ပုပ်ရဟန်းမင်း လီယို ၁၄ က အီစတာမတိုင်မီ အမေရိကန်နှင့် အစ္စရေး၏ အီရန်အပေါ် စစ်ရေးလှုပ်ရှားမှုများကို ရပ်တန့်ရန် တိုက်တွန်းပြီး ကမ္ဘာ့ခေါင်းဆောင်များအနေဖြင့် ဆွေးနွေးညှိနှိုင်းမှုလမ်းကြောင်းသို့ ပြန်လည်ရောက်ရှိကြရန် တောင်းဆိုလိုက်သည်။
ရောမမြို့ပြင် Castel Gandolfo ရှိ ပုပ်ရဟန်းမင်း၏ နားနေရာမှ ဗာတီကန်သို့ ပြန်လာစဉ် မတ် ၃၁ ရက်က သတင်းထောက်များနှင့် တွေ့ဆုံရာတွင် ၎င်းက သမ္မတ ဒေါ်နယ် ထရန့်ပ်သည် စစ်ပွဲကို အဆုံးသတ်လိုကြောင်း မကြာသေးမီက ပြောကြားခဲ့သည်ဟု ကြားသိရကြောင်း ဆိုသည်။ ထို့ပြင် “ထွက်ပေါက်” တစ်ခုကို ရှာဖွေနေသည်ဟု မျှော်လင့်ကြောင်းလည်း ပြောကြားပြီး ဗုံးကြဲတိုက်ခိုက်မှုနှင့် အကြမ်းဖက်မှုကို လျှော့ချနိုင်မည့် နည်းလမ်းတစ်ခု ရှာဖွေရန်မှာ အရှေ့အလယ်ပိုင်းနှင့် အခြားဒေသများတွင် တဖြည်းဖြည်း တိုးပွားနေသည့် အမုန်းတရားကို လျှော့ချရေးအတွက် အရေးကြီးသည့် အစိတ်အပိုင်းတစ်ခုဖြစ်မည်ဟု ဆိုသည်။
ပုပ်ရဟန်းမင်း လီယို ၁၄ ကလည်း သန့်ရှင်းဝတ်ပြုချိန်အတွင်း “အထူးသဖြင့် အီစတာကာလတွင် ငြိမ်းချမ်းရေးက ကျွန်ုပ်တို့၏ နှလုံးသားထဲ၌ အုပ်စိုးနိုင်ရန်” ကမ္ဘာ့ခေါင်းဆောင်အားလုံးကို ဆွေးနွေးမှုများ ပြန်လည်စတင်ရန်နှင့် အကြမ်းဖက်မှုကို လျှော့ချနိုင်မည့် နည်းလမ်းများ ရှာဖွေရန် တိုက်တွန်းခဲ့သည်။ ခရစ်ယာန်ဘာသာဝင်များအတွက် အရေးကြီးဆုံးကာလဖြစ်သည့် Holy Week အတွင်း ထုတ်ဖော်ခဲ့သော အဆိုပါမှတ်ချက်များ၌ “ယခုကာလသည် တစ်နှစ်တာအတွင်း အမြင့်မြတ်ဆုံးအချိန်ဖြစ်သင့်ပြီး ငြိမ်းချမ်းရေးနှင့် ဆင်ခြင်သုံးသပ်မှုအတွက် အချိန်ဖြစ်သည်” ဟု ၎င်းက ပြောကြားခဲ့သည်။ သို့သော် ကမ္ဘာ့နေရာအနှံ့အပြားတွင် အပြစ်မဲ့ကလေးငယ်များအပါအဝင် နာကျင်ခံစားနေရမှုနှင့် သေဆုံးမှုများ ဆက်လက်ဖြစ်ပွားနေဆဲဖြစ်ကြောင်းလည်း ၎င်းက ထောက်ပြခဲ့သည်။
တနင်္ဂနွေနေ့က Palm Sunday မစ္စ၌လည်း ၎င်းက စစ်ပွဲဖန်တီးသူများနှင့် ဘုရားသခင်အမည်ကို အသုံးပြု၍ အကြမ်းဖက်မှုကို တရားမျှတအောင် ကြိုးပမ်းနေသူများ၏ ဆုတောင်းများကို ဘုရားသခင် နားမထောင်ကြောင်း ပြောကြားခဲ့ပြီး စိန့်ပီတာရင်ပြင်ရှိ ပွဲတော်မစ္စအတွင်း အရှေ့အလယ်ပိုင်းရှိ ခရစ်ယာန်များအတွက် အထူးဆုတောင်းပေးခဲ့သည်။ အီရန်နှင့် ပတ်သက်သည့် စစ်ရေးပဋိပက္ခတွင် ပါဝင်နေသည့် နှစ်ဖက်ခေါင်းဆောင်များကလည်း ၎င်းတို့၏ လုပ်ရပ်များကို ဘာသာရေးအကြောင်းပြချက်များဖြင့် တရားမျှတအောင် ကြိုးပမ်းနေကြပြီး အမေရိကန်အစိုးရအရာရှိများ၊ အထူးသဖြင့် ကာကွယ်ရေးဝန်ကြီး Pete Hegseth ကလည်း စစ်ရေးအားသာမှုဖြင့် ရန်သူကို အပြီးအပိုင် နှိမ်နင်းနေသည့် ခရစ်ယာန်နိုင်ငံတော်တစ်ရပ်အဖြစ် ပုံဖော်သုံးစွဲခဲ့သည်။ ရုရှား အော်ထော်ဒေါ့စ်ချာ့ချ်ကလည်း ယူကရိန်းကို ကျူးကျော်မှုအား “သန့်ရှင်းသောစစ်” ဟု တင်စားကာ မကောင်းမှုဘက်သို့ ဦးတည်သွားပြီဟု ယူဆသည့် အနောက်ကမ္ဘာကို ဆန့်ကျင်သည့် စစ်ပွဲအဖြစ် သတ်မှတ်ခဲ့သည်။
Holy Week ဆက်လက်ကျင်းပနေချိန်တွင် ပုပ်ရဟန်းမင်း လီယို ၁၄ သည် ကြာသပတေးနေ့၌ စိန့်ဂျွန်လတ်ရန် ဘက်ဆီလီကာတွင် နှစ်ပေါင်းများစွာ ပုပ်ရဟန်းမင်းများ ဆက်တိုက်ကျင်းပလာခဲ့သည့် ခြေထောက်ဆေးကြောခြင်း အခမ်းအနားကို ဆောင်ရွက်မည်ဖြစ်သည်။ သောကြာနေ့တွင် ရောမမြို့ Coliseum ၌ ခရစ်တော်၏ ဒုက္ခခံမှုနှင့် ကားတိုင်တင်ခံရမှုကို အမှတ်တရအဖြစ် ပြုလုပ်သည့် Good Friday လှည့်လည်ပွဲကို ဦးဆောင်မည်ဖြစ်ပြီး ကိုယ်တိုင် ကားတိုင်ကို ထမ်းမည်ဖြစ်သည်။ စနေနေ့ညပိုင်းတွင် Easter Vigil ဝတ်ပြုမှုအတွင်း ခရစ်ယာန်အသင်းဝင်အသစ်များကို ဖျောမြောက်မည်ဖြစ်ပြီး နာရီအနည်းငယ်အကြာ အီစတာတနင်္ဂနွေနေ့တွင် ခရစ်ယာန်များက ယေရှုရှင်ပြန်ထမြောက်ခြင်းကို အထိမ်းအမှတ်ပြုမည်ဖြစ်သည်။ အီစတာတနင်္ဂနွေနေ့ မစ္စကို စိန့်ပီတာရင်ပြင်တွင် ဦးဆောင်ကျင်းပပြီးနောက် ဘက်ဆီလီကာ၏ loggia မှတစ်ဆင့် အီစတာဩဘာကို ပေးအပ်မည်ဖြစ်သည်။