တောင်ကိုရီးယား သိပ္ပံနှင့် ICT ဝန်ကြီးဌာနသည် ၂၀၂၈ ခုနှစ်အထိ AI ဦးဆောင်နိုင်ငံအဖြစ် ရပ်တည်နိုင်ရေးအတွက် ၃ နှစ်တာ အမျိုးသားလမ်းပြမြေပုံကို အတည်ပြုခဲ့ပြီး 6G စီးပွားဖြစ်အသုံးချမှု၊ AI နည်းပညာမြှင့်တင်မှုနှင့် လုပ်ငန်းအမျိုးမျိုးတွင် AI အသွင်ကူးပြောင်းမှုကို အဓိကထား ဆောင်ရွက်သွားမည်ဟု ကြေညာခဲ့သည်။
ဝန်ကြီးဌာန၏ မတ် ၂၉ ရက် ထုတ်ပြန်ချက်အရ ICT နှင့် ပေါင်းစည်းလုပ်ငန်းဆောင်ရွက်ရေး အခြေခံအစီအစဉ်နှင့် ၂၀၂၆ ခုနှစ်မှ ၂၀၂၈ ခုနှစ်အထိ အသိဉာဏ်ရှိသော သတင်းအချက်အလက် လူ့အဖွဲ့အစည်းအတွက် ပြည့်စုံသော အစီအစဉ်တို့ကို သောကြာနေ့က ကျင်းပသည့် Information Communications Strategy Committee အစည်းအဝေး၌ အတည်ပြုခဲ့ခြင်းဖြစ်သည်။ အဆိုပါ မဟာဗျူဟာကို သက်ဆိုင်ရာ ဝန်ကြီးဌာနများနှင့် ပူးပေါင်း၍ ရေးဆွဲထားပြီး အမျိုးသား ဒစ်ဂျစ်တယ် အခြေခံအဆောက်အအုံ တိုးချဲ့ရေး၊ ဒစ်ဂျစ်တယ် စွမ်းရည်မြှင့်တင်ရေး၊ အမျိုးသား အသိဉာဏ်ရှိ သတင်းအချက်အလက်စနစ် တိုးတက်ရေးနှင့် လူတိုင်းပါဝင်နိုင်သည့် ဒစ်ဂျစ်တယ် ပတ်ဝန်းကျင် တည်ဆောက်ရေး ဟူသော အဓိက မဏ္ဍိုင် ၄ ခုအပေါ် အခြေခံထားသည်။
အခြေခံအဆောက်အအုံပိုင်းတွင် နိုင်ငံတစ်ဝန်းရှိ 5G ကွန်ရက်များကို standalone mode သို့ အဆင့်မြှင့်တင်မည်ဖြစ်ပြီး 6G နည်းပညာများကိုလည်း အမြန်ဆုံး ဖော်ဆောင်ကာ ၂၀၃၀ ခုနှစ်တွင် စီးပွားဖြစ် မိတ်ဆက်နိုင်ရေး ရည်မှန်းထားသည်။ ထို့အပြင် သတင်းအချက်အလက် လုံခြုံရေး စီမံခန့်ခွဲမှုကို ပိုမိုတင်းကျပ်မည်ဖြစ်ပြီး အစိုးရနှင့် ပုဂ္ဂလိက ကဏ္ဍ နှစ်ရပ်စလုံး၏ ဆိုက်ဘာကာကွယ်ရေး စွမ်းရည်ကို မြှင့်တင်မည်၊ အရည်အသွေးမြင့် ဒေတာစနစ်များအတွက် အခြေခံဖြစ်မည့် အမျိုးသား ပေါင်းစည်းဒေတာပလက်ဖောင်းကိုလည်း တည်ဆောက်မည်ဟု ဆိုသည်။
ဒစ်ဂျစ်တယ် ယှဉ်ပြိုင်နိုင်စွမ်း မြင့်မားစေရန် AI၊ ဆီမီကွန်ဒတ်တာ၊ ကွမ်တမ်ကွန်ပျူတာနှင့် ဘလော့ခ်ချိန်း စသည့် အရေးပါသော နည်းပညာများကို ဦးစားပေး ထောက်ပံ့သွားမည်ဖြစ်သည်။ ထို့ပြင် အထက်တန်းကျောင်းအဆင့်မှ စ၍ မဟာဘွဲ့နှင့် ပါရဂူအဆင့်အထိ လုပ်ငန်းလိုအပ်ချက်နှင့် ကိုက်ညီပြီး လက်တွေ့ကျကာ ဘက်စုံသုံးနိုင်သည့် ကျွမ်းကျင်ပညာရှင်များ ပေါ်ထွန်းလာစေရန် လူ့စွမ်းအားအရင်းအမြစ် ဖွံ့ဖြိုးရေး လမ်းကြောင်းများကို တည်ဆောက်မည်ဖြစ်ပြီး ဒစ်ဂျစ်တယ် စတင်လုပ်ကိုင်ကုမ္ပဏီများ၏ နိုင်ငံတကာ တိုးချဲ့မှုကိုလည်း ကူညီပံ့ပိုးကာ ပုဂ္ဂလိက ရင်းနှီးမြှုပ်နှံမှုများကိုလည်း အားပေးသွားမည်ဖြစ်သည်။
စက်မှုကဏ္ဍအတွက် မော်တော်ယာဉ် ထုတ်လုပ်ရေး၊ ကျန်းမာရေး၊ စိုက်ပျိုးရေးနှင့် ရေလုပ်ငန်း၊ ဆိပ်ကမ်းကဏ္ဍများတွင် AI အသုံးပြုမှုကို အရှိန်မြှင့်တင်ကာ ကုန်ထုတ်စွမ်းအား တိုးတက်စေရန် ရည်ရွယ်ထားသည်။ ထို့အတူ ဘေးအန္တရာယ် တုံ့ပြန်ရေး၊ စက်မှုလုံခြုံရေးနှင့် နေ့စဉ်လူမှုဘဝ လုံခြုံရေးအထိ အများပြည်သူ ဝန်ဆောင်မှုများနှင့် လုံခြုံရေးစနစ်များတွင် ဒစ်ဂျစ်တယ်နှင့် AI နည်းပညာများကို ပေါင်းစည်းအသုံးပြုကာ ကမ္ဘာ့အဆင့်မီ အသိဉာဏ်ရှိ အစိုးရတစ်ရပ် တည်ဆောက်ရန်လည်း ရည်မှန်းထားသည်။
တစ်ပြိုင်နက်တည်းတွင် AI ဒစ်ဂျစ်တယ် သင်တန်းအစီအစဉ်များနှင့် အားနည်းချက်ရှိသည့် လူထုအတွက် အထောက်အကူပြု ICT ကိရိယာများ ဖြန့်ဝေမှုကို တိုးချဲ့မည်ဖြစ်သည်။ အသုံးပြုသူများအနေဖြင့် ဒေတာပလန် ကုန်ဆုံးသွားသည့်နောက်တွင်ပင် အခြေခံ ဆက်သွယ်ရေးဝန်ဆောင်မှုများကို ဆက်လက် အသုံးပြုနိုင်စေရန် data safety option တစ်ခုကိုလည်း မိတ်ဆက်မည်ဖြစ်ပြီး ပိုမိုပါဝင်နိုင်သည့် ဒစ်ဂျစ်တယ် ပတ်ဝန်းကျင်တစ်ရပ် တည်ဆောက်သွားမည်ဟု ဝန်ကြီးဌာနက ပြောကြားခဲ့သည်။