံမချစ်တဲ့ လုပ်ရပ်ကို ဘယ်သူ လုပ်မှာလဲ။ သူတို့က ဆွေးနွေးမှု အခြေအနေ ဘယ်လိုရှိနေတယ်ဆိုတာ သိပြီးသား” ဟု ထပ်မံပြောဆိုခဲ့သည်။

အောက်လွှတ်တော်၌ အများစုကိုင်ဆောင်ထားသည့် ရီပတ်ဘလီကန်အမတ် ၄ ဦးက သောကြာနေ့တွင် ပြင်ဆင်ရေး လုပ်ငန်းစဉ် မစတင်မီ ဇွန် ၃ ရက် ဗုဒ္ဓဟူးနေ့က ဒီမိုကရက်တစ် အမတ်များနှင့်အတူ ယင်းအဆိုပြုချက်ကို ထောက်ခံခဲ့ကြရာ မဲရလဒ် ၂၁၅ မဲနှင့် ၂၀၈ မဲဖြင့် အတည်ပြုနိုင်ခဲ့သည်။ အဆိုပြုချက်မှာ လက်ရှိတွင် ဆီးနိတ်သို့ ဆက်လက်ရောက်ရှိမည်ဖြစ်ပြီး သမ္မတဗီတို (veto) နှင့် ရင်ဆိုင်ရနိုင်သည်ဟုလည်း ဖော်ပြထားသည်။

အီရန်အပေါ် စစ်ရေးလှုပ်ရှားမှုများကို ရပ်ဆိုင်းရန် ထရမ့်အား ဖိအားပေးသည့် အဆိုပြုချက်ကို ရီပတ်ဘလီကန် ထိန်းချုပ်ထားသော အောက်လွှတ်တော်က အတည်ပြုခဲ့ခြင်းသည် ပထမဆုံးအကြိမ်ဖြစ်ပြီး ယင်းမှာ အီရန်စစ်ပွဲ စတင်ပြီး သုံးလအကြာတွင် ဖြစ်ပွားလာခြင်းလည်း ဖြစ်သည်။

ဒီမိုကရက်တစ်ပါတီကမူ ထရမ့်သည် ဖေဖော်ဝါရီလနှောင်းပိုင်းတွင် အစ္စရေးနှင့်အတူ အီရန်ကို တိုက်ခိုက်မှုများ ပြုလုပ်ရာ၌ လွှတ်တော်၏ ခွင့်ပြုချက်မရဘဲ ဆောင်ရွက်ခဲ့သဖြင့် ဖွဲ့စည်းပုံအခြေခံဥပဒေကို ချိုးဖောက်ခဲ့ကြောင်း စွပ်စွဲထားသည်။ စစ်အာဏာအက်ဥပဒေ (War Powers Act) အရ သမ္မတများသည် အမေရိကန်တပ်ဖွဲ့များကို တိုက်ပွဲအခြေအနေသို့ ထည့်သွင်းပြီးနောက် ၆၀ ရက်အတွင်း လွှတ်တော်၏ ခွင့်ပြုချက် ရယူရမည်ဖြစ်ပြီး ယင်းသတ်မှတ်ကာလမှာ လွန်ခဲ့သည့် ရက်သတ္တပတ်များစွာကတည်းက ကုန်ဆုံးသွားပြီဖြစ်ကြောင်း ဒီမိုကရက်များက ဆိုသည်။

ထရမ့်က “(ဒီမိုကရက်တွေက) ကျွန်တော့်ရဲ့ အောင်မြင်မှုတွေထဲက နောက်တစ်ခု ထပ်မပေးချင်လို့ နိုင်ငံပျက်သွားတာကိုတောင် ပိုလိုလားကြတယ်” ဟုလည်း ဝေဖန်ခဲ့သည်။ ထို့ပြင် ရီပတ်ဘလီကန်အမတ် ၄ ဦးကို “GRANDSTANDERS” ဟု ခေါ်ဆိုကာ “ရှက်သင့်တယ်” ဟု ထပ်မံပြောဆိုခဲ့သည်။