ကိုရီးယားတက်ကြွလှုပ်ရှားသူများကို ဖမ်းဆီး၊ အနိုင်ကျင့်ခဲ့ခြင်းမရှိဟု အစ္စရေးသံရုံး ပယ်ချ
ဂါဇာကမ်းရိုးတန်းသို့ ဦးတည်သွားနေသည့် အကူအညီသင်္ဘောများပေါ်တွင် ဖမ်းဆီးခံခဲ့ရပြီးနောက် ပြန်လည်လွတ်မြောက်လာသည့် တောင်ကိုရီးယားတက်ကြွလှုပ်ရှားသူ ၂ ဦးကို အစ္စရေးတပ်ဖွဲ့များက ဖမ်းဆီးခြင်း သို့မဟုတ် အနိုင်ကျင့်ခြင်း မရှိခဲ့ကြောင်း ကိုရီးယားရှိ အစ္စရေးသံရုံးက မေ ၂၆ ရက်တွင် တုံ့ပြန်ပြောကြားခဲ့သည်။
သံရုံး၏ ကြေညာချက်အရ တောင်ကိုရီးယားနိုင်ငံသား ၂ ဦးကို ထိန်းသိမ်းထားခြင်း မရှိဘဲ Ashdod ဆိပ်ကမ်းသို့ ရောက်ရှိသည်နှင့်တပြိုင်နက် လိုအပ်သည့် စီမံဆောင်ရွက်မှုများ ပြုလုပ်ကာ အမြန်ပြန်ပို့ရေး လုပ်ငန်းစဉ်ဖြင့် နေရပ်သို့ ပြန်လွှတ်ပေးခဲ့ကြောင်း ဆိုသည်။ ၎င်းတို့၏ စွပ်စွဲချက်များသည်လည်း ယင်းဖြစ်စဉ်နှင့် မကိုက်ညီသဖြင့် မေးခွန်းထုတ်စရာ ဖြစ်စေသည်ဟု သံရုံးက ပြောကြားခဲ့သည်။
တက်ကြွလှုပ်ရှားသူ Kim Ah-hyun နှင့် Kim Dong-hyeon တို့သည် ယခင်သီတင်းပတ်အတွင်း သက်ဆိုင်ရာ သင်္ဘောများပေါ်တွင် အသီးသီး ဖမ်းဆီးခံခဲ့ရပြီး မေ ၂၁ ရက် ဗုဒ္ဓဟူးနေ့တွင် ပြန်လည်လွတ်မြောက်လာကာ မေ ၂၃ ရက် သောကြာနေ့၌ အတူတကွ နေရပ်သို့ ပြန်ရောက်လာခဲ့ကြသည်။ Kim Ah-hyun သည် ဂါဇာကမ်းရိုးတန်းအနီး ရေပိုင်နက်အတွင်း အစ္စရေးတပ်ဖွဲ့များ သိမ်းယူခဲ့သည့် အကူအညီသင်္ဘောပေါ်တွင် ရှိနေခဲ့ပြီး Kim Dong-hyeon ၏ သင်္ဘောကိုလည်း ဆိုက်ပရပ်စ်အနီးတွင် ကြားဖြတ်တားဆီးခဲ့ကြောင်း သိရသည်။
Kim Ah-hyun သည် ယခင်ကလည်း ၂၀၂၅ ခုနှစ် အောက်တိုဘာလတွင် အကူအညီသင်္ဘောအဖွဲ့နှင့်အတူ ခွင့်ပြုချက်မရှိဘဲ နယ်မြေထဲ ဝင်ရောက်ရန် ကြိုးပမ်းခဲ့ဖူးပြီး ထိုအချိန်က အစ္စရေးတပ်ဖွဲ့များက ထိန်းသိမ်းခဲ့ရာမှ နောက်ပိုင်းတွင် ပြန်လွှတ်ပေးခဲ့သည်။ ထို့နောက် ထပ်မံကြိုးပမ်းမှုမပြုမီ တောင်ကိုရီးယားအစိုးရက ၎င်း၏ နိုင်ငံကူးလက်မှတ်ကို ရုပ်သိမ်းထားခဲ့ကြောင်း သိရသည်။
တက်ကြွလှုပ်ရှားသူဘက်ကမူ နောက်ဆုံးအကြိမ် ဖမ်းဆီးခံရပြီးနောက် အစ္စရေးတပ်ဖွဲ့များက မျက်နှာကို ရိုက်နှက်ခဲ့ကြောင်း၊ ဘယ်ဘက်နားကြားမှုလည်း ထိခိုက်သွားကြောင်း စွပ်စွဲပြောဆိုထားသည်။