ဆမ်ဆောင်းအီလက်ထရောနစ် လုပ်ခလစာ သဘောတူညီချက် အတည်ပြု
ဆမ်ဆောင်းအီလက်ထရောနစ်၏ အလုပ်သမားသမဂ္ဂအဖွဲ့ဝင် အများစုက လုပ်ခလစာဆိုင်ရာ ယာယီသဘောတူညီချက်ကို အတည်ပြုလိုက်ရာ လပေါင်းများစွာ ကြာမြင့်နေခဲ့သည့် စွမ်းဆောင်ရည်အပိုဆုကြေး အငြင်းပွားမှုမှာ ယာယီအဆုံးသတ်သွားခဲ့သည်။ သို့သော် အခြားသမဂ္ဂတစ်ခုက အဆိုပါသဘောတူညီချက်ကို မကျေနပ်သဖြင့် တရားရုံးတွင် စိန်ခေါ်ရန် ပြင်ဆင်နေသည်။
မေ ၂၇ ရက်က ထုတ်ပြန်သော အချက်အလက်များအရ ဆမ်ဆောင်းအီလက်ထရောနစ် အလုပ်သမားသမဂ္ဂတွင် မဲပေးပိုင်ခွင့်ရှိသူ ၅၇,၃၃၂ ဦးအနက် ၅၅,၃၃၃ ဦး မဲပေးခဲ့ပြီး ၄၄,၆၀၆ ဦးက ထောက်ခံအတည်ပြုခဲ့သဖြင့် အတည်ပြုနှုန်း ၈၀.၆ ရာခိုင်နှုန်း ရရှိခဲ့သည်။ National Samsung Electronics Union တွင်လည်း အဖွဲ့ဝင် ၈,၂၆၁ ဦးအနက် ၇,၂၈၃ ဦး မဲပေးခဲ့သော်လည်း ၁,၅၃၆ ဦးသာ ထောက်ခံခဲ့ပြီး အတည်ပြုနှုန်း ၂၁.၁ ရာခိုင်နှုန်းသာ ရရှိခဲ့သည်။ သမဂ္ဂနှစ်ခု၏ မဲရလဒ်ကို စုစည်းတွက်ချက်ပါက အတည်ပြုနှုန်းမှာ ၇၃.၇ ရာခိုင်နှုန်းဖြစ်ပြီး အတည်ပြုရန် လိုအပ်သည့် အများစုထက် ကျော်လွန်ခဲ့သည်။
ယာယီသဘောတူညီချက်ကို မေ ၂၀ ရက်တွင် လက်မှတ်ရေးထိုးခဲ့ပြီး နောက်တစ်နေ့တွင် အလုပ်သမားသမဂ္ဂများက အထွေထွေသပိတ် စတင်ရန် စီစဉ်ထားသော်လည်း မိနစ်ပိုင်းအလို၌ သဘောတူညီမှု ရရှိခဲ့ခြင်းဖြစ်သည်။ အဆိုပါ သဘောတူညီချက်အပေါ် မဲပေးမှုကို မေ ၂၂ ရက်မှ ၂၇ ရက်အထိ ပြုလုပ်ခဲ့သည်။
သဘောတူညီချက်တွင် ချစ်ပ်ထုတ်လုပ်ရေး Device Solutions ဌာနမှ ဝန်ထမ်းများအတွက်သာ ပေးအပ်သည့် အထူးစီမံခန့်ခွဲမှု စွမ်းဆောင်ရည်အပိုဆုကြေးကို အခြေခံထားပြီး အဆိုပါအပိုဆုကြေးကို ကုမ္ပဏီ၏ လုပ်ငန်းလည်ပတ်အမြတ် ၁၀.၅ ရာခိုင်နှုန်းဖြင့် ရန်ပုံငွေဖြည့်တင်းကာ treasury shares (ကုမ္ပဏီက ပြန်လည်ကိုင်ဆောင်ထားသည့် ရှယ်ယာများ) အဖြစ် ပေးချေမည်ဖြစ်သည်။ အတည်ပြုမှုကြောင့် ယမန်နှစ်မှ စတင်ခဲ့သည့် အလုပ်သမားပဋိပက္ခမှာ ခေတ္တသက်သာနိုင်မည်ဟု မျှော်လင့်ရသည်။ သို့သော် Device Experience ဌာနဝန်ထမ်းအများစု ပါဝင်သည့် တတိယအကြီးဆုံး သမဂ္ဂဖြစ်သော Samsung Electronics Company Union က မဲပေးမှုလုပ်ငန်းစဉ်ကို ရပ်တန့်ရန် အင်္ဂါနေ့က တရားရုံးတွင် တားမြစ်အမိန့် လျှောက်ထားခဲ့ပြီး သဘောတူညီချက်ကို ပယ်ဖျက်ရန် သီးခြားတရားစွဲဆိုမှုလည်း ထပ်မံလုပ်ဆောင်မည်ဟု သိရသည်။