တောင်ကိုရီးယားနှင့် အီတလီတို့ တရားမျှတသော ကုန်သွယ်ရေးနှင့် ဘက်ပေါင်းစုံပူးပေါင်းဆောင်ရွက်မှု မြှင့်တင်ရန် လီ တိုက်တွန်း
တောင်ကိုရီးယားသမ္မတ လီဂျေမြန်က အီတလီဝန်ကြီးချုပ် ဂျော်ဂျာ မယ်လိုနီနှင့် ရောမမြို့တွင် တွေ့ဆုံစဉ် ကမ္ဘာလုံးဆိုင်ရာ လွတ်လပ်သော ကုန်သွယ်ရေးနှင့် ဘက်ပေါင်းစုံ ပူးပေါင်းဆောင်ရွက်မှုကို မြှင့်တင်ရန် နှစ်နိုင်ငံအနေဖြင့် ပူးပေါင်းဆောင်ရွက်စေလိုကြောင်း ပြောကြားခဲ့သည်။ ယင်းတွေ့ဆုံမှုသည် ယခုနှစ်အတွင်း နှစ်ဦး၏ ဒုတိယအကြိမ်မြောက် တွေ့ဆုံမှုလည်း ဖြစ်သည်။
တောင်ကိုရီးယားသမ္မတရုံး၏ ပြောကြားချက်အရ ရောမမြို့၌ ပြုလုပ်ခဲ့သော ဆွေးနွေးပွဲအတွင်း လီနှင့် မယ်လိုနီတို့သည် နှစ်နိုင်ငံ ပူးပေါင်းဆောင်ရွက်ရေးဆိုင်ရာ အကြောင်းအရာများကို ဆွေးနွေးခဲ့ကြသည်။ ယင်းတွေ့ဆုံမှုမတိုင်မီ တစ်ရက်အလိုတွင်လည်း လီသည် အီတလီသမ္မတ ဆာဂျီယို မာတာရဲလားနှင့် တွေ့ဆုံခဲ့ပြီး နှစ်နိုင်ငံဆက်ဆံရေးကို အထူးမဟာဗျူဟာမြောက် မိတ်ဖက်ဆက်ဆံရေးအဆင့်သို့ မြှင့်တင်ရန် သဘောတူညီခဲ့ကြသည်။
လီက “စည်းမျဉ်းအခြေပြု နိုင်ငံတကာစနစ်ရဲ့ အရေးပါမှုကို ကျွန်တော်တို့ အရင်ကတည်းက ဆွေးနွေးခဲ့ပြီးဖြစ်ပါတယ်။ လွတ်လပ်သော ကုန်သွယ်ရေး၊ ဘက်ပေါင်းစုံ ပူးပေါင်းဆောင်ရွက်ရေး စတဲ့ နယ်ပယ်တွေမှာ ပူးပေါင်းအားထုတ်မှုတွေက တဆင့် ဖွံ့ဖြိုးတိုးတက်မှုကို အတူတကွ ရှာဖွေလိုပါတယ်” ဟု အဖွင့်အမှာစကားတွင် ပြောကြားခဲ့သည်။
ထို့ပြင် ၎င်းက “နှစ်နိုင်ငံအကြား ပူးပေါင်းဆောင်ရွက်မှုအတွက် လမ်းကြောင်းအသစ်တစ်ခု တည်ဆောက်ရန် လိုအပ်နေသည်ဟု ကျွန်တော် ထင်မြင်မိပါတယ်” ဟုလည်း ပြောကြားခဲ့ပြီး တောင်ကိုရီးယားနှင့် အီတလီတို့၏ ပူးပေါင်းဆောင်ရွက်မှုသည် အထူးအဓိပ္ပာယ်ရှိကြောင်း အလေးထားပြောဆိုခဲ့သည်။ လီက နှစ်နိုင်ငံဆက်ဆံရေးသည် “နှစ်ဖက်အကျိုးရှိစေမည့် ဆက်ဆံရေး” ဖြစ်ကြောင်းလည်း ပြောဆိုပြီး ပူးပေါင်းဆောင်ရွက်မှုမှတစ်ဆင့် အပြန်အလှန် အကျိုးကျေးဇူးများ ဖန်တီးနိုင်မည်ဟု မျှော်လင့်ကြောင်း ဆိုသည်။