ဂျောင်ဆန်းဘူဒိုတွင် အပန်းဖြေကုစားရေး ဝဲလ်နက်စ်နေရာသစ် ၆ ခု ထပ်မံသတ်မှတ်
ဂျောင်ဆန်းဘူဒိုဒေသဆိုင်ရာ အစိုးရက ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ကျန်းမာရေးနှစ်ရပ်စလုံးကို အထောက်အကူပြုသည့် ခရီးသွားလိုအပ်ချက်များ မြင့်တက်လာမှုကို တုံ့ပြန်သည့်အနေဖြင့် ဝဲလ်နက်စ် (Wellness) ခရီးသွားနေရာသစ် ၆ ခုကို ထပ်မံသတ်မှတ်ခဲ့ကြောင်း သိရသည်။ ယခုသတ်မှတ်မှုအပြီး ဂျောင်ဆန်းဘူဒိုရှိ ဝဲလ်နက်စ်ခရီးသွားနေရာ စုစုပေါင်း ၃၀ ခု ရှိလာပြီဖြစ်သည်။
သတ်မှတ်ခံရသည့် နေရာသစ်များမှာ ဂျောင်ဂျူမြို့ရှိ Sono Calm Gyeongju Wellness Pool & Spa၊ အန်ဒေါင်မြို့ရှိ Seonseonghyeon Cultural Complex၊ မွန်ဂျောင်မြို့ရှိ Sadamjae Stay၊ ချီလ်ဂေါ့မြို့ရှိ St. Benedict Cultural and Spirituality Center၊ ဘွန်ဟွာမြို့ရှိ Baekdudaegan National Arboretum နှင့် အူးလ်ဂျင် Yacht School တို့ဖြစ်သည်။ ဂျောင်ဂျူမြို့ရှိ Sono Calm Gyeongju Wellness Pool & Spa သည် Bomun Tourist Complex ၏ အလယ်ဗဟိုတွင် တည်ရှိပြီး ၁.၆၅ သန်း စတုရန်းမီတာ ကျယ်ဝန်းသော Bomun Lake အနီးတွင် ပြေးလမ်းများ၊ ကိုယ်ခန္ဓာညီမျှမှု လေ့ကျင့်ခန်းများ၊ စပာကုသမှုများနှင့် လက်ဖက်ရည်အခမ်းအနား အစီအစဉ်များကို ပံ့ပိုးပေးထားသည်။
အန်ဒေါင်မြို့ Dosan-myeon ရှိ Seonseonghyeon Cultural Complex တွင် Joseon ခေတ် ပညာရှင် Yi Hwang ရေးသားထားသည့် ကျန်းမာရေးလမ်းညွှန် “Hwarinsimbang” ကို လေ့လာနိုင်ပြီး ညအချိန် ကန်လွန်တစ်လျှောက် ခြေလက်စွမ်းအင်ပြန်လည်လှုပ်ရှားစေသည့် ရေချိုးအစီအစဉ်ကိုလည်း ခံစားနိုင်သည်။ မွန်ဂျောင်မြို့ရှိ Sadamjae Stay တွင် မနက်ခင်း ယောဂနှင့် ရေပူစမ်း အတွေ့အကြုံများ ရရှိနိုင်ပြီး၊ ချီလ်ဂေါ့မြို့ရှိ St. Benedict Cultural and Spirituality Center သည် ဘုန်းတော်ကြီးကျောင်း လှည့်လည်မှုများနှင့် တစ်ဦးချင်း တရားထိုင်အစီအစဉ်များကို စီစဉ်ပေးသည်။
ထို့အပြင် ဘွန်ဟွာမြို့ရှိ Baekdudaegan National Arboretum တွင် ဧည့်လမ်းညွှန်ဖြင့် အပင်တောဥယျာဉ် လှည့်လည်မှုများနှင့် စိတ်ပိုင်းဆိုင်ရာ ကုစားရေးအစီအစဉ်များကို ပေါင်းစပ်ထားပြီး အူးလ်ဂျင် Yacht School ကတော့ ယာတ်လှေစီးခရီးစဉ်များနှင့် ရေပြင်ပေါ်မှ နေထွက်၊ နေဝင် ကြည့်ရှုမှုများကို အခြေခံသည့် ဝဲလ်နက်စ်အစီအစဉ်များကို တွဲဖက်ပေးထားသည်။ ဂျောင်ဆန်းဘူဒိုအစိုးရကလည်း နေရာတစ်ခုချင်းစီ၏ လည်ပတ်မှုအခြေအနေများနှင့် အကြောင်းအရာများကို သီးသန့် တိုင်ပင်ဆွေးနွေးပေးမည်ဖြစ်ပြီး ဧည့်သည်ဝန်ဆောင်မှု မြှင့်တင်ရေး၊ ကြော်ငြာလုပ်ငန်းများနှင့် ခရီးသွားထုတ်ကုန် ဖွံ့ဖြိုးရေးတို့ကိုလည်း ထောက်ပံ့မည်ဟု ဆိုသည်။ ခရီးသွားအေဂျင်စီများနှင့် ပူးပေါင်းဖန်တီးမည့် ခရီးစဉ်အထုပ်များ၊ အွန်လိုင်းပလက်ဖောင်းများပေါ်ရှိ လျှော့စျေးကမ်ပိန်းများ၊ ပြည်တွင်းနှင့် နိုင်ငံတကာ ခရီးသွားပြပွဲများတွင် ပါဝင်မှု၊ အွန်လိုင်းနှင့် အော့ဖ်လိုင်း မားကတ်တင်းများမှတစ်ဆင့်လည်း အဆိုပါနေရာများကို ပိုမိုလူသိများလာအောင် ဆောင်ရွက်မည်ဖြစ်ကြောင်း ပြည်နယ်အာဏာပိုင်များက ထုတ်ပြန်ထားသည်။ ဂျောင်ဆန်းဘူဒို ယဉ်ကျေးမှု၊ ခရီးသွားနှင့် အားကစားဌာန ညွှန်ကြားရေးမှူး ပတ်ချန်ဝူကလည်း သစ်တောများ၊ ပင်လယ်နှင့် သမိုင်းဝင် ယဉ်ကျေးမှုအမွေအနှစ်များကဲ့သို့သော ကုစားရေးရင်းမြစ်များ အများအပြားရှိသည့်အတွက် ဝဲလ်နက်စ်ခရီးသွားလုပ်ငန်း ဖွံ့ဖြိုးတိုးတက်ရေးတွင် ယှဉ်ပြိုင်အားသာချက် ရှိကြောင်း ပြောကြားခဲ့သည်။