အမေရိကန်သမ္မတ ဒေါ်နယ်ထရမ့်၏ အစိုးရက သံမဏိ၊ အလူမီနီယမ်နှင့် ကြေးနီတင်သွင်းမှုများအပေါ် ၅၀ ရာခိုင်နှုန်း အခွန်ချမှတ်မည်ဖြစ်ပြီး ဆေးဝါးမူပိုင်ထုတ်ကုန်များအပေါ်လည်း ၁၀၀ ရာခိုင်နှုန်း အခွန်အသစ်တစ်ရပ် ချမှတ်မည်ဟု ကြေညာလိုက်သည်။ အဆိုပါမူဝါဒများသည် တနင်္လာနေ့ ဝါရှင်တန်စံတော်ချိန် နံနက် ၁၂ နာရီ ၁ မိနစ်မှ စတင်အသက်ဝင်မည်ဖြစ်သည်။
အမေရိကန်ဘက်က ထုတ်ပြန်ချက်အရ သံမဏိ၊ အလူမီနီယမ်နှင့် ကြေးနီအပေါ် ကောက်ခံမည့် ၅၀ ရာခိုင်နှုန်း အခွန်ကို အမေရိကန်စားသုံးသူများ ပေးချေရသည့် “အပြည့်အဝတန်ဖိုး” အပေါ် အခြေခံမည်ဖြစ်ပြီး ပြည်ပဈေးနှုန်းများကို “အတုအယောင်လျှော့ချ” ထားသည့် ဈေးနှုန်းစနစ်ကို အသုံးမပြုတော့ကြောင်း ဆိုသည်။ ထို့ပြင် သတ္တုပါဝင်သော ထုတ်ကုန်များအပေါ် အခွန်တွက်ချက်မှုကိုလည်း ပြင်ဆင်မည်ဖြစ်ပြီး သံမဏိ၊ အလူမီနီယမ် သို့မဟုတ် ကြေးနီပါဝင်မှု အလေးချိန် ၁၅ ရာခိုင်နှုန်းအောက်ရှိပါက ထပ်မံကဏ္ဍအခွန် မကောက်ခံဘဲ ၁၅ ရာခိုင်နှုန်းကျော်ပါက ၂၅ ရာခိုင်နှုန်း အခွန်ကောက်ခံမည်ဟု အဆင့်မြင့် အမေရိကန်အရာရှိတစ်ဦးက အွန်လိုင်းသတင်းစာရှင်းလင်းပွဲတွင် ပြောကြားခဲ့သည်။
အိမ်ဖြူတော်က အဆိုပါပြင်ဆင်ချက်များသည် သတ္တုတင်သွင်းမှုများကြောင့် ဖြစ်ပေါ်နိုင်သည့် “နိုင်ငံတော်လုံခြုံရေးအန္တရာယ်” ကို ပိုမိုထိရောက်စွာ တုံ့ပြန်နိုင်ရန် ရည်ရွယ်ကြောင်း ပြောသည်။ လက်ရှိတွင် အမေရိကန်သည် ထုတ်ကုန်တစ်ခုချင်းစီအတွင်း ပါဝင်သည့် သတ္တုတန်ဖိုးကို အခြေခံကာ အခွန်တွက်ချက်နေသော်လည်း ယင်းလုပ်ငန်းစဉ်မှာ ရှုပ်ထွေးလှောင်းကြောင်း အရာရှိက ဆိုသည်။ ပြင်ဆင်မှုအရ သံမဏိ၊ အလူမီနီယမ် သို့မဟုတ် ကြေးနီ “အလွန်များပြားစွာ” ပါဝင်သည့် ထုတ်ကုန်များအပေါ် ၂၅ ရာခိုင်နှုန်း အခွန်ကို ရိုးရှင်းစွာ တိုက်ရိုက်ကောက်ခံမည်ဖြစ်ပြီး သတ္တုပါဝင်မှု ၁၅ ရာခိုင်နှုန်းအောက်ရှိသည့် အကွက်အသွယ်ထုတ်ကုန်များကိုမူ ကဏ္ဍအခွန်မှ ကင်းလွတ်မည်ဖြစ်သည်။ အဆိုပါပြောင်းလဲမှုများကြောင့် ကိုရီးယားကုမ္ပဏီများ တင်ပို့နေသည့် အဝတ်လျှော်စက်၊ ရေခဲသေတ္တာနှင့် အခြားကုန်ပစ္စည်းများအပေါ် သက်ရောက်မှုရှိနိုင်ကြောင်းလည်း သတင်းတွင် ဖော်ပြထားသည်။
အလားတူနေ့တွင် ထရမ့်သည် အမေရိကန်တွင် ထုတ်လုပ်ခြင်းမရှိသည့်အပြင် အမေရိကန်နှင့် အထူးနိုင်ငံအဆင့်ဈေးနှုန်း သဘောတူညီချက် (MFN pricing agreement) မရှိသည့် မူပိုင်ဆေးဝါးများအပေါ် ၁၀၀ ရာခိုင်နှုန်း အခွန်ချမှတ်မည့် သီးခြားစာတမ်းတစ်ရပ်ကိုလည်း လက်မှတ်ရေးထိုးခဲ့ကြောင်း အရာရှိက ပြောသည်။ သို့သော် တောင်ကိုရီးယား၊ ဂျပန်၊ ဆွစ်ဇာလန်နှင့် ဥရောပသမဂ္ဂတို့သည် အမေရိကန်နှင့် နှစ်နိုင်ငံကုန်သွယ်ရေး သဘောတူညီချက်များ ရှိထားသဖြင့် အဆိုပါ ၁၀၀ ရာခိုင်နှုန်း အခွန်မကျသင့်ကြောင်း ဖော်ပြသည်။
ကင်းလွတ်ခွင့်အနေဖြင့် အမေရိကန်တွင် ဆေးဝါးစက်ရုံတည်ဆောက်မည်ဟု ကတိပြုသည့် ကုမ္ပဏီများအတွက် အခွန်ကို ၂၀ ရာခိုင်နှုန်းသို့ လျှော့ချမည်ဖြစ်ပြီး MFN သဘောတူညီချက်နှင့် တွဲဖက်၍ အမေရိကန်တွင် စက်ရုံတည်ဆောက်နေသည့် ကုမ္ပဏီများအတွက်မူ အခွန်ကို သုညရာခိုင်နှုန်းအထိ လျှော့ချနိုင်မည်ဟု ဆိုသည်။ ထို့ပြင် ကုမ္ပဏီကြီးအချို့ကို ၁၂၀ ရက်၊ ကုမ္ပဏီအသေးများကို ၁၈၀ ရက် အချိန်ပေးကာ ၁၀၀ ရာခိုင်နှုန်း အခွန်စတင်မကောက်ခံမီ “reshoring” အစီအစဉ်များ ထုတ်ပြန်မထုတ်ပြန် ဆုံးဖြတ်ခွင့်ပေးမည်ဟုလည်း ပြောကြားခဲ့သည်။
သတ္တုအချိတ်အဆက်ထုတ်ကုန်များအပေါ် အခွန်ကောက်ခံမှုကြောင့် အမေရိကန်ပြည်သူများ၏ ကုန်ဈေးနှုန်းအပေါ် သက်ရောက်မှုရှိနိုင်မလားဟု မေးမြန်းရာတွင် ထိုအရာရှိက “စျေးနှုန်းအပေါ် လုံးဝသက်ရောက်မှုမရှိ” ဟု တုံ့ပြန်ခဲ့သည်။ သတ္တုနှင့် ဆေးဝါးအခွန်များသည် ၁၉၆၂ ခုနှစ် Trade Expansion Act ၏ Section 232 အပေါ် အခြေခံထားပြီး အမျိုးသားလုံခြုံရေးကို ထိခိုက်စေနိုင်သည်ဟု သမ္မတက သတ်မှတ်သည့်အခါ သွင်းကုန်များကို ပြင်ဆင်သတ်မှတ်ခွင့်ပေးထားသည့် ဥပဒေဖြစ်သည်။