---

IU နှင့် Byeon Woo-seok တို့ ပါဝင်သရုပ်ဆောင်ထားသည့် MBC ၏ ဇာတ်လမ်းတွဲသစ် “Perfect Crown” မပြသမီကတည်းကပင် ၎င်းတို့နှစ်ဦး၏ လုံးဝကွဲပြားသည့် ဖက်ရှင်ပုံစံကြောင့် ပရိသတ်အကြား စိတ်ဝင်စားမှု မြင့်တက်နေသည်။ အဆိုပါ ဇာတ်လမ်းတွဲကို ဧပြီ ၁၀ ရက်တွင် စတင်ထုတ်လွှင့်သွားမည်ဟု သိရသည်။

ဇာတ်လမ်းတွဲမှာ တောင်ကိုရီးယား၏ လူမှုအလွှာစနစ်ကို တုန်လှုပ်စေသည့် အနာဂတ်-ခေတ်သစ်ဆန်သော ဘုရင်စနစ်ကို နောက်ခံထားပြီး ချမ်းသာသည့် အမွေဆက်ခံသူတစ်ဦးနှင့် အာဏာရှိသော်လည်း လက်တွေ့အာဏာအနည်းဆုံးရှိသည့် မင်းသားတစ်ဦးတို့၏ အချစ်ရေးနှင့် အထက်တန်းလွှာကွာခြားမှုများကို ရိုက်ကူးထားခြင်းဖြစ်သည်။

IU က Sung Hee-joo အဖြစ် သရုပ်ဆောင်ထားပြီး သူမ၏ ဇာတ်ကောင်မှာ chaebol မိသားစု၏ အမွေဆက်ခံသူတစ်ဦးလည်းဖြစ်သလို လူအများ၏ အာရုံစိုက်မှုကို အစဉ်အမြဲ ဆွဲဆောင်နိုင်သည့် နာမည်ကြီးပုံရိပ်တစ်ခုလည်း ဖြစ်ကြောင်း သိရသည်။ “သူမရဲ့ အခြေခံစတိုင်က tailored suit တွေနဲ့ CEO ပုံစံထက်မြက်မှုရှိတဲ့ look ပါ။ ဒါပေမယ့် TPO (အချိန်၊ နေရာ၊ အခါအခွင့်နဲ့ ကိုက်ညီမှု) ကို ရည်ရွယ်ချက်ရှိရှိ ဖောက်ထွက်ပြီး အရောင်တောက်တောက်တွေ၊ ပေါ့ပါးတဲ့ dresses တွေ၊ jeans နဲ့ အနီရောင် sneakers တွေကိုပါ စမ်းသပ်ထားပါတယ်။ ရုပ်မြင်သံကြားမှာ ပိုပြီး စိတ်ဝင်စားဖွယ်ကောင်းအောင် ဖန်တီးထားတာပါ” ဟု IU က ပြောသည်။

သူမ၏ ဝတ်စားဆင်ယင်မှုက ငွေကြေး၊ သြဇာနှင့် လူသိများမှု အားလုံးကို ပိုင်ဆိုင်ထားပြီး ကိုယ့်ကိုယ်ကို ထင်ရှားစွာ ပြသရန် မကြောက်ရွံ့သည့် ဇာတ်ကောင်တစ်ဦးဖြစ်ကြောင်း ဖော်ပြနေသည်။

Grand Prince Ian အဖြစ် သရုပ်ဆောင်ထားသည့် Byeon Woo-seok ကလည်း “ကိုရီးယားမှာ ယနေ့အချိန်ထိ ဘုရင်မိသားစု ရှိနေသေးရင် ဘယ်လိုမျိုး ဖြစ်မလဲ” ဆိုသည့် အခြေခံအတွေးမှစ၍ ဇာတ်ကောင်ပုံစံကို တည်ဆောက်ခဲ့ကြောင်း ပြောသည်။ “ခေတ်သစ်ကာလထဲမှာလည်း အဲဒီ ဘုရင်စနစ် ဆက်ရှိနေတယ်ဆိုတဲ့ ယူဆချက်နဲ့ စတင်ခဲ့ပါတယ်။ ရိုးရာအလှတရားနဲ့ ကျွန်တော်တို့ နေထိုင်နေတဲ့ ခေတ်မီကမ္ဘာကို ပေါင်းစည်းဖို့ ကြိုးစားခဲ့ပါတယ်” ဟု ၎င်းက ဆိုသည်။

Byeon Woo-seok သည် costume team နှင့် နီးနီးကပ်ကပ် တိုင်ပင်ကာ ဝတ်စုံစမ်းသပ်ဝတ်ဆင်ခြင်းနှင့် အသေးစိတ်ပြင်ဆင်ခြင်းများ ဆောင်ရွက်ပြီး ဇာတ်ကောင်၏ အပြင်ပန်းပုံရိပ်ကို သေချာစွာ ဖန်တီးခဲ့ကြောင်း သိရသည်။ ထို့အပြင် ဇာတ်လမ်းတွဲ၏ စိတ်ကူးယဉ် ဘုရင်စနစ် setting ကို ပိုမိုအသက်ဝင်စေရန် ဝတ်စုံထုတ်လုပ်မှုတွင်လည်း ပါဝင်ခဲ့သည်ဟု ဖော်ပြထားသည်။

ဇာတ်ကောင်နှစ်ဦး၏ ကွာခြားမှုကို အထင်ရှားဆုံး မြင်ရသည့် နေရာမှာ ဝတ်စုံဒီဇိုင်းဖြစ်သည်။ IU က ထက်မြက်ပြီး အာဏာသဘောဆောင်သည့် အရောင်တောက် suit များကို ဝတ်ဆင်ထားသည့်အပြင် jeans နှင့် အနီရောင် sneakers များလို ပေါ့ပေါ့ပါးပါး look များကိုလည်း စမ်းသပ်ထားသည်။ ထို့အပြင် ရိုးရာ hanbok ကို ခေတ်မီပုံစံဖြင့် ပြန်လည်ဖော်ဆောင်ထားသည့် everyday hanbok ဒီဇိုင်းများလည်း ထည့်သွင်းထားသည်။

တစ်ဖက်တွင် Byeon Woo-seok ၏ ဇာတ်ကောင်ကတော့ royal attire ကို ခေတ်သစ်အမြင်ဖြင့် ပြန်လည်တင်ဆက်ထားသည်။ ဝတ်စုံများတွင် hanbok ၏ cheollik ဝတ်ရုံ၊ durumagi အပေါ်အင်္ကျီ စသည့် အစိတ်အပိုင်းများကို Western-style tailoring နှင့် ပေါင်းစပ်ထားပြီး silk ကဲ့သို့ ရိုးရာပိတ်စများ၊ otgoreum ကြိုးချည်ဒီဇိုင်းများကိုပါ ထိန်းသိမ်းထားသဖြင့် သန့်ရှင်းတည်ကြည်ပြီး ခေတ်မီတင့်တယ်သည့် ဖော်ပြမှုတစ်ရပ် ဖြစ်လာကြောင်း ဆိုသည်။

ထုတ်လုပ်ရေးအဖွဲ့ကတော့ သရုပ်ဆောင်နှစ်ဦး၏ အသေးစိတ်ကျသည့် ဇာတ်ကောင်ဝတ်စုံဒီဇိုင်းများသည် ဇာတ်လမ်းတွဲ၏ ထူးခြားသောကမ္ဘာထဲသို့ ကြည့်ရှုသူများကို ပိုမိုနစ်မြုပ်စေမည်ဟု ပြောကြားထားသည်။ အွန်လိုင်းပေါ်တွင်လည်း ပရိသတ်များက ၎င်းတို့ကို “want-to-be royal couple” ဟု ခေါ်ဝေါ်နေကြပြီး အပိုင်းတိုင်းတွင် ၎င်းတို့၏ ကွဲပြားသော look များ မည်သို့ ပြောင်းလဲလာမည်ကို စိတ်ဝင်တစား စောင့်မျှော်နေကြသည်။ Romantic ဇာတ်အိမ်၊ class tension နှင့် ဘုရင်စနစ်ကို ပြန်လည်စိတ်ကူးဖော်ထားသည့် ဤဇာတ်လမ်းတွဲသည် လူငယ်ကြည့်ရှုသူများနှင့် လူမှုကွန်ရက်ပေါ် buzz ရရှိရေးကို ဦးတည်ထားသည့် ရုပ်မြင်သံကြားအလုပ်တစ်ခုအဖြစ် ရပ်တည်နေသည်။