---

ကိုရီးယားကြက်ကြော်အမှတ်တံဆိပ်ကြီး bhc သည် အမေရိကန်ဈေးကွက်တွင် တိုးချဲ့မှု၏ နောက်တစ်လှမ်းအဖြစ် ဆန်ဖရန်စစ္စကိုမြို့ရှိ H Mart အတွင်း ပထမဆုံးဆိုင်ကို ဖွင့်လှစ်လိုက်သည်။ ၎င်းသည် အမေရိကန်ပြည်ထောင်စုအတွင်း အကြီးဆုံး အာရှစူပါမားကတ်ကွန်ရက်ဖြစ်သည့် H Mart သို့ ဝင်ရောက်ဖွင့်လှစ်သည့် bhc ၏ ပထမဆုံးခြေလှမ်းလည်း ဖြစ်သည်။

bhc သည် ၂၀၂၃ ခုနှစ်တွင် အမေရိကန်ဈေးကွက်သို့ စတင်ဝင်ရောက်ခဲ့ပြီး လက်ရှိတွင် H Mart တည်နေရာများစွာသို့ ဆက်လက်တိုးချဲ့ရန် ရည်ရွယ်ထားကြောင်း ပြောကြားသည်။ ဆန်ဖရန်စစ္စကိုဆိုင်မှာ စတုရန်းပေ ၄၄၀ သာရှိပြီး အစားအသောက်ဈေးကွက်အတွင်း ကောင်တာနှင့် kiosk ပုံစံဖြင့် လည်ပတ်နေသည့် အမေရိကန်တွင် bhc ၏ ပထမဆုံး food-court-style ဆိုင်ဖြစ်သလို မြို့တွင်း ပထမဆုံး တည်နေရာလည်း ဖြစ်သည်။ ဆိုင်ကို မေလအစောပိုင်းတွင် ဖွင့်လှစ်ခဲ့ပြီးနောက် ပုံမှန်တန်းစီဝယ်ယူနေကြကြောင်း ကုမ္ပဏီက ဆိုသည်။

H Mart သည် အမေရိကန်တစ်ဝှမ်းတွင် ဆိုင်ခွဲ ၁၀၀ ကျော် လည်ပတ်နေပြီး ကိုရီးယားလူမျိုးများသာမက ကိုရီးယားအစားအစာကို နှစ်သက်လာသည့် အခြားစားသုံးသူများကိုလည်း ဆွဲဆောင်နိုင်နေသည်။ bhc ၏ U.S. operations အကြီးအကဲ Brian Shin က “လူသွားလူလာများတဲ့ စူပါမားကတ်အတွင်း ဆိုင်ဖွင့်ခြင်းအားဖြင့် နေ့စဉ်ဘဝအတွင်းမှာပဲ ကျွန်တော်တို့ရဲ့ မီနူးကို ပိုမိုများပြားတဲ့ စားသုံးသူတွေ စမ်းသပ်နိုင်မယ်” ဟု ပြောကြားထားသည်။

အမေရိကန်စားသုံးမှုပုံစံနှင့် ကိုက်ညီစေရန် food court မီနူးတွင် လက်ဖြင့် စားသုံးရလွယ်ကူသည့် wings နှင့် tenders ကို အဓိကထားပြီး Bburinkle အပါအဝင် အမျိုးအစား ၄ မျိုး ထည့်သွင်းထားသည်။ Bburinkle သည် cheese နှင့် ဟင်းသီးဟင်းရွက်မှုန့်ပါ coating ကြောင့် နာမည်ကြီးသည့် bhc ၏ အရောင်းရဆုံးအရသာဖြစ်သည်။ Dipping sauce ကို နှစ်သက်သည့် ဈေးကွက်ကို ရည်ရွယ်၍ Matchoking၊ Bburingmayo စသည့် သီးသန့်ဆော့စ် ၄ မျိုးလည်း ထည့်သွင်းထားသည်။ ထို့အပြင် whole chicken portions များ၊ kimchi fried rice၊ instant noodles နှင့် cheese buldak ကဲ့သို့ ကိုရီးယားအစားအစာများကိုလည်း ရရှိနိုင်သည်။

bhc ၏ မိခင်ကုမ္ပဏီ Dining Brands Group သည် Bonchon ကဲ့သို့ ပြိုင်ဘက်များ အမြစ်တွယ်နေပြီးသား အမေရိကန်ဈေးကွက်အတွင်း ဝင်ရောက်လာခြင်းဖြစ်သည်။ သို့သော် bhc သည် ကနေဒါနှင့် စင်ကာပူအပါအဝင် နိုင်ငံ ၈ နိုင်ငံတွင် ဆိုင်ခွဲ ၄၇ ခု လည်ပတ်နေပြီး H Mart နှင့် ချိတ်ဆက်ဖွင့်လှစ်သည့် မော်ဒယ်ကို တိုးတက်မှုအတွက် အရေးပါသော လမ်းကြောင်းတစ်ခုအဖြစ် သတ်မှတ်ထားသည်။ ကုမ္ပဏီက အမေရိကန်တစ်ဝှမ်းရှိ အခြား H Mart ဆိုင်ခွဲများတွင်လည်း ဆက်လက်ချဲ့ထွင်သွားမည်ဟု ပြောကြားထားသည်။