အီရန်နိုင်ငံသည် စစ်ပွဲအဆုံးသတ်ရေးအတွက် အမေရိကန်က တင်ပြထားသည့် အချက် ၁၅ ချက်ပါ အစီအစဉ်ကို ကြားခံများမှတစ်ဆင့် တုံ့ပြန်ပေးပို့ခဲ့ပြီး ယခုအခါ ဝါရှင်တန်၏ အဖြေကို စောင့်ဆိုင်းနေကြောင်း Tasnim သတင်းဌာနက ကြာသပတေးနေ့တွင် ဖော်ပြသည်။
ပါကစ္စတန် အရာရှိများ၏ ပြောကြားချက်အရ ထိုအမေရိကန် အစီအစဉ်ကို ပါကစ္စတန်မှတစ်ဆင့် အီရန်ထံ ပေးပို့ခဲ့ခြင်းဖြစ်ပြီး အစီအစဉ်၏ အကြောင်းအရာ အတိအကျကိုမူ တရားဝင် ထုတ်ပြန်ထားခြင်း မရှိသေးပေ။ Tasnim ကလည်း သတင်းရင်းမြစ်တစ်ခုကို ကိုးကား၍ “အမေရိကန်က အဆိုပြုထားတဲ့ အချက် ၁၅ ချက်အပေါ် အီရန်ရဲ့ တုံ့ပြန်ချက်ကို မနေ့ညက ကြားခံများမှတစ်ဆင့် တရားဝင် ပေးပို့ခဲ့ပြီး အခု အခြားဖက်ရဲ့ အဖြေကို စောင့်နေပါတယ်” ဟု ဖော်ပြခဲ့သည်။
သတင်းရင်းမြစ်၏ အဆိုအရ အီရန်ဘက်က အချက် ၅ ချက်ပါ ပြန်လည်အဆိုပြုချက်ကို တင်ပြခဲ့ပြီး ယင်းတွင် “ရန်လိုမှု” ကို ရပ်တန့်ရန်၊ အစ္စရေး သို့မဟုတ် အမေရိကန်က ထပ်မံ စစ်မက်မဖြစ်ပွားရေးအတွက် အာမခံနိုင်မည့် ယန္တရားတစ်ရပ် ထူထောင်ရန်၊ ငွေကြေးလျော်ကြေး ပေးရန်နှင့် စစ်တိုက်မှုများ အားလုံး အဆုံးသတ်ရန် တောင်းဆိုထားသည်။ အဓိပ္ပါယ်အားဖြင့် အစ္စရေးက လက်ဘနွန်ရှိ ဟစ်ဇ်ဘိုလာအဖွဲ့နှင့် ဂါဇာရှိ ဟာမတ်စ်အဖွဲ့အပေါ် ဆင်နွှဲနေသည့် စစ်ဆင်ရေးများကိုလည်း ရပ်တန့်ရမည်ဟု ဆိုလိုသည်။
ထို့အပြင် မဟာဗျူဟာအရေးပါသည့် ဟောမုဇ် ရေလက်ကြားအပေါ် အီရန်၏ အချုပ်အခြာအာဏာကို အသိအမှတ်ပြု လက်ခံရန်လည်း အီရန်ဘက်က လိုလားနေကြောင်း သတင်းရင်းမြစ်က ထပ်မံဖော်ပြခဲ့သည်။