---

တောင်ကိုရီးယားအဓိက အတိုက်အခံပါတီဖြစ်သည့် People Power Party (PPP) ၏ လွှတ်တော်အဖွဲ့ခေါင်းဆောင် ဆောင်အွန်ဆော့ဂ် (Song Eon-seog) က ဇွန် ၄ ရက်တွင် ဆိုးလ်မြို့တော်အပါအဝင် ဒေသန္တရရွေးကောက်ပွဲများအတွင်း မဲပြားမလုံလောက်မှု ဖြစ်ပွားခဲ့သည့်အပေါ် လွှတ်တော်အဆင့် စုံစမ်းစစ်ဆေးမှုတစ်ရပ် ပြုလုပ်ရန် တောင်းဆိုလိုက်သည်။ အဆိုပါဖြစ်စဉ်ကြောင့် မဲရုံအချို့တွင် မဲပေးမှုကို ယာယီရပ်ဆိုင်းခဲ့ရပြီး မဲဆန္ဒရှင်အချို့မှာ မဲမပေးနိုင်ဘဲ ပြန်လည်ထွက်ခွာသွားခဲ့ကြရသည်။

ဆိုးလ်မြို့ရှိ မဲရုံ ၁၂ ခုကျော်တွင် ဗုဒ္ဓဟူးနေ့က မဲပြားမလုံလောက်မှု ဖြစ်ပွားခဲ့ပြီးနောက် PPP လွှတ်တော်အမတ်များ၏ အရေးပေါ်အစည်းအဝေးတွင် ဆောင်အွန်ဆော့ဂ်က “ဤကိစ္စသည် အထူးစုံစမ်းစစ်ဆေးမှု လိုအပ်သည့် အမှုမျိုးဖြစ်သည်” ဟု ပြောဆိုကာ ပါလီမန်အဆင့် စုံစမ်းရေးကို တောင်းဆိုခဲ့သည်။ အဆိုပါဖြစ်စဉ်အပေါ် ပြည်သူအကြား မကျေနပ်မှု မြင့်တက်လာခဲ့ပြီး မဲပြားများကို သယ်ဆောင်ထုတ်ယူရန် ကြိုးစားသည့် ရွေးကောက်ပွဲအရာရှိများကို တားဆီးရန် မဲရုံတစ်ခု၏ ဝင်ပေါက်တွင် ဒေါသထွက်နေသော ဆန္ဒပြသူများက ပိတ်ဆို့ခဲ့ကြသည်။

အငြင်းပွားမှု ပေါ်ပေါက်လာသည့် ဗုဒ္ဓဟူးညပိုင်းတွင် PPP သည် အစပိုင်း၌ အမျိုးသားရွေးကောက်ပွဲကော်မရှင် (NEC) အား မဲရေတွက်မှုကို ချက်ချင်းရပ်ဆိုင်းပြီး ပြန်လည်မဲပေးရန် တောင်းဆိုခဲ့သည်။ PPP ခေါင်းဆောင် ဂျန်ဒေါင်ဟျော့ခ် (Jang Dong-hyeok) နှင့် ပါတီတာဝန်ရှိသူများသည် ဗုဒ္ဓဟူးနေ့တွင် NEC သို့ သွားရောက်ကာ တရားဝင် တိုင်ကြားစာ တင်သွင်းခဲ့ကြသည်။ သို့သော် အုပ်ချုပ်ရေးပါတီ Democratic Party of Korea (DPK) က PPP အနေဖြင့် မဲပြန်လည်ပေးရန် တောင်းဆိုမှုကို နောက်ပိုင်းတွင် ပြန်လည်လျှော့ချသွားသည့်အပေါ် ဝေဖန်ခဲ့သည်။ DPK အထွေထွေအတွင်းရေးမှူးနှင့် ရွေးကောက်ပွဲမဲဆွယ်ရေးကော်မတီ အကြီးအကဲ ဂျိုဆွန်းလေ (Jo Seoung-lae) က “PPP ဟာ ရလဒ်ကို မိမိတို့အတွက် မကောင်းနိုင်ဘူးလို့ ထင်နေချိန်မှာ မဲရေတွက်မှု ရပ်ဆိုင်းရေးနဲ့ မဲပြန်လည်ပေးရေးကို တောင်းဆိုခဲ့ပေမယ့် ရလဒ်က သူတို့ဘက် လှည့်သွားတဲ့အခါ အဆိုပါတောင်းဆိုချက်တွေကို ဖုံးကွယ်သွားခဲ့တယ်” ဟု ပြောသည်။

ယခုရွေးကောက်ပွဲတွင် PPP သည် ဆိုးလ်မြို့တော်အပါအဝင် အဓိက မြို့တော်ဝန်နှင့် ပြည်နယ်အုပ်ချုပ်ရေးမှူးနေရာ ၁၆ နေရာအနက် ၄ နေရာသာ အနိုင်ရခဲ့ပြီး DPK က ၁၂ နေရာကို သိမ်းပိုက်ခဲ့သည်။ PPP မှ လက်ရှိဆိုးလ်မြို့တော်ဝန် အိုဆေဟွန်း (Oh Se-hoon) သည် ၅ ကြိမ်မြောက် သက်တမ်းအတွက် ပြန်လည်အနိုင်ရခဲ့ပြီး DPK ကိုယ်စားလှယ် ချောင်ဝန်အို (Chong Won-o) အနိုင်ရမည်ဟု မူလ ထွက်ခွာမဲစစ်တမ်း (exit poll) က ခန့်မှန်းထားသည့်ရလဒ်ကို ပြောင်းပြန်လှန်နိုင်ခဲ့သည်။ NEC က တောင်းပန်ခဲ့သော်လည်း ရွေးကောက်ပွဲဥပဒေအရ ရွေးကောက်ပွဲရွှေ့ဆိုင်းခြင်း သို့မဟုတ် မဲပြန်လည်ကျင်းပခြင်းအတွက် အကြောင်းပြချက် မဖြစ်နိုင်ကြောင်း ဆိုကာ ပြန်လည်ရွေးကောက်ပွဲ ဖြစ်နိုင်ခြေကို ပယ်ချခဲ့သည်။