ပြင်သစ်သမ္မတ အီမန်နျူယယ် မက်ခရွန်က ဟော်မုဇ်ရေလက်ကြားကို စစ်ရေးနည်းလမ်းဖြင့် “လွတ်မြောက်စေမည်” ဆိုသည့် အယူအဆမှာ လက်တွေ့မကျကြောင်း ဧပြီ ၂ ရက်တွင် ပြောကြားခဲ့သည်။ အီရန်နှင့်ပတ်သက်၍ အမေရိကန်သမ္မတ ဒေါ်နယ်ထရမ့်၏ ပြောဆိုချက်များ မတည်ငြိမ်ဘဲ မကြာခဏ ပြောင်းလဲနေခြင်းကိုလည်း မက်ခရွန်က ဝေဖန်ခဲ့သည်။
တောင်ကိုရီးယားတွင် ပြောကြားရာ၌ မက်ခရွန်က “ဟော်မုဇ်ရေလက်ကြားကို စစ်ရေးလှုပ်ရှားမှုနဲ့ အင်အားသုံးပြီး လွတ်မြောက်စေဖို့ ထောက်ခံသူတွေရှိတယ်။ အမေရိကန်ဘက်ကလည်း တချို့အချိန်တွေမှာ ဒီလိုအမြင်ကို ထုတ်ဖော်ခဲ့တယ်” ဟု ဆိုသည်။ “တချို့အချိန်တွေမှာ” ဟု အထူးတလည် ပြောဆိုရခြင်းမှာ အမေရိကန်၏ သဘောထားသည် မကြာခဏ ပြောင်းလဲနေကြောင်း အဓိပ္ပာယ်ရသည်။ “ဒါဟာ ကျွန်တော်တို့ ရွေးချယ်ထားတဲ့ နည်းလမ်းမဟုတ်သလို လက်တွေ့လည်း မကျပါဘူး” ဟု ၎င်းက ထပ်လောင်းပြောကြားသည်။
၎င်း၏ ပြောဆိုချက်အရ ထိုလမ်းကြောင်းကို စစ်ရေးအင်အားဖြင့် ဖွင့်လှစ်ရန် ကြိုးပမ်းမည်ဆိုပါက အချိန်အတော်အတန် ကြာမြင့်မည်ဖြစ်ပြီး အီရန်တော်လှန်ရေးအစောင့်တပ် (Revolutionary Guards) ၏ ကမ်းရိုးတန်းဆိုင်ရာ ခြိမ်းခြောက်မှုများ၊ ပဲ့ထိန်းဒုံးများနှင့် အခြားအန္တရာယ်များကြောင့် ရေလက်ကြားကို ဖြတ်သန်းသည့် သင်္ဘောများအတွက် အန္တရာယ်ပိုမိုမြင့်မားလာမည်ဟု ဆိုသည်။ “ဒါကို အီရန်နဲ့ ပူးပေါင်းညှိနှိုင်းပြီးမှသာ လုပ်ဆောင်နိုင်ပါတယ်။ ဒါကြောင့် ပထမဆုံးအနေနဲ့ ပစ်ခတ်တိုက်ခိုက်မှု ရပ်စဲရေးနဲ့ ဆွေးနွေးညှိနှိုင်းမှုတွေ ပြန်လည်စတင်ရေး လိုအပ်ပါတယ်” ဟုလည်း ပြောကြားခဲ့သည်။
ဟော်မုဇ်ရေလက်ကြားသည် ကမ္ဘာ့ရေနံသယ်ယူပို့ဆောင်ရေးအတွက် အရေးပါသော သင်္ဘောလမ်းကြောင်းတစ်ခုဖြစ်ပြီး အရှေ့အလယ်ပိုင်း စစ်ရေးတင်းမာမှုများကြောင့် လွန်ခဲ့သည့် ရက်သတ္တပတ်များအတွင်း လက်တွေ့အားဖြင့် ပိတ်ဆို့သွားသကဲ့သို့ ဖြစ်နေသည်။ ထို့ပြင် မက်ခရွန်က ထရမ့်အပေါ်လည်း ပဋိပက္ခနှင့်ပတ်သက်သည့် ပြောဆိုချက်များကို နေ့စဉ်ပြောင်းလဲနေကြောင်း၊ “အလေးအနက်ထားချင်တယ်ဆိုရင် မနေ့က ပြောခဲ့တာနဲ့ ဆန့်ကျင်တဲ့စကားကို နေ့တိုင်း မပြောသင့်ဘူး။ ဖြစ်နိုင်ရင် နေ့တိုင်း မပြောတာလည်း ကောင်းတယ်” ဟု ဝေဖန်ခဲ့သည်။