လက်ဘနွန်တွင် ‘ခြိမ်းခြောက်မှုများ ဖယ်ရှားရေး’ အတွက် တပ်ဖွဲ့ဝင်များအပေါ် ကန့်သတ်ချက်မရှိဟု အစ္စရေး ပြော
လက်ဘနွန်အတွင်း တွေ့ရှိသည့် မည်သည့် ခြိမ်းခြောက်မှုကိုမဆို တုံ့ပြန်ဆောင်ရွက်ရန် တပ်ဖွဲ့ဝင်များအပေါ် ကန့်သတ်ချက်မရှိကြောင်း အစ္စရေး ကာကွယ်ရေးဝန်ကြီး အစ္စရေးလ် ကတ်ဇ်က ဇွန် ၂၁ ရက်တွင် ပြောကြားခဲ့သည်။ အစ္စရေးတပ်ဖွဲ့များသည် လက်ဘနွန်ပိုင်နက်အတွင်း သတ်မှတ်ထားသည့် “လုံခြုံရေးဇုန်” အတွင်း ဆက်လက်တပ်စွဲနေမည်ဖြစ်ကြောင်းလည်း ၎င်းက အတည်ပြုခဲ့သည်။
ကတ်ဇ်က “လက်ဘနွန်ရှိ IDF စစ်သည်များအတွက် ခြိမ်းခြောက်မှုများကို ဖယ်ရှားရန် ဆောင်ရွက်ခြင်းအပေါ် ယခင်ကလည်း ကန့်သတ်ချက်မရှိခဲ့သလို ယခုလည်း မရှိပါ။ ဝန်ကြီးချုပ် ဘင်ဂျမင် နေတန်ယာဟုနှင့် ကျွန်တော် ရှင်းလင်းစွာ ပြောကြားထားသည့်အတိုင်း အစ္စရေးအနေဖြင့် လက်ဘနွန်ရှိ လုံခြုံရေးဇုန်မှ ဆုတ်ခွာမည် မဟုတ်” ဟု ထုတ်ပြန်ချက်တွင် ဖော်ပြထားသည်။ အဆိုပါဇုန်သည် လက်ဘနွန်ပိုင်နက်အတွင်း ခန့်မှန်းအားဖြင့် ၁၀ ကီလိုမီတာ (၆ မိုင်) အထိ ဝင်ရောက်သည့် နယ်မြေဖြစ်ပြီး အစ္စရေးတပ်ဖွဲ့များ တပ်စွဲထားသည်။
ကတ်ဇ်၏ ပြောကြားချက်များသည် လက်ဘနွန်စစ်ပွဲ အဆုံးသတ်မတိုင်မီ ဝါရှင်တန်နှင့် ပိုမိုကျယ်ပြန့်သည့် သဘောတူညီချက်တစ်ရပ်အတွက် ဆွေးနွေးပွဲများ မစတင်သင့်ကြောင်း အီရန်က သတိပေးပြီး မကြာမီ ထွက်ပေါ်လာခြင်း ဖြစ်သည်။