အမေရိကန် အစားအသောက်နှင့် ဆေးဝါးကွပ်ကဲရေးဌာန (FDA) က အဲလိုင်လီ၏ ကိုယ်အလေးချိန်လျှော့ဆေးကို အတည်ပြုလိုက်သဖြင့် နိုဗို နော်ဒစ်ခ်၏ ပါးစပ်သောက် Wegovy ပြီးနောက် ဈေးကွက်အတွင်း ဝင်ရောက်လာသည့် ဒုတိယမြောက် ဆေးဝါး ဖြစ်လာသည်။ ဆေးလုံးပုံစံ၏ အဆင်ပြေမှုကို အားထားကာ ထိုးဆေးများနှင့် ယှဉ်ပြိုင်ရန် ဆေးကုမ္ပဏီများအကြား ပြိုင်ဆိုင်မှုလည်း ပိုမို ပြင်းထန်လာနေသည်။
Reuters ၏ ဖော်ပြချက်အရ အမေရိကန် FDA သည် ဗုဒ္ဓဟူးနေ့တွင် Eli Lilly ၏ ကိုယ်အလေးချိန်လျှော့ဆေး orforglipron ကို အတည်ပြုခဲ့ပြီး ၎င်းကို Foundayo အမည်ဖြင့် ရောင်းချမည်ဖြစ်သည်။ ၎င်းသည် တစ်နေ့တစ်ကြိမ် သောက်သုံးရသည့် ပါးစပ်သောက်ဆေးဖြစ်ပြီး အစာစားချင်စိတ်ကို လျှော့ချပေးသည့် GLP-1 ဟော်မုန်းကို တုပအလုပ်လုပ်စေရန် ဒီဇိုင်းလုပ်ထားသည်။ ထို့ကြောင့် Lilly ၏ အဓိက ထိုးဆေး tirzepatide နှင့် ဆင်တူသည့် ယန္တရားကို အသုံးပြုထားပြီး ထိုထိုးဆေးကို ဆီးချိုရောဂါအတွက် Mounjaro၊ ကိုယ်အလေးချိန်လျှော့ရန် Zepbound ဟု အမည်ပေး ရောင်းချနေသည်။ Lilly က အဆိုပါဆေးကို ၎င်း၏ LillyDirect အစီအစဉ်မှတစ်ဆင့် ဧပြီ ၆ ရက်တွင် စတင် ပို့ဆောင်မည်ဖြစ်ပြီး ကိုယ်တိုင်ပေးချေသုံးစွဲသူများအတွက် အနိမ့်ဆုံး ဒိုစ်တစ်လစာ ဒေါ်လာ ၁၄၉ ကျသင့်မည်ဟု ဆိုသည်။ မကြာမီတွင် လက်လီ ဆေးဆိုင်များနှင့် telehealth ဝန်ဆောင်မှုပေးသူများမှတစ်ဆင့်လည်း ရရှိနိုင်မည်ဟု အင်ဒီယာနာပိုလစ်အခြေစိုက် ကုမ္ပဏီက ပြောသည်။
ယခုအတည်ပြုချက်ကြောင့် Lilly သည် အလျင်အမြန် ကြီးထွားလာနေသည့် ကိုယ်အလေးချိန်လျှော့ဆေး ဈေးကွက်တွင် ပိုမိုခိုင်မာသည့် အခြေခံကို ရရှိလာပြီး ထိုးဆေးအမျိုးအစား ကိုယ်အလေးချိန်လျှော့ဆေးဈေးကွက်တွင် နိုဗို နော်ဒစ်ခ်ကို ကျော်တက်ပြီးနောက် နောက်တစ်ဆင့်၌လည်း အားသာချက် ရရှိလာသည်။ ဒိန်းမတ် ဆေးကုမ္ပဏီ Novo Nordisk သည် ဆီးချိုရောဂါအတွက် Ozempic နှင့် အဝလွန်မှုအတွက် Wegovy တို့ဖြင့် GLP-1 ဆေးဝါးများကို ပထမဆုံး ဈေးကွက်သို့ မိတ်ဆက်နိုင်ခဲ့သော်လည်း Lilly နှင့် ပြင်းထန်သည့် ပြိုင်ဆိုင်မှုအပြင် ဆေးရောစပ်ထုတ်လုပ်ထားသော မူကွဲဆေးများကြောင့် နောက်ကျကျန်ခဲ့သည်။ Lilly ၏ ဆေးသည် Wegovy ပါးစပ်သောက်ဆေးထက် ပိုမိုအဆင်ပြေပြီး တစ်နေ့တာအတွင်း မည်သည့်အချိန်မဆို သောက်နိုင်သော်လည်း Wegovy ကိုမူ မနက်စောစော အစာ၊ ရေ သို့မဟုတ် အခြားဆေးများ မသောက်မီ မိနစ် ၃၀ အလိုတွင် သောက်ရမည်ဖြစ်သည်။ ကြေညာချက်အပြီး Lilly ၏ ရှယ်ယာ ၄ ရာခိုင်နှုန်း တက်သွားခဲ့ပြီး အမေရိကန်တွင် စာရင်းဝင်ထားသည့် Novo ၏ ရှယ်ယာများမှာ ၂ ရာခိုင်နှုန်းနီးပါး ကျဆင်းခဲ့သည်။ လုပ်ငန်းလေ့လာသူများက ပါးစပ်သောက် ကိုယ်အလေးချိန်လျှော့ဆေးများသည် ထိုးဆေးများကို လုံးဝ အစားထိုးနိုင်မည်မဟုတ်သော်လည်း ၂၀၃၀ ခုနှစ်တွင် ဈေးကွက်၏ ၂၀ ရာခိုင်နှုန်းခန့်ကို သိမ်းပိုက်နိုင်ဖွယ်ရှိပြီး အထူးသဖြင့် ထိုးဆေးထက် ဆေးလုံးကို ပိုနှစ်သက်သည့် လူနာများအကြား လက်ခံမှု မြင့်မားနိုင်ကြောင်း ခန့်မှန်းထားသည်။