အစ္စရေးဝန်ကြီးချုပ် ဘင်ဂျမင် နေတန်ယာဟုက အစ္စရေး၏ တိုက်ခိုက်မှုများကြောင့် အီရန်၏ သံမဏိထုတ်လုပ်နိုင်စွမ်း ၇၀ ရာခိုင်နှုန်းခန့် ပျက်စီးသွားပြီး လက်နက်ထုတ်လုပ်နိုင်စွမ်းလည်း သိသိသာသာ ထိခိုက်ခဲ့ကြောင်း ဧပြီ ၃ ရက်တွင် ပြောကြားခဲ့သည်။
ဂျေရုဆလင်မြို့တွင် ထုတ်ပြန်သည့် ဗီဒီယိုကြေညာချက်၌ နေတန်ယာဟုက “ကျွန်ုပ်တို့သည် မိတ်ဆွေအမေရိကန်တို့နှင့်အတူ အီရန်ရှိ အကြမ်းဖက်အုပ်ချုပ်ရေးကို ဆက်လက်ချေမှုန်းနေသည်” ဟု ပြောကြားပြီး အရာရှိများကို ပစ်မှတ်ထားတိုက်ခိုက်ခြင်း၊ တံတားများနှင့် အခြေခံအဆောက်အအုံများကို ဗုံးကြဲခြင်းများ လုပ်ဆောင်နေကြောင်း ဆိုသည်။ ၎င်းက “လေတပ်က မကြာသေးမီရက်များအတွင်း အီရန်၏ သံမဏိထုတ်လုပ်နိုင်စွမ်း ၇၀ ရာခိုင်နှုန်းကို ဖျက်ဆီးခဲ့သည်” ဟုလည်း ထပ်မံအတည်ပြုခဲ့သည်။
သံမဏိသည် ဒုံးကျည်၊ ဒရုန်းနှင့် သင်္ဘောများအပါအဝင် စက်မှုနှင့် စစ်ရေးထုတ်လုပ်မှုများတွင် အရေးပါသည့် ပစ္စည်းတစ်မျိုးဖြစ်သည်။ အဆိုပါတိုက်ခိုက်မှုကြောင့် အီရန်၏ အကြီးဆုံး သံမဏိစက်ရုံ ၂ ရုံဖြစ်သည့် Khuzestan Steel Company နှင့် Mobarakeh Steel Company တို့ လုပ်ငန်းရပ်ဆိုင်းသွားခဲ့ပြီး စက်ရုံများကို ပြန်လည်လည်ပတ်နိုင်ရန် လချီကြာမြင့်မည်ဟု အဆိုပါကုမ္ပဏီများက ပြောကြားထားသည်။
တုံ့ပြန်သည့်အနေဖြင့် အီရန်၏ တော်လှန်ရေးအစောင့်တပ် (Revolutionary Guard) က ဒေသတစ်ဝန်းနှင့် အစ္စရေးနိုင်ငံအတွင်းရှိ စက်မှုဇုန်များကို ဒုံးကျည်နှင့် ဒရုန်းများဖြင့် တိုက်ခိုက်ခဲ့ပြီး ယင်းသို့ ထပ်မံတိုက်ခိုက်လာပါက ပိုမိုပြင်းထန်စွာ တုံ့ပြန်မည်ဟုလည်း သတိပေးထားသည်။