တောင်ကိုရီးယား အမျိုးသားအခွန်ဌာန (NTS) က အိမ်ငှားရမ်းလုပ်ငန်း လုပ်ကိုင်သူများနှင့် အိမ်အများပိုင်ဆိုင်သူများအနက် စုစုပေါင်း ဝမ် ၂၈၀ ဘီလျံ (ဒေါ်လာ ၁၈၄.၅ သန်း) ခန့် အခွန်ရှောင်တိမ်းခဲ့သည်ဟု သံသယရှိသူများကို မတ် ၃၀ ရက်တွင် စတင်စုံစမ်းနေကြောင်း သိရသည်။
စုံစမ်းခံနေရသူများတွင် ဆိုးလ်မြို့၊ အထူးသဖြင့် ဂန်နမ်ဒေသအပါအဝင် အိမ် ၇ လုံးထက်ပို ပိုင်ဆိုင်သူများနှင့် အိမ်ရာအငှားလုပ်ငန်းအဖြစ် မှတ်ပုံတင်ထားပြီး တိုက်ခန်းယူနစ် ၁၀၀ ကျော် ပိုင်ဆိုင်သော လုပ်ငန်းများ ပါဝင်ကြောင်း NTS က ပြောသည်။ စုစုပေါင်း ကော်ပိုရေးရှင်း ၅ ခုနှင့် တစ်ဦးချင်း ၁၀ ဦးကို စုံစမ်းမှုတွင် ထည့်သွင်းထားသည်။
လက်ရှိ အခွန်စည်းမျဉ်းများအရ အိမ်ရာအငှားလုပ်ငန်းအဖြစ် မှတ်ပုံတင်ထားသူများသည် အိမ်အများပိုင်ဆိုင်မှုအပေါ် ချမှတ်သည့် မြင့်မားသော အရင်းအနှီးအမြတ်ခွန် (capital gains tax) မှ ကင်းလွတ်ခွင့်အပါအဝင် အကျိုးခံစားခွင့်များ ရရှိနိုင်သည်။ သို့သော် စုံစမ်းခံနေရသူများက ယင်းအကျိုးခံစားခွင့်များကို အလွဲသုံးစားလုပ်ကာ အငှားဝင်ငွေကို လျှော့တင်ဖော်ပြခြင်း သို့မဟုတ် ကုန်ကျစရိတ်ကို အလွန်အကျွံ တင်ပြခြင်းများ ပြုလုပ်ထားနိုင်သည်ဟု NTS က ဆိုသည်။
အိမ်ရာဈေးနှုန်းများသည် သမ္မတ လီဂျေမြောင်၏ အဓိက မူဝါဒဆိုင်ရာ စိန်ခေါ်မှုတစ်ရပ်အဖြစ် ဆက်လက်တည်ရှိနေပြီး၊ အိမ်ဈေးမြင့်တက်မှုကြောင့် လူငယ်အများစုက လက်ထပ်ရေးနှင့် ကလေးမွေးဖွားရေး အစီအစဉ်များကိုပင် စွန့်လွှတ်နေကြကြောင်း ၎င်းက အိမ်ရာဈေးကွက် တည်ငြိမ်စေရန် ကတိပြုထားသည်။ ထို့အပြင် အစိုးရက ယခင်က အိမ်အများပိုင်ဆိုင်သူများအတွက် ယာယီပေးထားသည့် မြင့်မားသော capital gains tax ကင်းလွတ်ခွင့်ကိုလည်း ရုပ်သိမ်းထားပြီးဖြစ်သည်။