တောင်ကိုရီးယားနိုင်ငံ ဆိုးလ်မြို့လယ်တွင် စနေနေ့က သမ္မတဟောင်း ယွန်းဆွတ်ယောလ် (Yoon Suk Yeol) ကို ရာထူးမှ ဖြုတ်ချခဲ့သည့် ၁ နှစ်ပြည့် အထိမ်းအမှတ်အဖြစ် ထောက်ခံသူများနှင့် ကန့်ကွက်သူများ နှစ်ဖက်စလုံး ဆန္ဒပြစုဝေးခဲ့ကြသည်။ လူထောင်ချီ ပါဝင်ခဲ့သည့် အဆိုပါ စုဝေးပွဲများအတွင်း ပဋိပက္ခဖြစ်ပွားမှု မရှိကြောင်း သိရသည်။
ဖွဲ့စည်းပုံအခြေခံဥပဒေခုံရုံးရှေ့တွင် လူ ၁,၀၀၀ နီးပါး စုဝေးကာ “End insurrection, treason” ဟူသော စာတန်းများကို ကိုင်ဆောင်ပြီး “ကြီးမားသည့် လူမှုရေး ပြုပြင်ပြောင်းလဲမှု” ကို တောင်းဆိုခဲ့ကြသည်။ ယင်းနေ့သည် ၂၀၂၄ ခုနှစ် ဒီဇင်ဘာ ၃ ရက်တွင် ယွန်းက စစ်အုပ်ချုပ်ရေး ကြေညာခဲ့ခြင်းအတွက် ဖွဲ့စည်းပုံအခြေခံဥပဒေခုံရုံးက ရာထူးမှ ဖြုတ်ချရန် ဆုံးဖြတ်ခဲ့သည့် ဆုံးဖြတ်ချက် ၁ နှစ်ပြည့်နေ့လည်း ဖြစ်သည်။
ယွန်းအား စစ်တပ်ကို အမျိုးသားလွှတ်တော်သို့ စေလွှတ်ခဲ့သည့်အတွက် အရေးပေါ်ကာလနှင့် ဆက်နွှယ်သည့် အပြစ်ရှိသည်ဟု ဖေဖော်ဝါရီလတွင် ခရိုင်တရားရုံးက စီရင်ကာ ထောင်ဒဏ်တစ်သက် ချမှတ်ထားပြီးဖြစ်သည်။ တစ်ဖက်တွင်လည်း ဆိုးလ်မြို့အနောက်ပိုင်းရှိ အမျိုးသားလွှတ်တော်အနီး၌ လူရာနှင့်ချီ စုဝေးကာ ယခင် အထက်တန်းအစိုးရရှေ့နေချုပ်အဖြစ် တာဝန်ယူခဲ့ဖူးသူ ယွန်းနှင့်ဆိုင်သည့် အမှုများအပေါ် အစိုးရရှေ့နေရုံး ပြုပြင်ပြောင်းလဲရေး လိုအပ်ကြောင်း တောင်းဆိုခဲ့ကြသည်။ ထို့အပြင် ယွန်းကို ထောက်ခံသူ ၃,၀၀၀ နီးပါးက ဖွဲ့စည်းပုံအခြေခံဥပဒေခုံရုံးနှင့် အမျိုးသားလွှတ်တော်အနီး၊ ဆိုးလ်မြို့လယ်တွင် ချီတက်ဆန္ဒပြကာ ရာထူးမှ ဖြုတ်ချခံရမှုကို ရှုတ်ချပြီး လွှတ်ပေးရန် တောင်းဆိုခဲ့ကြသည်။ ၎င်းတို့သည် တောင်ကိုရီးယားနှင့် အမေရိကန် နိုင်ငံတော်အလံများကို ဝှေ့ယမ်းခဲ့ကြပြီး အစ္စရေးအလံတစ်ခုလည်း တွေ့ရကြောင်း ဖော်ပြထားသည်။