တောင်ကိုရီးယားနိုင်ငံ Yongin မြို့ရှိ Everland အပန်းဖြေဥယျာဉ်က ၎င်း၏ နှစ် ၅၀ ပြည့်အထိမ်းအမှတ်အဖြစ် Safari World ကို တိရစ္ဆာန်သက်သာချောင်ချိရေးကို ဦးစားပေးကာ အသစ်ပြင်ဆင်ဖွင့်လှစ်လိုက်ပြီး နွေဦးရာသီအတွက် နိုင်ငံတကာအဆင့်မီ ဖျော်ဖြေပွဲနှင့် မီးရှူးမီးပန်းပြပွဲများကိုလည်း တင်ဆက်နေသည်။ Tulip Festival တွင်လည်း ပန်းပွင့်များ အပြည့်အဝ ပွင့်လန်းနေသဖြင့် လာရောက်သူဦးရေ တိုးလာကြောင်း Everland က ပြောကြားထားသည်။
Gyeonggi Province၊ Yongin မြို့၌ 1976 ခုနှစ်ကတည်းက ဖွင့်လှစ်ခဲ့သည့် Everland သည် ဆိုးလ်မြို့စွန်တွင် ပန်းဥယျာဉ်များ၊ တောရိုင်းတိရစ္ဆာန်များနှင့် ကမ္ဘာ့အဆင့်မီ အပျော်စီးစီးနင်းကစားနည်းများကို တစ်နေရာတည်းတွင် ခံစားနိုင်သည့် နေရာတစ်ခုအဖြစ် ကိုရီးယားနိုင်ငံ၏ အပန်းဖြေကဏ္ဍကို ဦးဆောင်လာခဲ့သည်။ ယခုနှစ်တွင် Safari World ကို တစ်နှစ်ခန့် ပြင်ဆင်ပြီးနောက် ပြန်လည်ဖွင့်လှစ်ခဲ့ပြီး ခြင်္သေ့၊ ကျား၊ အညိုရောင်ဝက်ဝံနှင့် hyena အပါအဝင် သားရဲမျိုးစိတ် ၈ မျိုးကို ပိုမိုနီးကပ်ပြီး သဘာဝဆန်စွာ လေ့လာကြည့်ရှုနိုင်အောင် ပြောင်းလဲထားသည်။ Everland Zoo ဒါရိုက်တာ David Chung က ပြုပြင်တည်ဆောက်မှု၏ အရေးအကြီးဆုံးအချက်မှာ တိရစ္ဆာန်သက်သာချောင်ချိရေးဖြစ်ပြီး ၎င်းတို့၏ ဇီဝလိုအပ်ချက်များကို အခြေခံသည့် နေထိုင်ရာပတ်ဝန်းကျင် ဖန်တီးရန် ရည်ရွယ်ခဲ့ကြောင်း ပြောကြားသည်။
Safari World အသစ်တွင် ကျားများကို ကိုရီးယားသစ်တောပုံစံ ပတ်ဝန်းကျင်၌ ထားရှိပြီး ခြင်္သေ့များကိုတော့ ကျယ်ပြန့်သော ဆာဗန်နာလွင်ပြင်ပုံစံတွင် လွှတ်ပေးထားသည်။ ရေကန်ပုံစံများနှင့် သဘာဝအမဲလိုက်စိတ်ကို လှုံ့ဆော်ပေးမည့် ဖုံးကွယ်ထားသော အစာပေးစနစ်များလည်း ထည့်သွင်းထားသည်။ လာရောက်သူများကိုတော့ အသံဆူညံမှုနည်းသည့် လျှပ်စစ်ဘတ်စ်သစ်များဖြင့် လှည့်လည်ပြသနေပြီး ယင်းကြောင့် တိရစ္ဆာန်များလည်း ပိုမိုငြိမ်သက်နေသည်ဟု ဆိုသည်။ Everland အဆိုအရ ဘတ်စ်စီးဆံ့နိုင်မှုသည် 1.6 ဆ တိုးလာသဖြင့် စောင့်ဆိုင်းချိန်လည်း လျော့ကျမည်ဖြစ်သည်။
ဖျော်ဖြေရေးဘက်တွင်လည်း ကနေဒါနိုင်ငံ၏ နာမည်ကြီး Cirque Eloize နှင့် ပူးပေါင်းဖန်တီးထားသည့် “Wings of Memory” ဟု အမည်ပေးထားသော ဇာတ်လမ်းအခြေပြု ဆပ်ကပ်ပြပွဲကို တင်ဆက်နေသည်။ Everland တာဝန်ရှိသူတစ်ဦး၏ ပြောကြားချက်အရ 2024 ခုနှစ် ဆောင်းဦးကတည်းက ဆက်သွယ်ညှိနှိုင်းခဲ့ပြီး တစ်နှစ်ခွဲခန့် အချိန်ယူကာ ဇာတ်လမ်းနှင့် အယူအဆကို အစအဆုံး ပူးပေါင်းတည်ဆောက်ထားခြင်းဖြစ်သည်။ Cirque du Soleil အတွေ့အကြုံရှိ အနုပညာရှင်များ ပါဝင်ပြီး ကာယဖျော်ဖြေမှုများ၊ aerial pole၊ Russian swing နှင့် contortion စသည့် ခက်ခဲမြင့်မားသော လှုပ်ကွက်များကို ၄၀ မိနစ်ကြာ ပြပွဲအတွင်း ဇာတ်လမ်းနှင့် ချိတ်ဆက်တင်ဆက်ထားကာ တစ်နေ့လျှင် ၂ ကြိမ် ကပြသသည်။
ထို့အပြင် Four Seasons Garden တွင် “The Guardians of Light” ဟု အမည်ပေးထားသည့် မီးရှူးမီးပန်းနှင့် မီဒီယာနည်းပညာ ပေါင်းစပ်ပြပွဲကိုလည်း တင်ဆက်နေသည်။ ၂၀၁၈ PyeongChang ဆောင်းရာသီအိုလံပစ် ဖွင့်ပွဲကို ဒါရိုက်တာအဖြစ် တာဝန်ယူခဲ့သူ Yang Jung-ung က ဦးဆောင်ဖန်တီးထားပြီး drone များ၊ 3D mapping နှင့် laser effects များကို ပေါင်းစပ်အသုံးပြုထားသည်။ 10CM အဖွဲ့မှ Kwon Jeong-yeol နှင့် သရုပ်ဆောင် Lee Sang-yoon တို့လည်း ပါဝင်ထားကာ ပြပွဲအား ၂၀ မိနစ်ကြာ တင်ဆက်ပြီး နေ့စဉ် ည ၉ နာရီ ၂၀ မိနစ်တွင် စတင်သည်။ မတ် ၂၇ ရက်က စမ်းသပ်တင်ဆက်ခဲ့ချိန်မှစ၍ ပရိသတ်တုံ့ပြန်မှု အလွန်ကောင်းမွန်နေသည်ဟု သိရသည်။
နွေဦးရာသီ၏ အဓိကအစီအစဉ်တစ်ခုဖြစ်သည့် Tulip Festival တွင် tulip, muscari နှင့် daffodil အပါအဝင် ပန်းပေါင်း ၁.၂ သန်းကျော်ဖြင့် အလှဆင်ထားသည်။ ပွဲကျင်းပသည့် ပထမ ၁၀ ရက်အတွင်း လာရောက်သူဦးရေသည် ယမန်နှစ် အလားတူကာလထက် ၃၀ ရာခိုင်နှုန်း တိုးလာကြောင်း Everland က ပြောသည်။ “My Spring Palette” အယူအဆအောက်တွင် tulip စိုက်ဧရိယာကို တိုးချဲ့ထားပြီး ဥယျာဉ်ပုံစံကိုလည်း ပိုမိုကျယ်ပြန့်တောက်ပအောင် ပြင်ဆင်ထားသည်။ ယခုနှစ်တွင် အလှဆင်ပစ္စည်းအတုများကို လျှော့ချထားပြီး သဘာဝပန်းပွင့်အလှကို ပိုမိုထင်ရှားစေရန် ဦးစားပေးထားသည်။ နံနက် ၉ နာရီမှ စတင်၍ ဥယျာဉ်ထိန်းသိမ်းမှုလုပ်ငန်းစဉ်များကိုလည်း ပြည်သူများအား ဖွင့်လှစ်ပြသနေပြီး ပန်းများကို မည်သို့ စီမံ၊ စီစဉ်နှင့် ရေလောင်းသလဲကို လာရောက်သူများက စိတ်ဝင်စားကြောင်း Everland က ဆိုသည်။ အဆိုပါ Tulip Festival သည် ဧပြီလ ၃၀ ရက်အထိ ဆက်လက်ကျင်းပမည်ဖြစ်သည်။