AI နှင့် ePeople ပလက်ဖောင်းက ပြည်သူခံစားရမည့် အစိုးရဆန်းသစ်တီထွင်မှုကို မောင်းနှင်မည်

တောင်ကိုရီးယားတစ်နိုင်ငံလုံးတွင် အသုံးပြုနေသည့် အွန်လိုင်းတိုင်ကြားမှုစနစ် ePeople ကို AI နည်းပညာဖြင့် ပိုမိုမြှင့်တင်အသုံးပြုလာခြင်းကြောင့် ပြည်သူ့တိုင်ကြားချက်များကို ပိုမိုမြန်ဆန်၊ တိကျပြီး ထိရောက်စွာ ကိုင်တွယ်နိုင်မည့် အစိုးရဝန်ဆောင်မှုအသစ်တစ်ရပ် ပေါ်ထွက်လာနေသည်။ အဂတိလိုက်စားမှုနှင့် ပြည်သူ့အခွင့်အရေးကော်မရှင်က ၂၀၃၀ ခုနှစ်အထိ AI ဝန်ဆောင်မှုများကို ePeople အသုံးပြုနေသည့် အဖွဲ့အစည်း ၁,၄၀၇ ခုလုံးထံ တဖြည်းဖြည်း တိုးချဲ့သွားမည်ဟု ဆိုသည်။

ePeople သည် ဗဟိုအစိုးရဌာနများ၊ ဒေသန္တရအစိုးရများနှင့် ပြည်သူ့အဖွဲ့အစည်းများအပါအဝင် အဖွဲ့အစည်း ၁,၄၀၇ ခုထံ ပြည်သူများက တိုင်ကြားစာတင်နိုင်ပြီး သက်ဆိုင်ရာအဖွဲ့အစည်းများက တုံ့ပြန်ဖြေကြားနိုင်သည့် အွန်လိုင်းတိုင်ကြားမှုပလက်ဖောင်းတစ်ခု ဖြစ်သည်။ ၂၀၂၅ ခုနှစ်အထိ စနစ်မှတစ်ဆင့် တိုင်ကြားစာ ၁၁.၆၉ သန်း တင်သွင်းခဲ့ပြီး တောင်ကိုရီးယားနိုင်ငံသား ၅ ယောက်တွင် အနည်းဆုံး ၁ ယောက်ခန့်က ဤစနစ်ကို အသုံးပြုပြီးဖြစ်ကြောင်း တွက်ချက်နိုင်သည်။

မိုက်ခရိုဆော့ဖ်၏ AI Economy Institute (AIEI) အရ ကိုရီးယားနိုင်ငံသည် မနှစ်က generative AI လက်ခံအသုံးပြုမှု အမြန်ဆုံးနိုင်ငံဖြစ်ခဲ့ပြီး ကိုရီးယားဗဟိုဘဏ်၏ ၂၀၂၅ ခုနှစ် ဩဂုတ်လ စစ်တမ်းအရ ရုံးဝန်ထမ်း ၅၁.၈ ရာခိုင်နှုန်းက လုပ်ငန်းခွင်တွင် generative AI ကို အသုံးပြုနေကြောင်း တွေ့ရှိရသည်။ အဆိုပါနှုန်းသည် အမေရိကန်ပြည်ထောင်စုထက် ခန့်မှန်းခြေ နှစ်ဆနီးပါး မြင့်မားသည်။

ယင်းအခြေအနေကို အခြေခံ၍ အဂတိလိုက်စားမှုနှင့် ပြည်သူ့အခွင့်အရေးကော်မရှင်က ပြည်သူ့လိုအပ်ချက်များနှင့် ကိုက်ညီသည့် ဝန်ဆောင်မှုကောင်းများ ပေးနိုင်ရန် AI အခြေပြု စီမံကိန်းကို စတင်ခဲ့ခြင်း ဖြစ်သည်။ ၂၀၂၅ ခုနှစ် ပထမနှစ်ဝက်အတွင်း ePeople စနစ်ထဲသို့ generative AI ပေါင်းစည်းရေး စီမံကိန်းတစ်ရပ် စတင်ခဲ့ပြီး ဖေဖော်ဝါရီ ၅ ရက်မှစ၍ ပြည်သူ့တိုင်ကြားချက်များကို ဖြေကြားခြင်းနှင့် တိုင်ကြားဒေတာများကို ခွဲခြမ်းစိတ်ဖြာခြင်းအတွက် AI စမ်းသပ်ဝန်ဆောင်မှုကို လုပ်ဆောင်နေသည်။

ဤစီမံကိန်းတွင် အဓိက လုပ်ငန်းသုံးရပ် ပါဝင်သည်။ ပထမအနေဖြင့် AI သည် ဆင်တူသို့မဟုတ် တူညီသော တိုင်ကြားချက်များကို အုပ်စုဖွဲ့ပေးသဖြင့် အရာရှိများအနေဖြင့် တစ်ပြိုင်နက်တည်း စိစစ်ပြီး တုံ့ပြန်နိုင်သည်။ လက်ရှိတွင် မြေယာ၊ အခြေခံအဆောက်အအုံနှင့် သယ်ယူပို့ဆောင်ရေးဝန်ကြီးဌာန၊ အင်ချွန်းမြို့တော်နှင့် ဂျီယောင်ဂီပြည်နယ်ရှိ စီဟွန်းမြို့တို့တွင် စမ်းသပ်နေပြီး အလားတူတိုင်ကြားချက်များ အလွန်များပြားစွာ ဝင်ရောက်နေသည့် နေရာများကို အဓိကထား အသုံးပြုနေသည်။ အဖွဲ့အစည်းတစ်ခုမှ အရာရှိတစ်ဦးက ePeople စနစ်ထဲ ဝင်ကြည့်သည့်အခါ ဆောင်ရွက်ရမည့် တိုင်ကြားချက် ၆,၀၀၀ ကျော် တင်ကျန်နေတတ်ကြောင်း ပြောဆိုသည်။ သို့သော် ထိုအများစုမှာ အကြောင်းအရာ သိပ်မကွာခြားသည့် တိုင်ကြားချက်များဖြစ်ပြီး တချို့မှာ ရထားဘူတာသစ်ကို ကိုယ့်အိမ်နားတွင် တည်ဆောက်ပေးရန် ဒေသခံများက တောင်းဆိုသည့် ကိစ္စများ ဖြစ်သည်။

တိုင်ကြားမှုများကို AI က အုပ်စုဖွဲ့ပေးခြင်းကြောင့် စိစစ်ရေးအတွက် အချိန်များစွာ သက်သာသွားပြီး အရာရှိများသည် ကွန်ပျူတာရှေ့တွင် နာရီပေါင်းများစွာ ထိုင်နေရခြင်း မလိုတော့ဘဲ နေရာကွင်းဆင်းစစ်ဆေးခြင်း သို့မဟုတ် တိုင်ကြားသူများနှင့် တိုက်ရိုက်ဆွေးနွေးခြင်းကို ပိုမိုလုပ်ဆောင်လာနိုင်သည်။ ဆိုလိုသည်မှာ AI က ထပ်ခါထပ်ခါ လုပ်ဆောင်ရသည့် အလုပ်များကို လျှော့ချပေးပြီး အမှန်တကယ် ပြဿနာများအပေါ် စဉ်းစားဖြေရှင်းရန် အချိန်ပိုရစေခြင်းဖြစ်သည်။

ဒုတိယအနေဖြင့် AI က သက်ဆိုင်ရာ ဥပဒေနှင့် စည်းမျဉ်းစည်းကမ်းများကို ရှာဖွေပြီး အဖွဲ့အစည်းတာဝန်ဝတ္တရားနှင့် ဆိုင်သည့် မေးခွန်းများအတွက် ဖြေကြားမည့် မူကြမ်းများကို အလိုအလျောက် ရေးဆွဲပေးသည်။ ယင်းစနစ်ကို လက်ရှိတွင် တိုင်ကြားမှုများ အလွန်ရှုပ်ထွေးပြီး အထူးပြုသဘာဝရှိသည့် တိုင်ကြားချက်များကို မကြာခဏ လက်ခံရရှိသော အစားအသောက်နှင့် ဆေးဝါးလုံခြုံရေးဝန်ကြီးဌာနတွင် စမ်းသပ်နေသည်။ တာဝန်ခံအရာရှိများက AI ရေးသားထားသော မူကြမ်းများကို ပြင်ဆင်ဖြည့်စွက်ခြင်း သို့မဟုတ် ပြန်လည်ရေးသားခြင်း ပြုလုပ်နိုင်ပြီး အဆိုပါ ပြင်ဆင်ထားသည့် အဖြေများကို နောက်ထပ် သင်ကြားရေးဒေတာအဖြစ် သိမ်းဆည်းထားသည်။

တစ်ဦးချင်းအရာရှိများ၏ စွမ်းရည်ပေါ်သာ မူတည်နေရခြင်းထက် AI က ဒေတာဘေ့စ်များကို အသုံးချ၍ ပိုမိုမြန်ဆန်တိကျသည့် တုံ့ပြန်မှုများ ပေးနိုင်သည်။ အတူတကွ သင်ယူတိုးတက်သွားသည်နှင့်အမျှ အကြောင်းအရာအရည်အသွေးလည်း ဆက်လက်ကောင်းမွန်လာမည်ဟု ဆိုသည်။

တတိယအနေဖြင့် AI က ပြည်သူ့တိုင်ကြားချက်ဒေတာများကို ခွဲခြမ်းစိတ်ဖြာပြီး လူမှုရေးဆိုင်ရာ အရေးကြီးပြဿနာများကို ဖော်ထုတ်ပေးသည်။ ePeople မှတစ်ဆင့် တင်သွင်းလာသည့် တိုင်ကြားချက်များကို AI က ကိုယ်တိုင်ခွဲခြမ်းစိတ်ဖြာကာ အချိန်ကာလအလိုက်၊ ဒေသအလိုက် ပေါ်ပေါက်လာသည့် ပြဿနာများကို ခွဲခြားသတ်မှတ်နိုင်သည်။ ထို့ပြင် လက်ရှိတွင် ပြည်သူအများအပြားက အစိုးရထံ တင်ပြနေသည့် ကိစ္စရပ်များကိုလည်း ဖော်ထုတ်နိုင်သည်။

အဂတိလိုက်စားမှုနှင့် ပြည်သူ့အခွင့်အရေးကော်မရှင်က အဆိုပါ အချက်အလက်များကို သက်ဆိုင်ရာဌာနများထံ လျင်မြန်စွာ မျှဝေပြီး အချိန်မီ တုံ့ပြန်မှုများ ချမှတ်နိုင်ရန် ဆောင်ရွက်မည်ဟု ဆိုသည်။ ထိုသို့လုပ်ဆောင်ခြင်းဖြင့် ပြည်သူများ ကြုံတွေ့ရနိုင်သည့် အခက်အခဲများကို ကြိုတင်တားဆီးသို့မဟုတ် လျှော့ချနိုင်မည်ဖြစ်သကဲ့သို့ မူဝါဒတိုးတက်ရေးနှင့် ဦးစားပေးပြုပြင်ရေးများကိုလည်း အထောက်အကူဖြစ်စေကာ အုပ်ချုပ်ရေးတွင် ပြည်သူ့ဗဟိုပြု သဘောတရားကို အကောင်အထည်ဖော်နိုင်မည်ဟု ရည်ရွယ်ထားသည်။

စမ်းသပ်စီမံကိန်းရလဒ်များကို အခြေခံ၍ ၂၀၃၀ ခုနှစ်အထိ ePeople ကို အသုံးပြုနေသည့် အဖွဲ့အစည်း ၁,၄၀၇ ခုလုံးထံ ပြည်သူနှင့် အစိုးရအကြား အပြန်အလှန် ဆက်သွယ်မှုဝန်ဆောင်မှုအပါအဝင် AI နည်းပညာမျိုးစုံကို တဖြည်းဖြည်း မိတ်ဆက်သွားမည်ဟု ACRC က ပြောသည်။ ပြည်သူများ၏ နေ့စဉ်ဘဝတွင် AI အခြေပြု အစိုးရဆန်းသစ်တီထွင်မှုကို လက်တွေ့ခံစားရစေရန် အစွမ်းကုန် ဆောင်ရွက်သွားမည်ဟုလည်း ကော်မရှင်က ဆိုသည်။