အရှေ့အလယ်ပိုင်းဒေသရှိ ပဋိပက္ခ ပိုမိုရှည်ကြာလာပါက အစိုးရအနေဖြင့် လက်ရှိတင်သွင်းထားသည့် အရေးပေါ်ဘတ်ဂျက်အပြင် ၂၀၂၆ ခုနှစ် ဒုတိယနှစ်ဝက်တွင် နောက်ထပ် အရေးပေါ်ဘတ်ဂျက်တစ်ရပ် ကိုလည်း ထပ်မံစဉ်းစားနိုင်ကြောင်း တောင်ကိုရီးယား သမ္မတရုံး အရာရှိတစ်ဦးက ပြောကြားသည်။ ၎င်းက အဓိက အတိုက်အခံပါတီ၏ ဝမ် ၂၆.၂ ထရီလီယံ (အမေရိကန်ဒေါ်လာ ၁၇.၃ ဘီလီယံ) တန်ဖိုးရှိ အရေးပေါ်ဘတ်ဂျက်အဆိုပြုချက်သည် ဇွန် ၃ ရက် ဒေသန္တရ ရွေးကောက်ပွဲ မတိုင်မီ နိုင်ငံရေးအသာစီးရလိုသည့် ရည်ရွယ်ချက်ဖြင့် တင်သွင်းခြင်း ဖြစ်ကြောင်း စွပ်စွဲချက်ကိုလည်း ပယ်ချခဲ့သည်။
သမ္မတရုံး၏ နိုင်ငံရေးရေးရာ အတွင်းရေးမှူး ဟောင် အစ်-ပြို (Hong Ik-pyo) က MBN ရေဒီယိုနှင့် အင်တာဗျူးတွင် “အရှေ့အလယ်ပိုင်း အခြေအနေ ဆက်လက်ကြာမြင့်နေမည်ဆိုပါက လက်ရှိ အရေးပေါ်ဘတ်ဂျက်အပြီးတွင် ဒုတိယနှစ်ဝက်၌ နောက်ထပ် အရေးပေါ်ဘတ်ဂျက်တစ်ရပ် လိုအပ်လာနိုင်သည်” ဟု ပြောကြားခဲ့သည်။ ပြည်တွင်းနှင့် နိုင်ငံတကာ သုတေသနအဖွဲ့များက ယခုနှစ် တောင်ကိုရီးယား၏ စီးပွားရေးတိုးတက်မှု ခန့်မှန်းချက်ကို ၀.၄ ရာခိုင်နှုန်းခန့် လျှော့ချထားသည့်အပြင် လောင်စာဆီဈေးနှုန်းများမှာ အခွန်လျှော့ချထားသော်လည်း ဆက်လက်မြင့်တက်နေကြောင်း ၎င်းက ထောက်ပြခဲ့သည်။
ထို့ပြင် “အရှေ့အလယ်ပိုင်း စစ်ပွဲက နောက်ထပ် ဘယ်လောက်ကြာမည်ကို မသိနိုင်သလို စစ်ပွဲပြီးဆုံးသွားပြီးနောက်တောင် ထောက်ပံ့ရေးလမ်းကြောင်းတွေ ပုံမှန်ပြန်ဖြစ်ဖို့ အနည်းဆုံး ၃ လမှ ၄ လအထိ လိုနိုင်တယ်” ဟု ၎င်းက ဆိုသည်။ အမေရိကန် သမ္မတ ဒေါ်နယ် ထရမ့်က အီရန်ကို ဆန့်ကျင်သည့် စစ်ရေးကြိုးပမ်းမှုများတွင် မဟာမိတ်နိုင်ငံများ၏ ပံ့ပိုးမှုကို တိုက်တွန်းထားခြင်းနှင့် ပတ်သက်၍မူ ဟောင်က သတိထားရမည့် သဘောထားကို ထပ်မံအလေးထား ပြောကြားခဲ့ပြီး “အမေရိကန်က တောင်ကိုရီးယားကို တပ်ဖွဲ့စေလွှတ်ရန် တရားဝင် တောင်းဆိုထားခြင်း မရှိသေး” ဟု ဆိုသည်။
မည်သည့်နိုင်ငံမဆို တပ်ဖွဲ့စေလွှတ်ခြင်း သို့မဟုတ် စစ်ရေးအထောက်အပံ့ ပေးအပ်ခြင်းတွင် သံတမန်ရေးဆိုင်ရာ ဖိအားများ ကြုံတွေ့ရနိုင်ပြီး ယခုစစ်ပွဲသည်လည်း ကြိုတင်သံတမန်ညှိနှိုင်းမှု သို့မဟုတ် နီးကပ်သော ပူးပေါင်းဆောင်ရွက်မှု မရှိဘဲ စတင်ခဲ့ခြင်းဖြစ်ကြောင်း ၎င်းက သုံးသပ်သည်။ “ကုလသမဂ္ဂ လုံခြုံရေးကောင်စီ အဆင့်တွင်လည်း တရုတ်နှင့် ရုရှားတို့၏ ကန့်ကွက်မှုကြောင့် မည်သည့်ဆုံးဖြတ်ချက်ကိုမျှ ချမှတ်ရန် ခက်ခဲနေသည်” ဟု ၎င်းက ပြောကြားပြီး “ထို့ကြောင့် နိုင်ငံတကာဥပဒေအရ အထောက်အပံ့ပေးနိုင်သည့် အခွင့်အလမ်းမှာ အလွန်ကန့်သတ်ထားသည်” ဟု ထပ်လောင်းပြောဆိုခဲ့သည်။