---

ဇွန် ၄ ရက်တွင် ထုတ်ပြန်သည့် KakaoTalk Gift အဆင့်သတ်မှတ်ချက်အရ Starbucks ၏ ၅၀,၀၀၀ ဝမ်တန် e-card voucher သည် “Cafe” အမျိုးအစား၌ ပထမနေရာကို ပြန်လည်ရယူနိုင်ခဲ့သည်။ မေ ၁၈ ရက်က ဂွမ်ဂျူး ဒီမိုကရေစီလှုပ်ရှားမှုနှင့် ဆက်စပ်သည့် “Tank Day” ပရိုမိုးရှင်းကြောင့် ဖြစ်ပွားခဲ့သော ဝယ်ယူမှုကျဆင်းမှုနောက်ပိုင်း ပြန်လည်မြင့်တက်လာခြင်းလည်း ဖြစ်သည်။

KakaoTalk Gift ၏ အဆင့်သတ်မှတ်ချက်အရ Starbucks ၏ ၅၀,၀၀၀ ဝမ် e-card voucher သည် ပထမ၊ ကော်ဖီနှစ်ခွက်နှင့် အချိုပွဲတစ်မျိုးပါဝင်သည့် voucher package က ဒုတိယ၊ ၃၀,000 ဝမ် e-card voucher က စတုတ္ထနေရာတွင် ရပ်တည်နေသည်။ မေ ၂၅ ရက်ကတော့ Mega MGC Coffee voucher များက အမျိုးအစားအတွင်း ပထမ၊ ဒုတိယနှင့် တတိယနေရာများကို သိမ်းပိုက်ခဲ့ပြီး Starbucks သည် နှစ်ပေါင်းများစွာ ထိပ်ဆုံးနေရာကို ဆုံးရှုံးခဲ့ရသည်။ အဆိုပါ အဆင့်သတ်မှတ်ချက်များကို ရောင်းအားပမာဏ၊ အသုံးပြုသူများ၏ wishlist ထဲသို့ ထည့်သွင်းမှုနှင့် နှိပ်ဝင်ကြည့်ရှုမှုနှုန်း စသည့် အချက်များအပေါ် အခြေခံ၍ တွက်ချက်ထားခြင်းဖြစ်သည်။

အွန်လိုင်းပေါ်တွင်လည်း တုံ့ပြန်မှုများ မတူကွဲပြားလျက်ရှိသည်။ အချို့က Starbucks ကို သပိတ်မှောက်သည့် လှုပ်ရှားမှုသည် အလွန်အကျွံဖြစ်သွားကြောင်း ပြောဆိုကြပြီး၊ အချို့ကမူ လူထုဦးဆောင်သည့် သပိတ်မှောက် လှုပ်ရှားမှုတွင် အစိုးရပါဝင်လာသည်ဟု ဝေဖန်ကြသည်။ တစ်ဖက်တွင်လည်း သပိတ်၏ သက်ရောက်မှုများသည် ဆက်လက်တည်ရှိနေဆဲဖြစ်ကြောင်း ပြောဆိုသူများ ရှိပြီး Starbucks သည် KakaoTalk Gift အဆင့်သတ်မှတ်ချက်တွင် ပြန်လည်ထိပ်ဆုံးသို့ ရောက်လာသော်လည်း အမှန်တကယ်ရောင်းအားတွင်မူ သက်ရောက်မှုခံနေရဆဲဖြစ်ကြောင်း ထောက်ပြကြသည်။

အဆိုပါ အငြင်းပွားမှုသည် Starbucks က မေ ၁၈ ရက်တွင် “Tank Day” အစီအစဉ်ကို ကြော်ငြာခဲ့ရာမှ စတင်ခဲ့ခြင်းဖြစ်သည်။ ထိုနေ့သည် ၁၉၈၀ ခုနှစ် ဂွမ်ဂျူး ဒီမိုကရေစီလှုပ်ရှားမှု အမှတ်ရနေ့ဖြစ်သဖြင့် ကိုရီးယားနိုင်ငံ၏ အရေးပါဆုံး ဒီမိုကရေစီတိုက်ပွဲတစ်ခုအပေါ် မလေးမစားပြုသလို ဖြစ်နေသည်ဟု ဝေဖန်ခံခဲ့ရသည်။ နောက်ပိုင်းတွင် Starbucks က အဆိုပါ ပရိုမိုးရှင်းအတွက် တောင်းပန်ခဲ့သည်။