Korean Air သည် ဉာဏ်ရည်တု (AI) နည်းပညာကို အသုံးပြုထားသည့် နောက်မျိုးဆက် မြန်နှုန်းမြင့် မောင်းသူမဲ့ ပစ်မှတ်ဒရုန်းများ ဖွံ့ဖြိုးရေးကို အရှိန်မြှင့်လုပ်ဆောင်နေပြီး အုပ်စုလိုက် ထိန်းချုပ်နိုင်စွမ်းနှင့် မစ်ရှင်အလိုက် အလိုအလျောက် ဆောင်ရွက်နိုင်စွမ်းကို မြှင့်တင်ရန် ကြိုးပမ်းနေကြောင်း မတ် ၂၆ ရက်တွင် ထုတ်ပြန်ခဲ့သည်။
ကုမ္ပဏီသည် ကာကွယ်ရေးပစ္စည်းဝယ်ယူရေးဦးစီးဌာန (DAPA)၊ ရေတပ်နှင့် လေတပ်တို့မှ တာဝန်ရှိသူများနှင့် ပူးပေါင်းကာ အသံအလျင်အောက် အမျိုးအစား မောင်းသူမဲ့ ပစ်မှတ်စနစ်အတွက် system requirement review ကို အောင်မြင်စွာ ပြီးစီးခဲ့သည်။ ယင်းအောင်မြင်မှုသည် Korean Air က နိုဝင်ဘာလတွင် အစိုးရဦးဆောင်သည့် စီမံကိန်းကို လက်ခံရရှိပြီး ၄ လအကြာ ရရှိလာသည့် အရေးပါသော မှတ်တိုင်တစ်ခုလည်း ဖြစ်သည်။ အဆိုပါ စီမံကိန်းအရ ကိုရီးယားနိုင်ငံသည် လေယာဉ်ကိုယ်ထည်၊ ထိန်းချုပ်ကိရိယာများ၊ ပစ်လွှတ်စက်များ စသည့် အဓိကအစိတ်အပိုင်းများကို ပြည်တွင်း၌ ထုတ်လုပ်နိုင်ရန် ရည်ရွယ်ပြီး တင်သွင်းအသုံးပြုနေသော ပစ်မှတ်ဒရုန်းများကို အစားထိုးကာ ကာကွယ်ရေးအရ ကိုယ်တိုင်အားကိုးနိုင်စွမ်းကို မြှင့်တင်သွားမည်ဖြစ်သည်။
Korean Air က ဖွံ့ဖြိုးနေသော မြန်နှုန်းမြင့် ပစ်မှတ်ဒရုန်းသည် Mach 0.6 အထိ၊ တစ်နာရီလျှင် ခန့်မှန်း ၇၃၅ ကီလိုမီတာ အမြန်နှုန်းအထိ ရောက်ရှိနိုင်ရန် ဒီဇိုင်းထုတ်ထားပြီး ယင်းအမျိုးအစားတွင် ကိုရီးယား၌ အမြန်ဆုံးအဆင့် ဖြစ်ကြောင်း ဆိုသည်။ ကုမ္ပဏီအနေဖြင့် ၂၀၂၇ ခုနှစ်ကုန်တွင် prototype ကို ထုတ်ဖော်ပြသမည်ဖြစ်ပြီး ပထမဆုံး စမ်းသပ်ပျံသန်းမှုကိုလည်း ထိုအချိန်မတိုင်မီ ပြုလုပ်မည်ဟု ပြောကြားထားသည်။ ထို့အပြင် AI စွမ်းရည်များကို ထည့်သွင်းကာ အုပ်စုလိုက် ပူးပေါင်းလှုပ်ရှားမှုများနှင့် အလိုအလျောက် မစ်ရှင်ဆောင်ရွက်မှုများကို အမြင့်ဆုံးထိ ထိရောက်စေရန် စီစဉ်ထားပြီး မစ်ရှင်အလိုက် အာရုံခံကိရိယာများနှင့် စက်ပစ္စည်းများကို လွယ်ကူစွာ တပ်ဆင်နိုင်သည့် open architecture ဒီဇိုင်းကိုလည်း လိုက်နာနေကြောင်း သိရသည်။ Korean Air က ၂၀၂၈ ခုနှစ်တွင် အဆိုပါဒရုန်းများကို တိုက်ခိုက်ရေးအသုံးပြုရန် အဆင်သင့်ဖြစ်စေမည်ဟု ရည်မှန်းထားသည်။