မီဒီတာရာနီယံအစားအစာက ဘာကြောင့် ထိရောက်သလဲ

သုတေသနအသစ်တစ်ခုအရ မျက်စိမြင်သာသည့်အဆင့်သာမက အစာအိမ်ထဲရောက်ပြီးနောက်တောင် သက်ရောက်မှုရှိနိုင်သည့် အစားအသောက်ရွေးချယ်မှုများက ဆဲလ်အတွင်းရှိ မိုက်တိုကွန်ဒရီးယားဆိုင်ရာ ပရိုတိန်းများကိုပါ ပြောင်းလဲစေနိုင်ကြောင်း တွေ့ရှိထားသည်။ အထူးသဖြင့် အိုလီဗ်ဆီ၊ ငါးနှင့် ပဲမျိုးစုံကို အခြေခံသည့် မီဒီတာရာနီယံအစားအစာသည် နှလုံးနှင့် ဦးနှောက်ကျန်းမာရေးအတွက်သာမက ဆဲလ်အဆင့်တွင်ပါ အကျိုးသက်ရောက်နိုင်ကြောင်း သုတေသနက ထောက်ပြထားသည်။

University of Southern California နှင့် Sapienza University of Rome မှ သုတေသီများက မီဒီတာရာနီယံအစားအစာကို တိတိကျကျ လိုက်နာသူများတွင် မိုက်တိုကွန်ဒရီးယားမှ ထွက်ပေါ်လာသည့် Humanin နှင့် SHMOOSE ဟု ခေါ်သော ပရိုတိန်းနှစ်မျိုး၏ ပမာဏပိုမိုမြင့်မားနေကြောင်း တွေ့ရှိခဲ့သည်။ လေ့လာမှုတွင် သွေးကြောမဆိုင်ရာ atrial fibrillation ရောဂါရှိသည့် သက်ကြီးရွယ်အို လူနာ ၄၉ ဦးကို ပါဝင်စစ်ဆေးခဲ့ပြီး ပျမ်းမျှအသက်မှာ ၇၈ နှစ် ဖြစ်သည်။ ယင်းရောဂါသည် လေဖြတ်နိုင်ခြေကို မြင့်တက်စေသည့် အခြေအနေတစ်ရပ်ဖြစ်သည်။ ထိုလူနာများတွင် ခန္ဓာကိုယ်အတွင်း အန္တရာယ်ရှိသော reactive oxygen species များနှင့် ခုခံအားကာကွယ်မှု မညီမျှမှုကြောင့် ဖြစ်ပေါ်သည့် oxidative stress ပိုမိုမြင့်မားလေ့ရှိသဖြင့် အစားအသောက်ကြောင့် ဖြစ်လာနိုင်သည့် ပြောင်းလဲမှုများကို ပိုမိုသိသာစွာ ဖော်ထုတ်နိုင်ခဲ့သည်။ Oxidative stress သည် အသက်အရွယ်ရင့်လာမှု၊ နှလုံးနှင့် သွေးကြောရောဂါများ၊ ဉာဏ်ရည်ကျဆင်းမှုတို့နှင့် ဆက်စပ်နေကြောင်းလည်း ဖော်ပြထားသည်။

ပါဝင်သူများကို မီဒီတာရာနီယံအစားအစာကို မည်မျှတင်းတင်းကျပ်ကျပ် လိုက်နာသနည်းဆိုသည့်အပေါ် မူတည်၍ အုပ်စုနှစ်စုခွဲခဲ့ရာ ပိုမိုလိုက်နာသူများတွင် Humanin နှင့် SHMOOSE ပရိုတိန်းအဆင့်များ ပိုမိုမြင့်တက်နေကြောင်း တွေ့ရသည်။ Humanin သည် နှလုံးသွေးကြောကာကွယ်မှု၊ ဉာဏ်ရည်လုပ်ဆောင်မှုနှင့် အသက်အရွယ်ရင့်ရော်မှု လုပ်ငန်းစဉ်များနှင့် ဆက်စပ်နေပြီး SHMOOSE သည် ဦးနှောက်ဆဲလ်များကို ကာကွယ်နိုင်ဖွယ်ရှိသကဲ့သို့ အယ်လ်ဇိုင်းမားရောဂါအန္တရာယ်နှင့်လည်း ဆက်နွှယ်နေကြောင်း သုတေသနများက ဆိုသည်။ ထို့ပြင် အိုလီဗ်ဆီ၊ ငါးနှင့် ပဲမျိုးစုံကို ပိုမိုစားသုံးသူများတွင် Humanin ပမာဏ မြင့်တက်ခဲ့ပြီး သန့်စင်ထားသော ကာဗိုဟိုက်ဒရိတ်ကို လျှော့စားသူများတွင် SHMOOSE ပမာဏ မြင့်တက်နေကြောင်းလည်း တွေ့ရှိခဲ့သည်။ ယင်းရလဒ်များအရ မီဒီတာရာနီယံအစားအစာ၏ ပါဝင်ပစ္စည်းတစ်ခုချင်းစီက မတူညီသည့် အခန်းကဏ္ဍများ ထမ်းဆောင်နေကြောင်း ပြသနေသည်။ ထို့အတူ Humanin ပမာဏ မြင့်မားသူများတွင် အန္တရာယ်ရှိသော reactive oxygen species များ ထုတ်လုပ်ပေးသည့် Nox2 အင်ဇိုင်း လုပ်ဆောင်မှု လျော့နည်းနေကြောင်းလည်း တွေ့ရှိခဲ့ပြီး မီဒီတာရာနီယံအစားအစာက oxidative stress ကို လျှော့ချပေးခြင်း၊ မိုက်တိုကွန်ဒရီးယားဆိုင်ရာ ပရိုတိန်းများကို သက်ရောက်စေခြင်းနှင့် အန္တရာယ်ရှိသော အင်ဇိုင်းလှုပ်ရှားမှုကို ဖိနှိပ်နိုင်ခြင်းတို့ကို ညွှန်ပြနေသည်။

သုတေသနက နေ့စဉ်စားသောက်မှုပုံစံများသည် ဆဲလ်အိုမင်းမှုနှင့် လုပ်ဆောင်နိုင်စွမ်းအပေါ် တိုက်ရိုက်သက်ရောက်နိုင်ကြောင်း ဖော်ပြနေပြီး အိုလီဗ်ဆီတစ်မျိုးတည်းကိုသာ ပိုစားရုံဖြင့် မလုံလောက်ဘဲ ငါး၊ ဟင်းသီးဟင်းရွက်များ အပါအဝင် အစားအစာမျိုးစုံကို မျှတစွာ စားသုံးရန် အရေးကြီးကြောင်းလည်း သတိပေးထားသည်။ ထို့အတူ အသက်အရွယ်ကြီးသူများအတွက်လည်း အစားအသောက်ပြောင်းလဲမှု၏ အကျိုးကျေးဇူးများ ရရှိနိုင်သေးသော်လည်း တစိုက်မတ်မတ် လိုက်နာမှုက အဓိကကျကြောင်း Q&A အပိုင်းတွင် ရှင်းလင်းဖော်ပြထားသည်။