အီရန်က “ရန်သူ၏ လေယာဉ်မှူး” ကို လက်လွှဲပေးရန် ပြည်သူကို တိုက်တွန်း၊ ပျောက်ဆုံး အမေရိကန် လေယာဉ်မှူးကို အမေရိကန် ဆက်လက် အသည်းအသန် ရှာဖွေနေ

အီရန်က ပစ်ချခဲ့သည်ဟု ဆိုသော အမေရိကန် တိုက်လေယာဉ်မှ ပျောက်ဆုံးနေသည့် လေယာဉ်မှူးကို ရှာဖွေရန် အမေရိကန် စစ်တပ်က စနေနေ့တွင်လည်း ဆက်လက် ကြိုးပမ်းနေကြောင်း သိရသည်။ တစ်ချိန်တည်းမှာပင် အီရန်အစိုးရက ပြည်သူများကိုလည်း “ရန်သူ၏ လေယာဉ်မှူး” ကို ရဲလက်သို့ အပ်နှံရန် တိုက်တွန်းခဲ့ရာ ဒေသတွင်း တင်းမာမှုများ ပိုမို မြင့်တက်လာခဲ့သည်။

AP သတင်းအရ သောကြာနေ့တွင် အီရန်က အမေရိကန် စစ်လေယာဉ် ၂ စီးကို ပစ်ချခဲ့ပြီး နောက်တစ်စီးရှိ လေယာဉ်မှူးကို ကယ်တင်နိုင်ခဲ့ကြောင်း ဆိုသည်။ ၎င်းသည် ဖေဖော်ဝါရီ ၂၈ ရက်က အမေရိကန်-အစ္စရေး ပူးတွဲတိုက်ခိုက်မှုဖြင့် စတင်ခဲ့သည့် စစ်ပွဲ ၆ ပတ်မြောက်ကာလအတွင်း အီရန်နယ်မြေထဲ၌ အမေရိကန် လေယာဉ် ပျက်ကျဆုံးရှုံးခဲ့သည့် ပထမဆုံး ဖြစ်ရပ်လည်း ဖြစ်သည်။

စစ်ပွဲကြောင့် လူထောင်ပေါင်းများစွာ သေဆုံးခဲ့ပြီး ကမ္ဘာ့ဈေးကွက်များ တုန်လှုပ်သွားကာ အရေးကြီး သင်္ဘောလမ်းကြောင်းများ ပြတ်တောက်ခဲ့သလို လောင်စာဆီ ဈေးနှုန်းများလည်း မြင့်တက်လာခဲ့သည်။ အမေရိကန် သမ္မတ ဒေါ်နယ် ထရန့်က မီဒီယာမိန့်ခွန်းတစ်ရပ်တွင် အီရန်ကို “အနိုင်ယူပြီး လုံးဝ ဖျက်ဆီးထားပြီ” ဟု ပြောပြီး ၂ ရက်အကြာတွင် ယခုကဲ့သို့ စစ်လေယာဉ် ပစ်ချခံရမှု ပေါ်ပေါက်လာခြင်း ဖြစ်သည်။

စနေနေ့တွင် အာရပ်စော်ဘွားများပြည်ထောင်စု ဒူဘိုင်းမြို့၌ အမေရိကန် နည်းပညာကုမ္ပဏီ Oracle ၏ ရုံးချုပ်ကို အီရန် ဒရုန်းဟု ယူဆရသည့် တိုက်ခိုက်မှုကြောင့် ထိခိုက်ပျက်စီးခဲ့သည်။ ထို့အပြင် အီရန် နျူကလီးယား စွမ်းအင်အဖွဲ့က Bushehr နျူကလီးယား စက်ရုံအနီး လေကြောင်းတိုက်ခိုက်မှုကြောင့် လုံခြုံရေးအစောင့် တစ်ဦး သေဆုံးပြီး အထောက်အကူပြု အဆောက်အအုံတစ်ခု ပျက်စီးခဲ့ကြောင်း ပြောကြားသည်။

အီရန် နိုင်ငံခြားရေးဝန်ကြီး Abbas Araghchi က Islamabad သို့ သွားရောက်ဆွေးနွေးရန် “ဘယ်တုန်းကမှ ငြင်းပယ်ခဲ့ခြင်း မရှိ” ဟု ပြောဆိုခဲ့ပြီး၊ ပက်ကစ္စတန်ကလည်း အမေရိကန်နှင့် အီရန်အကြား ဆွေးနွေးပွဲများကို မကြာမီ အိမ်ရှင်အဖြစ် လက်ခံမည်ဟု ယခင်က ကြေညာထားသည်။ ပက်ကစ္စတန်၊ တူရကီနှင့် အီဂျစ်မှ ကြားဝင်ညှိနှိုင်းသူများက စစ်ရေးတင်းမာမှု လျှော့ချရေးနှင့် ဟော်မုဇ် ရေလက်ကြား ပြန်ဖွင့်ရေးအတွက် အမေရိကန်နှင့် အီရန်ကို ဆွေးနွေးပွဲစားပွဲသို့ ပြန်လည်ခေါ်ဆောင်ရန် ကြိုးပမ်းနေကြောင်း ဒေသတွင်း တာဝန်ရှိသူ ၂ ဦးက ဆိုသည်။ ထရန့်ကလည်း Truth Social တွင် တနင်္လာနေ့ နောက်ဆုံးရက်ကို ထပ်မံ သတိပေးကာ “၄၈ နာရီအတွင်း မလျှင် လူမိုးကြီးသကဲ့သို့ အလွန်ဆိုးရွားလာမည်” ဟု အီရန်ကို ခြိမ်းခြောက်ခဲ့သည်။

အီရန်တွင် ပျောက်ဆုံးနေသည့် အမေရိကန် လေယာဉ်မှူးကို ရှာဖွေမှုကို အနောက်တောင်ပိုင်း Kohgiluyeh and Boyer-Ahmad ပြည်နယ်၏ တောင်တန်းဒေသ၌ အဓိကထား လုပ်ဆောင်နေသည်။ အိမ်ဖြူတော်နှင့် ပင်တဂွန်တို့က တရားဝင်အသေးစိတ် မထုတ်ပြန်သော်လည်း AP ရရှိသည့် ပင်တဂွန် အီးမေးလ်တွင် “အရှေ့အလယ်ပိုင်း၌ လေယာဉ်တစ်စင်း ပစ်ချခံရကြောင်း” သတင်းရရှိခဲ့သည်ဟု ဖော်ပြထားသည်။ အမှုထမ်းတစ်ဦး ကယ်ဆယ်နိုင်ခဲ့သော်လည်း ဒုတိယ အမှုထမ်းတစ်ဦး၏ အခြေအနေကို မသိရသေးကြောင်း အမေရိကန် အောက်လွှတ်တော် လက်နက်ကိုင်ဝန်ဆောင်မှု ကော်မတီသို့ ပင်တဂွန်က အသိပေးခဲ့သည်။

တစ်ပြိုင်နက်တည်းတွင် အီရန် အစိုးရပိုင် မီဒီယာကလည်း ပင်လယ်ကွေ့ထဲတွင် အမေရိကန် A-10 တိုက်ခိုက်ရေး လေယာဉ်တစ်စင်း ပစ်ချခံရပြီး ကျိုးကျခဲ့ကြောင်း ဖော်ပြခဲ့သည်။ သို့သော် အမေရိကန် တာဝန်ရှိသူတစ်ဦးကမူ လေယာဉ် ကျဆုံးခဲ့ခြင်းလား၊ ပစ်ချခံခဲ့ခြင်းလား မသေချာသေးကြောင်း ပြောသည်။

ဒါ့အပြင် အီရန် ပါလီမန် ဥက္ကဋ္ဌ Mohammad Bagher Qalibaf က Bab-el-Mandeb ရေလက်ကြား၌ သင်္ဘောသွားလာမှုကို ပူးပေါင်း ထိခိုက်စေနိုင်ကြောင်း သွယ်ဝိုက် သတိပေးခဲ့သည်။ အကျယ် ၃၂ ကီလိုမီတာရှိသည့် ထိုရေလက်ကြားသည် ပင်လယ်နီ၊ Aden ပင်လယ်ကွေ့နှင့် အိန္ဒိယသမုဒ္ဒရာကို ဆက်သွယ်ပေးပြီး ကမ္ဘာ့ ပင်လယ်ကြောင်းဆိုင်ရာ ရေနံ၏ ၁၀ ပုံ ၁ ပုံကျော်နှင့် ကွန်တိန်နာသင်္ဘောများ၏ ၄ ပုံ ၁ ပုံ တင်သွားလာရာ လမ်းကြောင်း ဖြစ်သည်။

စစ်ပွဲ စတင်ချိန်မှစ၍ အီရန်ဘက်တွင် လူ ၁,၉၀၀ ကျော် သေဆုံးခဲ့ကြောင်း သိရသည်။ Gulf Arab နိုင်ငံများနှင့် အစ္စရေး သိမ်းပိုက်ထားသော West Bank တွင် လူ ၂ ဒါဇင်ကျော် သေဆုံးခဲ့ပြီး အစ္စရေးတွင် ၁၉ ဦး၊ အမေရိကန် စစ်မှုထမ်း ၁၃ ဦး သေဆုံးခဲ့သည်။ လက်ဘနွန်တွင်လည်း လူ ၁,၄၀၀ ကျော် သေဆုံးခဲ့ပြီး နေရပ်စွန့်ခွာသူ ၁ သန်းကျော် ရှိလာကာ အစ္စရေး စစ်သား ၁၀ ဦးလည်း သေဆုံးခဲ့ကြောင်း ဖော်ပြထားသည်။